កម្ពុជា នឹងរៀបចំព្រឹត្តិការណ៍បាល់ទាត់មិត្តភាពកម្ពុជា-ថៃ ដើម្បីអបអរសាទរខួបអនុស្សាវរីយ៍លើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ

រាជរដ្ឋាភិបាលកម្ពុជា គ្រោងនឹងរៀបចំព្រឹត្តិការណ៍បាល់ទាត់មិត្តភាពរវាងព្រះរាជាណាចក្រកម្ពុជា និងព្រះរាជាណាចក្រថៃ ដើម្បីអបអរសាទរខួបអនុស្សាវរីយ៍លើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ ដោយមានការចូលរួមពីក្រុមតារា និងក្រុមកីឡាករប្រដាល់នៃប្រទេសទាំងពីរ។

ការរៀបចំព្រឹត្តិការណ៍បាល់ទាត់មិត្តភាពរវាងប្រទេសទាំងពីរនេះ បន្ទាប់ពីប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឯកភាពលើសំណើរបស់សហព័ន្ធប្រដាល់គុណខ្មែរ​ កាលពីថ្ងៃទី១៩ ខែវិច្ឆិកា ឆ្នាំ២០២៤។

យោងតាមលិខិតជូនដំណឹងរបស់រដ្ឋលេខាធិការទីស្ដីការគណរដ្ឋមន្ត្រីដែលគោរពជូនរដ្ឋមន្ត្រីក្រសួងការបរទេស រដ្ឋមន្ត្រីក្រសួងអប់រំ យុវជននិងកីឡា និងប្រធានសហព័ន្ធប្រដាល់គុណខ្មែរ កាលពីថ្ងៃទី១៩វិច្ឆិកា កន្លងទៅបានឲ្យដឹងថា ក្រុមកីឡាករបាល់ទាត់ដែលត្រូវចូលរួមប្រកួតក្នុងព្រឹត្តិការណ៍នេះ គឺក្រុមតារានៃព្រះរាជាណាចក្រកម្ពុជា ជួបប្រកួតជាមួយក្រុមតារានៃព្រះរាជាណាចក្រថៃ ចំណែកក្រុមកីឡាករប្រដាល់គុណខ្មែរ ត្រូវជួបប្រកួតជាមួយក្រុមបាល់ទាត់ MUAYTHAI ដែលនឹងគ្រោងធ្វើឡើងនៅអំឡុងខែមីនា ឆ្នាំ២០២៥ នៅពហុកីឡដ្ឋានមរតកតេជោ រាជធានីភ្នំពេញ។

តាមសេចក្ដីជូនដំណឹង ការរៀបចំព្រឹត្តិការណ៍បាល់ទាត់មិត្តភាពរវាងកម្ពុជា ថៃ នេះ ធ្វើឡើងក្រោមការសម្របសម្រួលរបស់លោកបណ្ឌិត ស៊ីផាឆៃ វីរៈភូជុង នាយកប្រតិបត្តិនៃទូរទស្សន៍ប៉ុស្តិ៍លេខ៥ និងជាម្ចាស់សណ្ឋាគារ សូហ្វីតែលភ្នំពេញ ជួយសម្របសម្រួលការងារជាមួយភាគីថៃ ដោយសហការជាមួយក្រសួង ស្ថាប័ន និងសមត្ថកិច្ចពាក់ព័ន្ធ និងទទួលបន្ទុកលើការចំណាយ ការធ្វើដំណើរ ការស្នាក់នៅ និងការហូបចុករបស់ប្រតិភូកីឡាករថៃ៕