បណ្ឌិត សុខ ទូច ផ្តាំដល់យុវជនដែលកំពុងជ្រើសរើសជំនាញនៅថ្នាក់ឧត្តមសិក្សាត្រូវមើលលើទេពកោសល្យខ្លួនជាមុន

បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានផ្តាំផ្ញើដល់អ្នកសិក្សាដែលទើបតែបញ្ចប់ការសិក្សាថ្នាក់វិទ្យាល័យ ត្រៀមរើសជំនាញសិក្សានៅថ្នាក់ឧត្តមសិក្សាត្រូវមើលលើទេពកោសល្យរបស់ខ្លួនជាមុន មិនថាសិក្សានៅទីណានោះទេក៏មិនសំខាន់ដូចជំនាញដែលខ្លួនមានដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតលើកឡើងបែបនេះ ក្នុងកិច្ចពិភាក្សាយុមូលស្តីពីការជ្រើសរើសមុខជំនាញនៅថ្នាក់ឧត្តមសិក្សា នៅព្រឹកថ្ងៃទី១១ ខែវិច្ឆិកា ឆ្នាំ២០២៤ នៅរាជបណ្ឌិត្យសភាកម្ពុជា។ លោកលើកឡើងថា ចំណេះដឹងដើរតួនាទីសំខាន់ណាស់សម្រាប់មនុស្សគ្រប់រូប ជាមួយគ្នានេះ ការរើសជំនាញសិក្សានៅថ្នាក់ឧត្តមសិក្សាគឺសំខាន់ណាស់ក្នុងការគោរព និងមើលលើទេពកោសល្យរបស់ខ្លួន មិនថារៀននៅសាលាណា ទីណានោះទេ។ ទន្ទឹមនឹងការមើលលើទេពកោសល្យខ្លួន ក៏ត្រូវសម្រេចតាមការស្រឡាញ់លើមុខជំនាញនីមួយៗតាមចិត្តខ្លួនឯងដូចគ្នា ហើយការសិក្សាជំនាញតាមទីផ្សារការងារគឺជារឿងត្រូវគិតក្រោយគេ។

ត្រង់ចំណុចដែលនិស្សិតរើសជំនាញតាមទីផ្សារការងារ បច្ចុប្បន្ន សង្កេតឃើញថា យុវជនភាគច្រើនហាក់មានការបារម្ភច្រើនថាជំនាញដែលខ្លួនស្រឡាញ់អាចមិនមានទីផ្សារការងារធំទូលាយ ពិបាករកការងារធ្វើជាដើម។​ ទាំងអស់នេះ ក៏ជាកត្តាមួយដែលធ្វើឱ្យយុវជនជ្រើសរើសជំនាញសិក្សាមួយដែលខ្លួនមិនមានទេពកោសល្យខាងនោះ រហូតធ្វើឱ្យនិស្សិតមួយចំនួនធ្វើការមិនត្រូវជំនាញក្រោយបញ្ចប់ការសិក្សា ឬមិនមានការងារធ្វើ ព្រោះតែពួកគេមួយចំនួនមិនមានទេពកោសល្យលើជំនាញសិក្សាដែលខ្លួនរើសនេះឯង។

បណ្ឌិត សុខ ទូច បានបញ្ជាក់ថា កាលណាមនុស្សមានទេពកោសល្យនៅក្នុងខ្លួន គឺបុគ្គលនោះរៀនចាប់បានលឿន មិនថាក្នុងការសិក្សា ឬវិស័យការងារឡើយ។ លោកស្នើដល់យុវជនជំនាន់ក្រោយដែលកំពុងរើសជំនាញសិក្សា ប្រសិនជាចង់ទៅមើលសាលាណាមួយ កុំមើលតែភាពទំនើបពីខាងក្រៅរបស់សាលា ត្រូវមើលពីកម្មវិធីសិក្សានៅទីនោះ និងមើលលើគុណភាពគ្រូបង្រៀននៅទីនោះផង។

លោកបណ្ឌិតនិយាយថា៖ “សង្ឈឹមថាប្អូនៗទៅរើសតាមទេពកោសល្យ ទៅរកសាលាកុំទៅតាមគ្នា ទៅមើលកម្មវិធីសិក្សារបស់គេ ទៅមើលកន្លែងរបស់គេ ទៅមើលកន្លែងគេរៀន ទៅមើលគ្រូ នោះជាការជោគជ័យរបស់ប្អូន។ ហើយប្អូនជោគជ័យ ប្អូនមិនបាច់នឹកគុណនរណាទេ ថាខ្ញុំបានផែនទីដើរ ខ្ញុំដើរទៅរកកន្លែងណាដែលខ្ញុំពេញចិត្ត និងមានទេពកោសល្យ”។

នៅក្នុងឱកាសនេះ បណ្ឌិតសភាចារ្យ សុខ ទូច ក៏បានណែនាំដល់អាណាព្យាបាលគ្រប់រូប គួរចាប់អារម្មណ៍ តាមដាន និងយកចិត្តទុកដាក់ខ្ពស់ចំពោះការសិក្សារបស់កូន ព្រមទាំងផ្តល់ជាយុទ្ធសាស្ត្រគាំទ្រលើអ្វីដែលកូនស្រឡាញ់ និងពេញចិត្តផងដែរ៕