សម្ដេចតេជោ៖ លោក ត្រាំ ឈ្នះឆ្នោតព្រោះ អាមេរិក មិនចង់យកស្ត្រីធ្វើមេដឹកនាំ និងដោយសារត្រាំស្អប់សង្គ្រាម

តាមរយៈទំព័ហ្វេសប៊ុកផ្លូវការ នៅល្ងាចថ្ងៃពុធ នេះ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងប្រធានព្រឹទ្ធសភា កត់សម្គាល់ឃើញថា លោក ដូណាាល់ ត្រាំ ទទួលបានជ័យជម្នះលើលោកស្រី កាម៉ាឡា ហារីស ព្រោះតែសង្គមអាមេរិក មិនចង់បានស្ត្រីធ្វើជាមេដឹកនាំ និងដោយសារតែ លោក ត្រាំ ជាមនុស្សស្អ​ប​សង្គ្រាម។

សម្ដេចតេជោ ហ៊ុន សែន សរសេរដូច្នេះ៖«ការឈ្នះរបស់លោក ត្រាំ មានមូលហេតុច្រើន តែតាមការកត់សំគាល់របស់ខ្ញុំ មាន៣ចំណុច ដែលទទួលបានសន្លឹកឆ្នោតពីប្រជាជន។ទី១៖ សង្គមរបស់សហរដ្ឋអាមេរិក មិនទាន់ត្រៀមខ្លួនដើម្បីយកស្រ្តីធ្វើជាមេដឹកនាំរបស់ខ្លួន បើទោះបីសហរដ្ឋអាមេរិកជាបិតាប្រជាធិបតេយ្យ ផ្នែកយេនឌ័រ ក៏ដោយ។»។

ចំណុចទី២ ដែលសម្ដេចតេជោ សម្គាល់ឃើញថាមូលហេតុដែល លោក ដូណាល់ ត្រាំ ឈ្នះលោកស្រី ហារីស គឺ ទំនងព្រះបានចារមកថា លោក ដូណាល់ ត្រាំ ត្រូវតែប្រកួតប្រជែងជាមួយស្រ្តី។ សម្ដេចតេជោ សម្គាល់ឃើញបែបនេះ ដោយសារតែកាលពីលើកទី១ គឺកាលពីឆ្នាំ២០១៦ កន្លងទៅ  លោក ដូណាល់ ត្រាំ ប្រកួតឈ្នះលោកស្រី ហីឡារី គ្លិនតុន។ ចំណែកនៅឆ្នាំ២០២៤នេះ លោកប្រកួតជាមួយស្ត្រីទៀតគឺ លោកស្រី ហារីស ហើយទទួលបានជោគជ័យទៀត។

ចំណុចទី៣ ដែលសម្ដេចប្រធានគណបក្សប្រជាជនកម្ពុជា មើលឃើញថា ជាមូលហេតុដែលនាំឱ្យលោកត្រាំ ឈ្នះឆ្នោត គឺព្រោះតែមុនការបោះឆ្នោតជ្រើសរើសប្រធានាធិបតីសហរដ្ឋអាមេរិក  លោក ដូណាល់ ត្រាំ បានផ្ញើសារជូនពលរដ្ឋអាមេរិក និងជុំវិញពិភពលោក អំពីការស្រឡាញ់សន្តិភាព ស្អប់ខ្ពើមសង្រ្គាម ដែលហៅថា «សន្តិភាពនិយម»។ តាមសម្ដេចតេជោ ហ៊ុន សែន ហេតុ ដោយសារតែលោក ត្រាំ ស្រឡញ់ សន្តិភាពនេះហើយ ទើបសន្លឹកឆ្នោតរបស់លោក ត្រាំ ទទួលបានជោគជ័យ។

បើតាមសម្ដេចតេជោ  ហ៊ុន សែន ការឈ្នះរបស់លោក ត្រាំ ក៏អាចបង្ហាញពីចរិតពលរដ្ឋអាមេរិកដែលស្រឡាញ់សន្តិភាព ជាជាងការធ្វើសង្រ្គាមទាំងស្រុងអ៊ុយក្រែន និងអ៉ីស្រាអែល។

សូមបញ្ជាក់ថា លោក ត្រាំ បានក្លាយជាប្រធានាធិបតីអាមេរិកទី២ក្នុងប្រវត្តិសាស្រ្ត ដែលឈ្នះឆ្នោតពីរអាណត្តិប៉ុន្តែមិនជាប់គ្នា បន្ទាប់ពី Grover Cleveland ដែលឈ្នះបែបនេះដែរ ក្នុងឆ្នាំ១៨៩២។

តាមសេចក្តីរាយការណ៍របស់ Fox News នៅថ្ងៃពុធទី៦ខែវិច្ឆិកាឆ្នាំ២០២៤, គិតត្រឹមម៉ោង២រសៀល (ម៉ោងនៅកម្ពុជា) លោក ត្រាំ ទទួលបានអង្គបោះឆ្នោតចំនួន២៧៧ ពោលគឺលើសចំនួន២៧០ដែលត្រូវការ ខណៈលោកស្រី កាម៉ាឡា ហារីស នៅខាងគណបក្សប្រជាធិបតេយ្យ រកបានត្រឹម២២៦ប៉ុណ្ណោះ៕

ដោយ៖ ង៉ិល ណារ៉ាត់

ចុចអាន៖ ត្រាំ គឺជាប្រធានាធិបតីអាមេរិកទី២ក្នុងប្រវត្តិសាស្រ្ត ដែលឈ្នះឆ្នោតពីរអាណត្តិ ប៉ុន្តែមិនជាប់គ្នា