ពលរដ្ឋ​ ៦០០ គ្រួសារ ទទួល​បាន​ចង្ក្រានបង្កើន​ថាមពល កាត់បន្ថយ​ប្រើប្រាស់​អុស ចូលរួមថែរក្សា​បរិស្ថាន

ដើម្បីចូលរួមកាត់បន្ថយការបំពុលបរិស្ថានជាមួយរាជរដ្ឋាភិបាលកម្ពុជា ក្រុមហ៊ុនចិន  Guangzhou Iceberg Environmental Consulting Services ដែលមានមូលដ្ឋាននៅសាធារណៈរដ្ឋប្រជាមានិចិន តាមរយៈបណ្តាញសង្គមស៊ីវិលកម្ពុជា (CCN) ដែលមានលោក សាខុន ប៉ូរិន ជាប្រធាន បាននាំយកចង្ក្រានបង្កើនថាមពល មកចែកជូនប្រជាពលរដ្ឋ ៦០០គ្រួសារ រស់នៅក្នុងឃុំកន្ទួត ស្រុកចិត្របុរី ខេត្តក្រចេះ ដើម្បីជួយសម្រួលបន្ទុកក្នុងគ្រួសារ។

តាមការបញ្ជាក់ពីលោក សាខុន ប៉ូរិន ប្រធានបណ្តាញសង្គមស៊ីវិលកម្ពុជា បានឲ្យកម្ពុជាថ្មី ដឹងថា គម្រោងប្រើប្រាស់ចង្ក្រានព្រៃមាន់ បានចូលរួមកាត់បន្ថយការបំពុលបរិស្ថាន ដោយក្រុមហ៊ុនចិនមួយនេះ គឺផ្តោតសំខាន់ទៅលើភាពបៃតងនៅលើផែនដី និងមានសកម្មភាពក្នុងការជួយកាត់បន្ថយភាពក្រីក្រ និងចូលរួមការកាត់បន្ថយការបំភាយកាបូនចូលក្នុងបរិយាកាស។ ចង្ក្រាននេះ ត្រូវបានផលិតឡើងដោយសិប្បកម្មឈ្មោះ ព្រៃមាន់ ដែលមានមូលដ្ឋាននៅខេត្តកំពង់ឆ្នាំង និងមានកម្មករជាអ្នកពិការភាពមួយចំនួនផងដែរ។

លោកបញ្ជាក់បន្ថែមថា ចង្ក្រាននេះ មិនត្រឹមតែជួយលើកសម្រស់ផ្ទះបាយ និងលើកកម្ពស់ជីវភាពរបស់ប្រជាជនប៉ុណ្ណោះទេ ថែមទាំងបានចូលរួមចំណែក ជាមួយសហគមន៍អន្តរជាតិនៅក្នុងការកាត់បន្ថយការបំភាយកាបូនចូលទៅក្នុងបរិយាកាស និងជំរុញបៃតងភាពជុំវិញផ្ទះ និងសហគមន៍ឱ្យកាន់តែល្អប្រសើរថែមទៀតផង។ ជំនួយចង្ក្រានព្រៃមាន់ គឺមានលក្ខណៈបច្ចេកទេសក្នុងការកាត់បន្ថយសដល់ការប្រើប្រាស់បរិមាណ អុស និងការបំភាយកាបូនក្នុងកំរិតមួយទាប ចូលទៅក្នុងបរិយាកាស។

លើសពីនេះទៅទៀត ចង្ក្រាននេះ ក៏មានការពិសោធន៍ចេញពីវិទ្យាស្ថានបច្ចេកវិទ្យាកម្ពុជាផងដែរ ក្នុងការផលិតយ៉ាងណាឱ្យមានគុណភាព និងការបំភាយកាបូនក្នុងកំរិតទាប៕

អត្ថបទ៖ ប្រុញ វិធិន