រាជរដ្ឋាភិបាល សម្រេចទទួលស្គាល់ថ្នាលនិងកម្មវិធី​​រដ្ឋាភិបាលឌីជីថល អភិវឌ្ឍដោយក្រសួងប្រៃសណីយ៍

បើ​តាម​សេចក្តី​ប្រកាស​ព័ត៌មាន​របស់​ក្រសួង​ប្រៃសណីយ៍និងទូរគមនាគមន៍ រាជរដ្ឋាភិបាលបាន​សម្រេចទទួល​​ស្គាល់ថ្នាល​និងកម្មវិធីរដ្ឋាភិបាលឌីជីថល (Digital Government Products – DGPs) ដែល​អភិវឌ្ឍដោយក្រសួង​ប្រៃសណីយ៍​និងទូរគមនាគមន៍ (ក.ប.ទ) ចំនួន ៤ ជា​ថ្នាល​របស់​រាជរដ្ឋាភិបាល ដែល​មានមុខងារនិងអត្ថប្រយោជន៍​សំខាន់ៗ​ជា​ច្រើន​ដល់​អ្នក​ប្រើប្រាស់។

មុនរាជរដ្ឋាភិបាលសម្រេចទទួលស្គាល់ជាថ្នាលនិងកម្មវិធីឌីជីថលរបស់រាជរដ្ឋាភិបាល និង​ឈាន​ដល់​ការ​ដាក់ឱ្យប្រើប្រាស់​​​នេះ​ ថ្នាលនិងកម្មវិធីរដ្ឋាភិបាលឌីជីថល (DGPs) ទាំង ៤ ត្រូវបាន​ត្រួតពិនិត្យ​អនុលោម​ភាព​បច្ចេ​កទេស និង​វិធានសន្តិសុខសាយប័រយ៉ាងតឹងរ៉ឹង ហើយ ក.ប.ទ. ក៏បានចាត់ក្រុមការងារបច្ចេកទេសតាមដាន ត្រួត​ពិនិត្យ និងវាយតម្លៃជាប្រចាំ ដើម្បីធានាបាននូវសន្តិសុខ សុវត្ថិភាព គុណភាព និរន្តរភាព និងជំនឿ​ទុក​ចិត្ត​ខ្ពស់ ព្រម​ទាំងអាច​ចៀសវាងបាន​ពីការវាយ​ប្រហារ​សន្តិសុខ​សាយប័រ​ណា​មួយកើតឡើងជាយថាហេតុ។

ថ្នាលនិងកម្មវិធីរដ្ឋាភិបាលឌីជីថល (DGPs) ចំនួន ៤ ជា​ថ្នាលរបស់រាជរដ្ឋាភិបាល​មានមុខងារ និង​អត្ថប្រយោជន៍​សំខាន់ៗ ដូច​ជា៖

– ថ្នាលផ្ទុកឯកសារសាធារណៈផ្លូវការ GO.GOV.KH៖ ជាថ្នាលផ្ទុកឯកសារសាធារណៈផ្លូវការសម្រាប់ក្រសួង ស្ថាប័នអាចប្រើប្រាស់ក្នុងការផ្សព្វផ្សាយព័ត៌មាន ឬឯកសារជាសាធារណៈ ដែលអាចទប់ស្កាត់ព័ត៌មានឬឯកសារក្លែងក្លាយ ឬតំណភ្ជាប់ឆបោក (Phishing)។

