និយាមនីតិវិធីស្តីពីការគ្រប់គ្រងត្រួតពិនិត្យសារធាតុញៀន ត្រូវបានដាក់ឱ្យអនុវត្តជាផ្លូវការ

ឧបនាយករដ្ឋមន្រ្តីលោក នេត សាវឿន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រកាសដាក់ឱ្យអនុវត្តនិយាមនីតិវិធីប្រតិបត្តិស្តីពីការគ្រប់គ្រងត្រួតពិនិត្យសារធាតុញៀន និងសារធាតុគីមីផ្សំ ក្នុងគោលបំណងធានាបាននូវការគ្រប់គ្រងត្រួតពិនិត្យការស្នើសុំនាំចេញ-នាំចូល ការដឹកជញ្ជូន ការចែកចាយ ការប្រើប្រាស់ និងការធ្វើសន្និធិសារធាតុញៀន និងសារធាតុគីមីផ្សំប្រកបដោយប្រសិទ្ធភាព។

សេចក្តីសម្រេចស្តីពី ការដាក់ឱ្យអនុវត្តនិយាមនីតិវិធីនេះ ត្រូវបានដាក់ឱ្យអនុវត្តចាប់ពីថ្ងៃទី ១៤ ខែតុលា ឆ្នាំ ២០២៤ ដែលមានវិសាលភាព អនុវត្តចំពោះការគ្រប់គ្រងត្រួតពិនិត្យសារធាតុញៀន និងសារធាតុគីមីផ្សំ ក្រោមច្បាប់ស្តីពីការត្រួតពិនិត្យគ្រឿងញៀន និងសារធាតុគីមីផ្សំពាក់ព័ន្ធនឹងការផលិតគ្រឿងញៀនខុសច្បាប់ដទៃទៀតដែលកម្លាំងសមត្ថកិច្ច អនុវត្តច្បាប់ធ្វើការបង្ក្រាបបាន។

ការត្រួតពិនិត្យសារធាតុញៀន និងសារធាតុគីមីផ្សំ ត្រូវរៀបចំនិងគ្រប់គ្រងដោយក្រុមការងារអន្តរក្រសួង ត្រួតពិនិត្យសារធាតុញៀននិងសារធាតុគីមីផ្សំ ដែលជាយន្តការស្ថាប័នរួមរបស់រាជរដ្ឋាភិបាល។

គួរជម្រាបថា រាជរដ្ឋាភិបាលនីតិកាលទី៧នៃរដ្ឋសភា បានកំណត់ការងារប្រយុទ្ធប្រឆាំងគ្រឿងញៀនជាការងារ អាទិភាពមួយទៅក្នុងយុទ្ធសាស្ត្របញ្ចកោណដំណាក់កាលទី១ ដើម្បីលើកកម្ពស់ប្រសិទ្ធភាព និងប្រសិទ្ធផលនៃការបង្ការទប់ស្កាត់ និងបង្ក្រាបការចរាចរជួញដូរ ការចែកចាយ និងការប្រើប្រាស់គ្រឿងញៀន។  ពិសេស ការបង្ការ ទប់ស្កាត់ការកែច្នៃផលិតគ្រឿងញៀនសំយោគខុសច្បាប់ដោយប្រើប្រាស់សារធាតុគីមីផ្សំ។

ជាមួយគ្នានេះ រាជរដ្ឋាភិបាលបានដាក់ចេញនូវគោលនយោបាយប្រយុទ្ធប្រឆាំងគ្រឿងញៀន ផែនការ យុទ្ធនាការប្រយុទ្ធប្រឆាំងគ្រឿងញៀនខុសច្បាប់ គោលនយោបាយភូមិ-ឃុំ/សង្កាត់ មានសុវត្ថិភាព ភូមិ ឃុំ/សង្កាត់ គ្មានគ្រឿងញៀន។

សេចក្តីសម្រេចបញ្ជាក់ថា៖«ដើម្បីបង្ការ និងទប់ស្កាត់ហានិភ័យ ដែលកើតចេញពីការលួចបង្វែរសារធាតុគីមីផ្សំពីជំនួញស្របច្បាប់ យកទៅកែច្នៃផលិតគ្រឿងញៀនសំយោគខុសច្បាប់ និងលើកកម្ពស់ប្រសិទ្ធភាពការងារគ្រប់គ្រងត្រួតពិនិត្យ សារធាតុញៀននិងសារធាតុគីមីផ្សំ គឺចាំបាច់ត្រូវប្រតិបត្តិតាមនិយាមនីតិវិធីប្រតិបត្តិជាក់លាក់មួយសម្រាប់បម្រើដល់ការគ្រប់គ្រង និងត្រួតពិនិត្យសារធាតុញៀននិងសារធាតុគីមីផ្សំនៅតាមក្រុមហ៊ុន រោងចក្រ សហគ្រាស នៅកម្ពុជា»។

ក្នុងស្មារតីនេះ រាល់ការគ្រប់គ្រង និងត្រួតពិនិត្យការនាំចូល ការនាំចេញ ការដឹកជញ្ជូន ការចែកចាយ ការប្រើប្រាស់ និងការធ្វើសន្និធិសារធាតុញៀននិងសារធាតុគីមីផ្សំ ត្រូវតែប្រតិបត្តិដោយហ្មត់ចត់បំផុតតាមខ្លឹមសារនៃច្បាប់ និងលិខិតបទដ្ឋានគតិយុត្ត។

គួរជម្រាបថា ក្នុងឆ្នាំ ២០២៣ សមត្ថកិច្ចកម្ពុជា ​បាន​បង្ក្រាប​ករណី​គ្រឿង​ញៀន​ប្រមាណ​ ៧ ​ពាន់​ករណី ​និងរឹបអូសបានគ្រឿងញៀនជិត ៣ តោន ៕