ព័ត៌មានជាតិ

អូស្ត្រាលី គ្រោងនឹងបើកសាលាបណ្ដុះបណ្ដាលយានយន្តដ៏ទំនើប នៅកម្ពុជា

បានផុស

១ year មុន

នៅ

ថ្ងៃពុធ ២៧ វិច្ឆិកា ២០២៤

ដោយ

វិទ្យាស្ថាន Bendigo Kangan នៃប្រទេសអូស្ត្រាលី ដែលមានអាយុកាល ១៥០ ឆ្នាំ និងមានកេរ្តិ៍ឈ្មោះល្បីផ្នែកខាងយានយន្ត គ្រោងនឹងបើកសាខារបស់ខ្លួននៅក្នុងវិទ្យាស្ថានពហុបច្ចេកទេសព្រះកុសុមៈ ដើម្បីបណ្ដុះបណ្ដាលវិស័យរថយន្ត និងរថយន្តប្រើអគ្គិសនីដល់យុវជនកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងបើកសាខាបណ្ដុះបណ្ដាលយានយន្តនេះ បន្ទាប់ពីវិទ្យាស្ថាន Bendigo Kangan នៃប្រទេសអូស្ត្រាលី បានចុះហត្ថលេខាលើអនុស្សរណៈ នៃការយោគយល់គ្នា ស្តីពីកិច្ចសហប្រតិបត្តិការកសាងផ្លូវសិក្សាជំនាញពេញមួយជីវិតក្នុងវិស័យរថយន្តអគ្គិសនី និងវិស័យពាក់ព័ន្ធនានាជាមួយក្រសួងការងារ និងបណ្ដុះបណ្ដាលវិជ្ជាជីវៈ កាលពីព្រឹកថ្ងៃទី ២៧ ខែវិច្ឆិកា ឆ្នាំ ២០២៤ នៅទីស្ដីការក្រសួង។

ថ្លែងប្រាប់អ្នកសារព័ត៌មានក្រោយចុះហត្ថលេខាលើអនុស្សរណៈ នៃការយោគយល់គ្នា លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា អនុស្សរណៈនេះមានរយៈពេល ៥ ឆ្នាំ ដោយវិទ្យាស្ថាន នឹងបើកសាខាមួយនៅក្នុងវិទ្យាស្ថានពហុបច្ចេកទេសព្រះកុសុមៈ ដើម្បីបណ្ដុះបណ្ដាលលើជំនាញយានយន្តប្រើសាំង ម៉ាស៊ូត និងប្រើអគ្គិសនីដល់យុវជនកម្ពុជាចាប់ពីកម្រិតវិញ្ញាបនបត្ររហូតដល់បរិញ្ញាបត្រ ហើយពេលសិស្សរៀនចប់មិនត្រឹមតែទទួលបានគុណភាពដែលអាចស្វែងរកការងារធ្វើក្នុងវិស័យយានយន្តក្នុងស្រុកប៉ុណ្ណោះទេ អាចមានការផ្លាស់ប្ដូរបន្តការសិក្សា ឬបន្តឱកាសការងារខាងផ្នែកយានយន្តនេះនៅអូស្ត្រាលីផងដែរ។

លោករដ្ឋមន្ត្រី បានបន្តទៀតថា ការបើកសាលាបណ្ដុះបណ្ដាលរថយន្តទំនើបនៅកម្ពុជា នឹងធ្វើឱ្យកម្ពុជាមានលទ្ធភាពផ្ដល់ធនធានមនុស្សមានគុណភាពសម្រាប់ពង្រីកវិស័យយានយន្តនៅកម្ពុជា ខណៈបច្ចុប្បន្នវិស័យយានយន្តនេះជាវិស័យមួយដែលរាជរដ្ឋាភិបាលកម្ពុជាក៏កំពុងយកចិត្តទុកដាក់ ពិសេស សម្ដេចនាយករដ្ឋមន្ត្រី បានប្រកាសថា ក្រុមហ៊ុនរថយន្តធំៗ នៅកម្ពុជា នឹងពង្រីកចង្វាក់ផលិតកម្មរបស់ខ្លួន។ លោករដ្ឋមន្ត្រី បានបន្ថែមថា «ដូច្នេះវត្តមានវិទ្យាស្ថាននេះចំពេលតែម្ដង»។

លោករដ្ឋមន្ត្រី បានអរគុណដល់រដ្ឋាភិបាលអូស្ត្រាលី និងវិទ្យាស្ថាន Bendigo Kangan ដែលបានជ្រើសរើសកម្ពុជាក្នុងការពង្រីកវិសាលភាពរបស់ខ្លួន និងផ្ដល់ការបណ្ដុះបណ្ដាលប្រកបដោយគុណភាពសម្រាប់យុវសិស្សកម្ពុជា ព្រោះថាវិទ្យាស្ថាននេះ មានអាយុកាល ១៥០ ឆ្នាំ មានកេរ្តិ៍ឈ្មោះល្បីផ្នែកខាងយានយន្ត សំណង់ និងផ្នែកផ្សេងៗ ទៀត ហើយនៅពេលគម្រោងនេះទទួលបានជោគជ័យ ក្រសួង នឹងបន្តសហការលើវិស័យផ្សេងៗ ទៀតផងដែរ។

លោកស្រី សលលី ឃូថែន (Sally Curtain) នាយិកាប្រតិបត្តិ នៃវិទ្យាស្ថាន Bendigo Kangan នៃប្រទេសអូស្ត្រាលី បានសម្តែងការពេញចិត្តចំពោះកិច្ចសហប្រតិបត្តិការក្នុងភាពជាដៃគូជាមួយវិទ្យាស្ថានបច្ចេកទេស TVET នៅកម្ពុជា ក្នុងការផ្តល់នូវការបណ្ដុះបណ្ដាលបច្ចេកទេសយានយន្ត ដល់ប្រជាជនកម្ពុជា។

លោកស្រី ជឿជាក់ថា តាមរយៈបទពិសោធក្នុងការបណ្ដុះបណ្ដាលរបស់វិទ្យាស្ថាន Bendigo Kangan នៃប្រទេសអូស្ត្រាលី នឹងអាចសហការបានយ៉ាងល្អជាមួយវិទ្យាស្ថានបច្ចេកទេស TVET នៅកម្ពុជា ក្នុងការលើកកម្ពស់គុណភាពកាន់តែប្រសើរក្នុងការបណ្ដុះបណ្ដាលបច្ចេកទេសយានយន្តនៅកម្ពុជា៕

អត្ថបទ ៖ សំអឿន