១០ខែឆ្នាំនេះ ច្រកចេញចេញចូលតែមួយក្រុងខេមរភូមិន្ទទទួលចំណូលបាន៦៦លានរៀល

ការិយាល័យច្រកចេញចូលតែមួយក្រុងខេមរភូមិន្ទ បានទទួលចំណូលពីការផ្តល់សេវារដ្ឋបាលសាធារណៈចំនួន៦៦លានរៀល ក្នុងនោះមានចំនួនប្រជាពលរដ្ឋស្វែងរកសេវាចំនួន១១.០១៩នាក់ បើគិតត្រឹមខែ១០ខែឆ្នាំ២០២៤នេះ។

មិនខុសគ្នាប៉ុន្មានចំពោះចំណូលដែលបានមកពីការផ្តល់សេវាសាធារណៈរបស់មន្រ្តីនៅការិយាល័យច្រកចេញចូលតែមួយក្រុងខេមរភូមិន្ទ ទោះបីជា១០ខែឆ្នាំ២០២៤នេះទទួលបានត្រឹម៦៦លានរៀល។ ហើយបើធៀបនឹងរយៈពេលដូចគ្នាកាលពីឆ្នាំ២០២៣ ថយចុះតែជាង២០ម៉ឺននាក់រៀលប៉ុណ្ណោះ។

លោកស្រី នួន ផាន់នី អនុប្រធានស្តីទីការិយាល័យច្រកចេញចេញចូលតែមួយក្រុងខេមរភូមិន្ទ បានឱ្យដឹងនៅថ្ងៃទី៤ ខែវិច្ឆិកា ថា អំឡុងពេល១០ខែឆ្នាំនេះ មានប្រជាពលរដ្ឋសរុប១១.០១៩នាក់ បានមកស្នើសុំសេវានៅច្រកចេញចូលតែមួយក្រុង។ កញ្ចប់សេវារដ្ឋបាលទាំងនោះ ភាគច្រើនការស្នើសុំបញ្ជាក់លើនីត្យានុកូលកម្ម អត្រានុកូលដ្ឋាន ការផ្ទេរអចលនទ្រព្យ និងឯកសារសញ្ញាបត្រជាដើម។

លោកស្រី នួន ផាន់នី បន្តថា តួលេខពលរដ្ឋមកសុំបញ្ជាក់សេវាថយចុះប្រមាណ២០ភាគរយ ធៀបនឹងរយៈពេលដូចគ្នាកាលពីឆ្នាំ២០២៣កន្លងទៅ ស្របពេលស្ថានភាពសេដ្ឋកិច្ចពុំសូវល្អដូចមុនការផ្ទេរទិញលក់ដីធ្លីផ្ទះ ព្រមទាំងការសាងសង់សំណង់ មិនសូវមានសកម្មភាពលេចធ្លោខ្លាំង។

ទោះបីយ៉ាងណា ក្រុមមន្រ្តីប្រចាំការនៅច្រកចេញចូលតែមួយក្រុង ដោយមានលោក ឈឹម ចិន អភិបាលស្តីទីក្រុងខេមភូមិន្ទ ដឹកនាំគឺនៅបន្តពង្រឹងគុណភាពផ្តល់សេវាឱ្យបានឆាប់រហ័ស តម្លាភាព គណនេយ្យភាព និងកាត់បន្ថយមិនឱ្យអ្នករត់ការក្រៅផ្លូវការជូនប្រជាពលរដ្ឋ។

រដ្ឋបាលក្រុងខេមភូមិន្ទ ក៏អំពាវនាវដល់ពលរដ្ឋដែលជាគ្រប់ម្ចាស់សេវារដ្ឋបាល ត្រូវមកស្នើសុំសេវាដោយខ្លួនឯងផ្ទាល់នៅច្រកចេញចេញចូលតែមួយក្រុង ចៀសវាងទៅពឹងពរអ្នករត់ការសេវាក្រៅផ្លូវការដែលធ្វើឱ្យខាតបង់ថវិកា ពេលវេលា ឬចោទប្រកាន់ថាមន្រ្តីបម្រើសេវាពុំបានល្អដូចគ្នាចង់បាន។

លោក សំ ឡាយ ជាពលរដ្ឋសង្កាត់ស្ទឹងវែង និងអ្នកស្រី ហះ ម៉ារី ជាពលរដ្ឋសង្កាត់ដងទង់ បានលើកសរសើរពី និងអរគុណចំពោះសកម្មភាពការងារផ្តល់សេវារបស់មន្រ្តីថា ពួកគាត់ពិតជាមានក្រមសីលធម៌ និងផ្តល់សេវារដ្ឋបាលប្រកបដោយទំនុកចិត្តខ្ពស់ដែលធ្វើពួកគាត់ជាពលរដ្ឋពិតជាពេញចិត្តជាខ្លាំង។

ក្រុមពលរដ្ឋដដែល អះអាងថា ការមកទទួលសេវាសាធារណៈនៅច្រកចេញចូលតែមួយក្រុងខេមរភូមិន្ទ ប្រព្រឹត្តបានល្អ តម្លាភាព លឿនឆាប់រហ័ស ពិសេសគ្មានការទារកម្រៃខុសគោលការណ៍នោះទេ ខណៈមានតារាងតម្លៃមុខសេវាបង្ហាញឱ្យដឹងច្បាស់លាស់ពុំអាចក្លែងបន្លំបាន៕

អត្ថបទ៖សិរីវឌ្ឍនៈ