ផ្លូវ​លំ​មួយ​ខ្សែ​នៅ​ឃុំដា​ខេត្តក្រចេះ នឹង​ប្រែក្លាយ​ជា​​ផ្លូវ​បេតុង​​ ​ចំណាយ​ថវិកាសាងសង់​ប្រមាណ ៣០០ លាន​រៀល

រដ្ឋបាលឃុំដារ និងក្រុមការងារបច្ចេកទេសថ្នាក់ខេត្ត ស្រុក បាន​ចុះសិក្សាផ្លូវលំមួយខ្សែស្ថិតនៅភូមិខ្សារ ឃុំដារ ស្រុកចិត្របុរី ខេត្តក្រចេះ និងគ្រោង​បើក​ការដ្ឋាន​ស្ថាបនាសាងសង់ទៅជាផ្លូវបេតុងអាមេ មានប្រវែង ១២០០ ម៉ែត្រ (១.២Km) ទទឹង ៦ម៉ែត្រ ដែលជាគម្រោងអភិវឌ្ឍន៍មូលនិធិឃុំឆ្នាំ ២០២៥។

តាមការបញ្ជាក់ពីលោក ឈាង វត មេឃុំដារ បានឲ្យកម្ពុជាថ្មី នៅថ្ងៃទី១៤ ខែមករា នេះថា គម្រោងសាងសង់ផ្លូវបេតុងអាមេមួយខ្សែនេះ នឹងផ្ដល់ផលប្រយោជន៍និងសម្រួលការធ្វើដំណើររបស់បងប្អូនប្រជាពលរដ្ឋ។ ជាពិសេសកាត់បន្ថយ​ផល​ប៉ះពាល់សុខភាពដល់សិស្សសាលាខ្សារ ដោយមិនមានដីហុយចូលសាលា ក៏​ដូចជា​ជួយសម្រួលការធ្វើដំណើររបស់ប្រជាពលរដ្ឋចំនួនពីរភូមិ ដែល​មានប្រជាពលរដ្ឋជាង ៦០០គ្រួសារ គឺភូមិខ្សារ និងភូមិសេរីភាព។

បន្ថែមពីនេះ គម្រោង​​ប្រែក្លាយពី​ផ្លូវ​ដី​ទៅ​ជា​ផ្លូវ​បេតុងនេះ ក៏​នឹង​បង្កភាព​ងាយស្រួលដល់ការ​ធ្វើដំណើរឆ្លងកាត់ និងដឹកជញ្ជូនកសិផល និងដោះដូរទំនេញផ្សេងៗ និង​ជួយបង្កើនសោភណ្ឌភាពផ្លូវលំជនបទប្រែក្លាយជាផ្លូវដូចទីក្រុងប្រជុំជន បម្រើ​ដល់​ប្រយោជន៍រួមរបស់ប្រជាពលរដ្ឋ។

បើតាមមេឃុំ​ដា គម្រោងផ្លូវបេតុងអាមេនេះ នឹងចាប់ផ្ដើមស្ថាបនាសាងសង់នៅខែមិនា ឆ្នាំ២០២៥ ដោយគ្រោងចំណាយថវិកា ៣០០លានរៀល ជាគម្រោងអភិវឌ្ឍន៍មូលនិធិឃុំឆ្នាំ ២០២៥៕

អត្ថបទ៖ ប្រុញ វិធិន