– ថ្នាលបង្កើតទម្រង់បែបបទអនឡាញ FORM.GOV.KH៖ ជាថ្នាលបង្កើតទម្រង់បែបបទអនឡាញ ដើម្បីប្រមូលព័ត៌មាន ការស្ទង់មតិ ត្រួតពិនិត្យ និងវាយតម្លៃ ការចុះឈ្មោះចូលរួមកម្មវិធីនានា ឬការប្រមូលមតិកែលំអនានា ដែលអាចប្រើប្រាស់ជំនួស Google Form ឬ Microsoft Form ជាដើម។ រាល់ទិន្នន័យទាំងអស់ត្រូវបានរក្សាទុកដោយធ្វើ​កូដនីយកម្ម (Encryption) ដោយសោសម្ងាត់ (Secret Key) ដែលមានសុវត្ថិភាពខ្ពស់ ហើយមានតែអ្នកដែលបង្កើត Form នីមួយៗតែប៉ុណ្ណោះ ដែលមានសោសម្ងាត់នោះ ទោះបីអ្នកបង្កើតថ្នាលនេះ ឬអ្នកគ្រប់គ្រងថ្នាលនេះ ក៏មិនអាចមើលទិន្នន័យទាំងនោះបានដែរ។

– ថ្នាលបញ្ជូនសារពហុទិសដៅ NOMSA.GOV.KH៖ ជាថ្នាលបញ្ជូនសារខ្លីជាព័ត៌មាន ឬជាការជូនដំណឹងផ្សេងៗ ដែលអាចប្រើប្រាស់ជំនួស SMS ឬកម្មវិធី Twilio ជាដើម ហើយមានប្រភពដើមច្បាស់លាស់។ ការផ្ញើសារខ្លីតាមរយៈថ្នាលនេះ អាចឱ្យសាធារណជនកត់សម្គាល់ដឹងថា សារខ្លីនេះផ្ញើចេញពីក្រសួង ស្ថាប័ន ឬវិស័យឯកជនណាមួយពិតប្រាកដ ដោយគ្មានការក្លែងបន្លំ និងមានទំនុកចិត្តខ្ពស់។

– កម្មវិធីបញ្ញាសិប្បនិម្មិតបំប្លែងអត្ថបទទៅជាសំឡេងសារិកា “SARIKA”៖ជាកម្មវិធីបញ្ញាសិប្បនិម្មិត ដែលដំណើរការនៅលើបណ្តាញសង្គមតេឡេក្រាម (Telegram Bot) សម្រាប់បំប្លែងអត្ថបទទៅជាសំឡេងភាសាខ្មែរ។ កម្មវិធីនេះអាចប្រើប្រាស់ដើម្បីធ្វើមាតិកានិងផ្សព្វផ្សាយព័ត៌មាន ព្រមទាំងអាចអានឯកសារនានាជាសំឡេងផងដែរ។

ក្រសួង​ប្រៃសណីយ៍និងទូរគមនាគមន៍ បាន​អភិវឌ្ឍថ្នាលនិងកម្មវិធីរដ្ឋាភិបាលឌីជីថល (DGPs) ទាំង ៤ ឡើងដើម្បីជំរុញការចាប់​យកឌីជីថល​ក្នុង​ការផ្តល់​សេវា​សាធារណៈ និង​ការ​បង្កើន​ប្រសិទ្ធភាពការងារ ជំរុញ​ឱ្យមាន​ការចូលរួម​ប្រើប្រាស់ប្រព័ន្ធ​ឌីជីថល។ ជាពិសេស អាចបង្កើន​ទំនុកចិត្តរបស់​ប្រជាពលរដ្ឋទូទៅមក​លើសេវាសាធារណៈតាមប្រព័ន្ធឌីជីថល ស្របតាមក្របខណ្ឌគោលនយោបាយសេដ្ឋកិច្ចនិងសង្គមឌីជីថល ២០២១-២០៣៥ គោលនយោបាយរដ្ឋាភិបាល​ឌីជីថលកម្ពុជា ២០២២-២០៣៥ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ ដែលបានកំណត់យក “បច្ចេកវិទ្យា” ជាពិសេស “បច្ចេកវិទ្យាឌីជីថល” ជាអាទិភាពគន្លឹះទី៥ សម្រាប់ឆ្លើយតបទៅនឹងនិន្នាការនៃបដិវត្តន៍ឧស្សាហកម្ម ៤.០ និងការធ្វើ​បរិវត្តកម្មសេដ្ឋកិច្ចនិងសង្គមឌីជីថលនៅកម្ពុជា៕