ប្រតិភូខេត្តចំនួន ៦ នៃកម្ពុជា ជួបពិភាក្សាជាមួយ​ថ្នាក់ដឹកនាំខេត្តប៊ិញភឿក ដើម្បីបង្កើន​​កិច្ច​សហការ​ប្រតិបត្តិការ​ខេត្ត​ជាប់ព្រំដែន

គណៈប្រតិភូខេត្តចំនួន ៦ រួមមាន ខេត្តក្រចេះ ស្ទឹងត្រែង មណ្ឌលគិរី ត្បូងឃ្មុំ កំពង់ចាម និងខេត្តកំពង់ធំ នៃព្រះរាជាណាចក្រកម្ពុជា កាលពី​ថ្ងៃទី១៩ ខែមករា ឆ្នាំ២០២៥ បានចូលជួបពិភាក្សា និងសម្តែងនូវការ អបអរសាទរជាមួយ​ថ្នាក់ដឹកនាំបក្សរដ្ឋ កងកម្លាំងប្រដាប់អាវុធ បុគ្គលិក កម្មករ និងប្រជាជន ខេត្តប៊ិញភឿក ក្នុងឱកាសបុណ្យចូលឆ្នាំថ្មី ប្រពៃណីជាតិវៀតណាម និងដើម្បីបង្កើននូវ ចំណងមិត្តភាព លើសហប្រតិបត្តិការដៃគូរអភិវឌ្ឍន៍ ខេត្តជាប់ព្រំដែនរវាងកម្ពុជា-វៀតណាម។

ក្នុងឱកាសនោះ លោក វ៉ា ថន អភិបាលខេត្តក្រចេះ តំណាងឲ្យគណៈប្រតិភូខេត្តចំនួន ៦ របស់ប្រទេសកម្ពុជា បានសម្តែង​នូវការអបអរសាទរជូនចំពោះលោកស្រី តុន ង៉ុកហាញ់ សមាជិកបម្រុងនៃគណៈកម្មាធិការមជ្ឈិមបក្ស និងជាលេខាគណៈកម្មាធិការបក្សខេត្តប៊ិញភឿក នៃសាធារណរដ្ឋសង្គមនិយមវៀតណាម ដែលត្រូវបានគណៈកម្មាធិការមជ្ឈឹមបក្សផ្តល់សេចក្តីទុកចិត្តគាំទ្រ និងតែងតាំងជាលេខាគណៈកម្មាធិការបក្សខេត្ត ប៊ិញភឿក រួមនិងលោកស្រី ត្រើន ទ្វេហៀន អនុលេខាគណៈកម្មាធិការបក្សខេត្ត និងប្រធានគណៈកម្មាធិការប្រជាជនខេត្តប៊ិញភឿក ស្របពេលនិងឱកាសបុណ្យចូលឆ្នាំថ្មី ប្រពៃណីជាតិវៀតណាមផងដែរ។

លោក វ៉ា ថន បាន​បញ្ជាក់ថា តាមរយៈការពង្រឹង និងពង្រីកកិច្ចសហប្រតិបត្តិការរវាងបណ្តាខេត្តនៃប្រទេសទាំងពីរគឺធ្វើឡើងដើម្បីរួមចំណែកដល់ការលើកកម្ពស់ជីវភាពរស់នៅរបស់ប្រជាជន​ប្រទេស​ទាំងពីរ។

ជាមួយគ្នានេះ ខេត្តជាប់ព្រំដែន នៃប្រទេសទាំងពីរ កាន់តែពង្រឹងពង្រីកកិច្ចសហប្រតិបត្តិការ ទំនាក់ទំនងរក្សាបាននូវសន្តិសុខសណ្តាប់ធ្នាប់សាធារណៈ និងសុវត្ថិភាពនៅតាមតំបន់ព្រំដែន សំដៅការគ្រប់គ្រង ការបង្ការ ទប់ស្កាត់ និងបង្ក្រាប បទល្មើសខុសច្បាប់ ការឆ្លងដែន ដោយខុសច្បាប់ ការលើកកម្ពស់កិច្ចសហប្រតិបត្តិការក្នុងការផ្លាស់ប្តូរ ទំនិញកសិផល គ្រឿងឧបភោគ បរិភោគនៅតាមច្រកទ្វារព្រំដែន៕

អត្ថបទ ប្រុញ វិធិន