មន្ត្រីជាន់ខ្ពស់ចិន សន្យាកៀរគរអ្នកទេសចរ វិនិយោគិនចិន មកកម្ពុជាឱ្យកាន់តែច្រើនឡើង

មន្ត្រីជាន់ខ្ពស់ផ្នែកនយោបាយចិន បានសន្យានៅចំពោះមុខប្រធានរដ្ឋសភាកម្ពុជា ថា នឹងជួយកៀរគរអ្នកទេសចរ និងអ្នកវិនិយោគពីប្រទេសខ្លួនឱ្យមកទស្សនា និងបណ្តាក់ទុនវិនិយោគនៅក្នុងប្រទេសកម្ពុជាឱ្យបានកាន់តែច្រើន។

សមាជិកគណៈកម្មាធិការអចិន្ត្រៃយ៍នៃការិយាល័យនយោបាយមជ្ឈិមបក្សកុម្មុយនិស្តចិន និងជាប្រធានសភាប្រឹក្សានយោបាយនៃប្រជាជនចិន លោក វ៉ាង ហ៊ូនីង បានជម្រាបសម្តេច ឃួន សុដារី ប្រធានរដ្ឋសភានៃកម្ពុជា ថា ឈរលើកិច្ចសហប្រតិបត្តិការដ៏ល្អ មិត្តភាពជាប្រពៃណី មិត្តដែកថែប និងកិច្ចសហប្រតិបត្តិការដៃគូយុទ្ធសាស្រ្តគ្រប់ជ្រុងជ្រោយ ចិននឹងកៀរគរអ្នកទេសចរ និងវិនិយោគិនចិន មកកម្ពុជាឱ្យកាន់តែច្រើនឡើង។

លោក វ៉ាង ហ៊ូនីង បានលើកឡើងដូច្នេះនៅក្នុងឱកាសជួបពិភាក្សាការងារជាមួយសម្តេចប្រធានរដ្ឋសភា នៅព្រឹកថ្ងៃទី២៤ ខែកញ្ញា ឆ្នាំ២០២៤ នៅវិមានសភាតំណាងប្រជាជនចិន ក្នុងរដ្ឋធានីប៉េកាំង។

សម្តេច ឃួន សុដារី និងលោក វ៉ាង ហ៊ូនីង បានវាយតម្លៃខ្ពស់ចំពោះកិច្ចសហប្រតិបត្តិការដែលថ្នាក់ដឹកនាំប្រទេសទាំងពីរបានដាក់ចេញ និងបានសន្យារួមគ្នាថា នឹងជំរុញបន្ថែមទៀតការបន្ស៊ីនៅក្នុងកិច្ចសហប្រតិបត្តិការត្បូងពេជ្ររវាងគំនិតផ្តួមផ្តើមនានារបស់ភាគីចិន ដូចជាគម្រោងខ្សែក្រវាត់និងផ្លូវ ជាមួយយុទ្ធសាស្រ្តបញ្ចកោណរបស់កម្ពុជា ដើម្បីបម្រើផលប្រយោជន៍ប្រទេសទាំងពីរឱ្យចេញជាលទ្ធផលជាក់ស្តែងក្នុងការកសាងសហគមន៍ជោគវាសនារួមកម្ពុជាចិនប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។

សម្តេច ឃួន សុដារី បានបង្ហាញក្ដីសង្ឃឹមថា ចិននឹងបន្តជំរុញលើកទឹកចិត្តដល់អ្នកវិនិយោគចិនមកកម្ពុជាឱ្យបានកាន់តែច្រើនថែមទៀតជាអាទិ៍ វិស័យកសិ-ឧស្សាហកម្ម ផលិតកម្ម ឧស្សាហកម្ម សេវាកម្ម សេដ្ឋកិច្ចឌីជីថល សេដ្ឋកិច្ចបៃតង។ សម្ដេច បន្តថា កម្ពុជាត្រូវការជាចាំបាច់នូវការជំរុញបន្ថែមទៀតផ្នែកពាណិជ្ជកម្ម ទេសចរណ៍ ការវិនិយោគ នវានុវត្តន៍ ការផ្ទេរបច្ចេកវិទ្យា ពង្រឹងសមត្ថភាពផលិត និងការអភិវឌ្ឍមូលធនមនុស្ស។

ម្យ៉ាងវិញ កម្ពុជា-ចិន ត្រូវប្រឹងប្រែងក្នុងការជំរុញឱ្យសម្រេចបាននូវ “ច្រករបៀងឧស្សាហកម្ម និងបច្ចេកវិទ្យា” និង “ច្រករបៀងមច្ឆា និងអង្ករ”។ នេះជាការលើកឡើងបន្ថែមរបស់សម្តេចប្រធានរដ្ឋសភា។

លោកប្រធានសភាប្រឹក្សានយោបាយនៃប្រជាជនចិន បានអបអរសាទរជាថ្មីជូនសម្តេចរដ្ឋសភាធិបតី ឃួន សុដារី ដែលត្រូវបានរដ្ឋសភាបោះឆ្នោតជាប្រធានរដ្ឋសភានីតិកាលទី៧ និងជាស្រ្តីដំបូងក្នុងប្រវត្តិសាស្ត្រកម្ពុជាដែលបានកាន់តួនាទីជាន់ខ្ពស់នេះ។ លោក បន្តថា ក្នុងនាមប្រធានរដ្ឋសភា និងជាប្រធានក្រុមមិត្តភាពរដ្ឋសភាកម្ពុជា-ចិន ផងនោះ ក៏បានបង្ហាញពីឆន្ទៈមោះមុតរបស់សម្តេចនៅក្នុងការចូលរួមថែរក្សា និងលើកកម្ពស់ចំណងមិត្តភាពកម្ពុជានិងចិន ឱ្យកាន់តែរឹងមាំបន្ថែមទៀត។

លោក វ៉ាង ហ៊ូនីង សង្ឃឹមថា ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្រ្តី កម្ពុជានឹងរីកចម្រើនកាន់តែឆាប់រហ័ស សម្រេចបាននូវគោលដៅអភិវឌ្ឍន៍ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។ លោកបញ្ជាក់ថា ក្នុងនាមមិត្តដែកថែប ចិននឹងគាំទ្រកម្ពុជាដើម្បីសម្រេចឱ្យបានគោលដៅអភិវឌ្ឍន៍នេះ៕