មន្ត្រីជំនាញសុខាភិបាលអំពាវនាវពលរដ្ឋប្រុងប្រយ័ត្នចំពោះជំងឺផ្លូវដង្ហើម និងជំងឺភ្នែកក្រហម​ក្នុង​រដូវរំ​ហើយ

មន្ត្រីជំនាញសុខាភិបាល បានធ្វើការអំពាវនាវដល់ប្រជាពលរដ្ឋត្រូវបង្កើនការយកចិត្តទុកដាក់ និងប្រុងប្រយ័ត្នខ្ពស់ចំពោះជំងឺផ្លូវដង្ហើម និងជំងឺភ្នែកក្រហមក្នុងរដូវរំហើយ ខណៈតាមការព្យាករកម្ពុជានឹងចុះត្រជាក់ចាប់ពីសប្តាហ៍ទី២នៃខែវិច្ឆិកា រហូតដល់ខែមករា ឆ្នាំ២០២៥ខាងមុខនេះ។

លោកសាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ បានមានប្រសាសន៍នៅព្រឹកថ្ងៃទី០៩វិច្ឆិកា ថា ជាទូទៅមកដល់ខែវិចិ្ឆកានេះ គឺឈានដល់រដូវរំហើយ ឬរដូវធ្លាក់ខ្យល់ដែលទាមទារឱ្យប្រជាពលរដ្ឋយកចិត្តទុកដាក់ និងប្រុងប្រយ័ត្នចំពោះជំងឺចំនួន២សំខាន់ គឺទី១.ជំងឺផ្លូវដង្ហើមដែលត្រូវការការពារជារឿងសំខាន់ព្រោះកុមារត្រូវការកក់ក្តៅដោយត្រូវស្លៀកពាក់ខោអាវក្រាស់ៗពាក់មួកដើម្បីកុំឱ្យគាត់ត្រូវខ្យល់ខ្លាំងពេក និងទី២.ជំងឺភ្នែកក្រហមដោយសារដីហុយ។ ហេតុដូចនេះជំងឺទាំងពីរនេះនឹងប្រឈមនឹងការកើនឡើងដែលទាមទារឱ្យបងប្អូនប្រជាពលរដ្ឋចូលរួមការពារ និងទប់ស្កាត់ដើម្បីធ្វើយ៉ាងណាកុំឱ្យកុមារត្រូវធូលីដី និងខ្យល់ច្រើនពេកត្រូវការពារឱ្យបានល្អ។

លោកសាស្ត្រាចារ្យបានបន្តថា ក្រៅពីជំងឺសំខាន់ទាំងពីរនេះប្រជាពលរដ្ឋក៏ត្រូវបន្តយកចិត្តទុកដាក់ការពារចំពោះជំងឺគ្រុនឈាមផងដែរបើទោះបីជាបច្ចុប្បន្នភ្លៀងចាប់ផ្តើមថមថយ ប៉ុន្តែការធ្លាក់ភ្លៀង ក៏នៅមិនដាច់ដែរ។ លោកសាស្ត្រាចារ្យបានបន្ថែមថា « ថ្វីត្បិតតែថាឆ្នាំ២០២៤នេះមិនមានផ្ទុះករណីជំងឺគ្រុនឈាម ដែលក្រសួងសុខាភិបាលបានខិតខំប្រឹងប្រែងទប់ស្កាត់ការងារនេះបាន ប៉ុន្តែក៏សូមប្រជាពលរដ្ឋនៅតែបន្តចូលរួមប្រុងប្រយ័ត្ន ព្រោះមិនទាន់អស់ការធ្លាក់ភ្លៀងនោះទេព្រោះថា ការទប់ស្កាត់ជំងឺគ្រុនឈាម ត្រូវការការសហការពីបងប្អូនប្រជាពលរដ្ឋទាំងអស់គ្នា»។

លោកសាស្រ្តាចារ្យ ញឹប អង្គាបុស្ស បានណែនាំថា ក្នុងករណីប្រជាពលរដ្ឋទាំងអស់ជួបនូវបញ្ហាជំងឺខាងលើនេះ សូមអញ្ជើញមកកាន់មនី្ទរពេទ្យឯកទេសដើម្បីឱ្យគ្រូពេទ្យពិនិត្យ និងព្យាបាលជំងឺកូនចៅរបស់លោកអ្នក​បាន​ទាន់​ពេល​វេលា។

គួរបញ្ជាក់ថា យោងតាមការផ្សាយរបស់ក្រសួងធនធានទឹក និង​ឧតុនិយម ដែលបានអង្កេត ពិនិត្យ និងវិភាគទៅលើស្ថានភាពវិវត្តប្រែប្រួលនៃសីតុណ្ហភាពនៅ​លើ​ផ្ទៃ​មហា​សមុទ្រប៉ាស៊ីហ្វិក ភាគខាងលិច និងមហាសមុទ្រឥណ្ឌា ព្រមទាំងតំបន់អេក្វាទ័រ បានបង្ហាញ​ឱ្យ​ឃើញ​ថា ចាប់ពីខែវិច្ឆិកា ឆ្នាំ២០២៤ ដល់ខែមករា ឆ្នាំ២០២៥ បាតុភូតឡានីញ៉ា (La
Nina) មាន​ប្រមាណ៦០% និងអេនសូ (ENSO) ៤០% តាមសន្ទស្សន៍នេះព្រះរាជាណាចក្រកម្ពុជា នឹង​ទទួលឥទ្ធិពលរបបខ្យល់មូសុងឦសានខ្លាំងដែលនាំមកនូវខ្យល់ត្រជាក់ និងទទួល​របប​ទឹក​ភ្លៀង​មាន​បរិមាណតិចតួច
ហើយនឹងធ្វើឱ្យធាតុអាកាស ចាប់ពីសប្តាហ៍ទីពីរ ខែវិច្ឆិកា ដល់ខែមករា ឆ្នាំ​២០២៥ ចុះត្រជាក់៕

អត្ថបទ៖ សំអឿន