កម្មវិធីជ័យលាភីអមតៈឆ្នាំ២០២៤  នាំមកនូវភាពរស់រវើកនៃសិល្បៈ និងការបង្ហាញបែបច្នៃប្រឌិត​នៅកម្ពុជា

អង្គការសិល្បៈខ្មែរអមតៈ កាលពីថ្ងៃទី០៤ ខែធ្នូ ឆ្នាំ ២០២៤ បានប្រារព្ធកម្មវិធី «ជ័យលាភីអមតៈ ប្រចាំឆ្នាំ២០២៤»  ដែលជាកម្មវិធីដ៏ពិសេសមួយធ្វើឡើងដើម្បីអបអរភាពជោគជ័យនៃអ្នកទទួលបានអាហារូបករណ៍ និងអ្នកទទួលបានមូលនិធិក្នុងឆ្នាំ ២០២៤ និងឆ្នាំ២០២៥។

បង្កើតឡើងដំបូងក្នុងឆ្នាំ ២០២២  កម្មវិធីជ័យលាភីអមតៈ បានក្លាយជាវេទិកាសំខាន់មួយដែលអង្គការសិល្បៈខ្មែរអមតៈរៀបចំឡើង ក្នុងគោលបំណងទទួលស្គាល់ដល់ការរួមចំណែកដ៏សំខាន់របស់សិល្បករ និងអ្នកបម្រើការក្នុងវិស័យសិល្បៈវប្បធម៌កម្ពុជា។ កម្មវិធីនេះក៏ជាឱកាសសម្រាប់ការជួបជុំ រវាងអ្នកផ្ដល់ជំនួយ ក្រសួង ដៃគូសហការ សហគមន៍សិល្បៈ និងភាគីពាក់ព័ន្ធនានា។

កញ្ញា យ៉ុន សុខខន នាយិកាកម្មវិធី នៃអង្គការសិល្បៈខ្មែរអមតៈ បានលើកឡើងថា៖ “កម្មវិធីជ័យលាភីអមតៈមិនត្រឹម តែជាឱកាសដើម្បីអបអរសាទរអ្នកទទួលជ័យលាភីប៉ុណ្ណោះទេ ប៉ុន្តែថែមទាំងជាសក្ខីភាពចំពោះភាពច្នៃប្រតិដ្ឋ ការលះបង់ និងភាពរឹងមាំរបស់សិល្បករ និងប្រតិបត្តិករសិល្បៈវប្បធម៌នៅកម្ពុជា។ តាមរយៈកម្មវិធីជ័យលាភីអមតៈប្រចាំឆ្នាំ ២០២៤ នេះ យើងបានបង្ហាញនូវការទទួលស្គាល់នៃការរួមចំណែកដ៏អស្ចារ្យរបស់ពួកគេ និងបញ្ជាក់ជាថ្មីនូវការប្តេជ្ញាចិត្តរបស់យើងក្នុងការចូលរួមពង្រឹងវិស័យសិល្បៈវប្បធម៌កម្ពុជា ដោយធានាបានថាយើងនឹងនៅតែបន្តញុំាងចិត្តយុវជនជំនាន់ក្រោយ ហើយជំរុញឱ្យវិស័យនេះកាន់តែរីកចម្រើន។”

កញ្ញា បន្តថា កម្មវិធីនេះ ក៏នឹងបង្ហាញជូននូវការសម្តែងស្នាដៃសិល្បៈមួយចំនួនដែលជាសុទ្ធសឹងជាស្នាដៃច្នៃប្រតិដ្ឋ និងស្នាដៃបង្កើតថ្មីដែលទទួលបានការគាំទ្រពី អង្គការសិល្បៈខ្មែរអមតៈ តាមរយៈកម្មវិធីមូលនិធិនានា។ ជាពិសេស កម្មវិធីនេះនឹងមានការប្រគល់វិញ្ញាបនបត្រជ័យលាភីជូនអ្នកទទួលបានអាហារូបករណ៍ និងអ្នកទទួលបានមូលនិធិឆ្នាំ ២០២៤ និងឆ្នាំ២០២៥។

ក្រៅពីនេះ កម្មវិធីនេះ បានបង្ហាញពីសមិទ្ធផលនៃកិច្ចខិតខំប្រឹងប្រែងរបស់អង្គការសិល្បៈខ្មែរអមតៈក្នុងការពង្រឹងសហគមន៍សិល្បៈច្នៃប្រតិដ្ឋ និងការចូលរួមអភិវឌ្ឍប្រព័ន្ធអេកូសិល្បៈកម្ពុជា ផងដែរ។

អ្វីដែលកាន់តែពិសេស កម្មវិធីនេះ ក៏បាននាំមកនូវការសម្តែងសិល្បៈ និងការចែករំលែករឿងរ៉ាវដែលបង្ហាញពីភាពរឹងមាំ និងទេពកោសល្យរបស់សហគមន៍ច្នៃប្រតិដ្ឋកម្ពុជា។ កម្មវិធីជ័យលាភីអមតៈ ជាការរំលឹកដ៏មានឥទ្ធិពលមួយអំពីតួនាទីដ៏សំខាន់របស់សិល្បៈក្នុងសង្គម និងការលើកកម្ពស់កេរដំណែលវប្បធម៌របស់កម្ពុជា៕