ប ស ស លើកទឹកចិត្តពលរដ្ឋចុះឈ្មោះចូលជាសមាជិក​នៅកោះពេជ្រ និងដងស្ទឹងសៀមរាបក្នុងកំឡុងពេលបុណ្យអុំទូក

បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្ត និងជំរុញដល់បងប្អូនប្រជាពលរដ្ឋ អាជីវករ និងអ្នកប្រកបរបរផ្ទាល់ខ្លួនអាចស្នើសុំប័ណ្ណចូលជាសមាជិក ប.ស.ស.បាននៅទីតាំងកោះពេជ្រនិងនៅខេត្តសៀមរាប ក្នុងឱកាសពិធីបុណ្យអុំទូក បណ្តែតប្រទីប និងសំពះព្រះខែ ខាងមុខនេះ។

បើតាម ប.ស.ស. បានឱ្យដឹងថា ក្នុងឱកាសពិធីបុណ្យអុំទូក បណ្តែតប្រទីប និងសំពះព្រះខែ ខាងមុខនេះ បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ នឹងឈប់សម្រាកផ្តល់សេវាចំនួន៣ថ្ងៃនៅគ្រប់សាខាខេត្ត-ខណ្ឌទូទាំងប្រទេស គឺចាប់ពីថ្ងៃទី១៤-១៥-១៦ ខែវិច្ឆិកា ឆ្នាំ២០២៤ ។ ប.ស.ស. បានបញ្ជាក់ថា ក្នុងរយៈពេល ៣ថ្ងៃ នៃការឈប់សម្រាកនេះ សាធារណជនក៏នៅអាចស្នើសុំចុះឈ្មោះចូលជាសមាជិក ប.ស.ស. និងអាចសាកសួរព័ត៍មានផ្សេងៗ​បានផងដែរ នៅតាមស្តង់ចុះបញ្ជីចល័ត ប.ស.ស. ដែលរួមមាននៅរាជធានីភ្នំពេញមានទីតាំងនៅកោះពេជ្រ (តំបន់ A) នៅស្តង់លេខ១A និងលេខ២A ខាងកើតឆាកតន្ត្រីចាប់ពីថ្ងៃទី១៤-១៦ ខែវិច្ឆិកា ឆ្នាំ២០២៤ និងខេត្តសៀមរាប នៅតំបន់ស្តង់ពិព័រណ៍ដងស្ទឹងសៀមរាប នៅស្តង់លេខ៥ និងលេខ៦ចាប់ពី១៣-១៦ ខែវិច្ឆិកា ឆ្នាំ២០២៤។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា គិតត្រឹមដើមខែតុលា ឆ្នាំ២០២៤ បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈបានទទួលសមាជិករបស់ខ្លួនកើនឡើងដល់២៥៤៣៨៧០ នាក់ស្រី ១៤១៣០១១ នាក់។ ក្នុងនោះ បុគ្គលស្ថិតក្នុងវិស័យសាធារណៈ ចំនួន ៤៨២,៥៧៧នាក់ បុគ្គលក្រោមបទប្បញ្ញត្តិច្បាប់ស្តីពីការងារ ចំនួន ១,៥៨១,៩៨៨នាក់, បុគ្គលស្វ័យនិយោជន៍ ចំនួន ៣៦២,៣៥៥នាក់, និងអ្នកក្នុងបន្ទុកសមាជិក ប.ស.ស. ចំនួន១១៦,៩៥០នាក់ដែលទាំងនេះបង្ហាញថា ប្រជាពលរដ្ឋកាន់តែជឿទុកចិត្ត និងយល់ដឹងច្បាស់ពីអត្ថប្រយោជន៍នៃបេឡាជាតិសន្តិសុខសង្គម (ប.ស.ស.)៕

អត្ថបទ៖ សំអឿន