បេក្ខជននិទ្ទេស A ៤៧ នាក់ ក្នុងខេត្តកំពង់ស្ពឺ បានជួប និងទទួលរង្វាន់ពី ឯកឧត្តម ហ៊ុន ម៉ានី

សិស្សនិទ្ទេស A ចំនួន ៤៧ នាក់ បានចូលរួមក្នុងពិធីសំណេះសំណាល និងថ្លែងអំណរគុណលោកគ្រូ អ្នកគ្រូស្ម័គ្រចិត្ត និងអបអរសាទរចំពោះសិស្សនិទ្ទេស A នៃខេត្តកំពង់ស្ពឺ ក្រោមអធិបតីភាពឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងារចុះជួយខេត្តកំពង់ស្ពឺ នៅបណ្ណាល័យកំពង់ស្ពឺ នាព្រឹកថ្ងៃទី ១២ ខែវិច្ឆិកា ឆ្នាំ២០២៤។

ពិធីនេះមានការអញ្ជើញចូលរួមពីអភិបាលខេត្តកំពង់ស្ពឺ ក្រុមការងារចុញជួយខេត្ត ក្រុង ប្រធានមន្ទីរអប់រំ យុវជន និងកីឡា ថ្នាក់ដឹកនាំខេត្ត លោកនាយក នាយិកាវិទ្យាល័យទាំង ២៥ លោកគ្រូ អ្នកគ្រូបង្រៀនវគ្គបំប៉នស្ម័គ្រចិត្ត ក្រុមគ្រួសារ ស.ស.យ.ក. និងសិស្សានុសិស្ស សរុបប្រមាណ ៣០០ នាក់។

នាឱកាសនោះ ឯកឧត្តម ហ៊ុន ម៉ានី បានសម្តែងការស្វាគមន៍យ៉ាងកក់ក្តៅចំពោះវត្តមាន លោកគ្រូ អ្នកគ្រូស័្មគ្រចិត្ត  សិស្សនិទ្ទេសAទាំង៤៧ រូបដែលបានអញ្ជើញចូលរួមក្នុងពិធីសំណេះសំណាលនៅព្រឹកនេះ។ ជាមួយគ្នានេះ ឯកឧត្តមបានរំលេចផងដែរថា កម្មពិធីសំណេះសំណាលនាថ្ងៃនេះ គឺបាននាំមកនូវការជួបជុំគ្នាក្នុងនោះមានសិស្ស លោកគ្រូ អ្នកគ្រូ និងឱពុក ម្តាយរបស់សិស្ស។ ឯកឧត្តមបានបន្ថែមថា តួនាទី ភារកិច្ចជាកត្តាមួយ ប៉ុន្តែទំនៀមទម្លាប់នៃការជួបជុំត្រូវតែមាន ដើម្បីបង្កើតទំនាក់ទំនង និងភាពកក់ក្តៅរវាងគ្នា និងគ្នា។

ទន្ទឹមនឹងនេះ ឯកឧត្តមបានមានប្រសាសន៍ថ្លែងអំណរគុណដល់លោកគ្រូ អ្នកគ្រូបង្រៀនវគ្គបំប៉ន ដែលបានខិតខំប្រឹងប្រែង និងលះបង់ពេលវេលាដ៏មានតម្លៃផ្ទាល់ខ្លួន ដើម្បីបង្រៀនសិស្សានុសិស្សបន្ថែម រហូតទទួលបានលទ្ធផលគួរជាទីគាប់ចិត្ត។

 ជាមួយនឹងការអបអរសាទរចំពោះបេក្ខជនដែលដែលទទួលបាននិទេ្ទស A ឯកឧត្តម ក៏បានលើកទឹកចិត្តដល់បេក្ខជនជ័យលាភីឱ្យបន្តចាប់ក្តីស្រមៃ និងខិតខំរៀនសូត្របន្ថែមតាមរយះករសិក្សានៅក្នុងថ្នាក់ រៀនដោយសង្កេតអ្នកជោគជ័យ និងរៀនសូត្រពីបទពិសោធន៍ការងារ ដើម្បីឱ្យការរៀនទាំងនេះក្លាយជាមាគ៌ានាំឆ្ពោះទៅរកភាពជោគជ័យនាពេលអនាគត៕