លទ្ធផល​បូក​សរុប​ក្នុងឆ្នាំ២០២៤ ​សមត្ថកិច្ច​បង្ក្រាប​បទល្មើស​ព្រហទណ្ឌ​បាន​ជាង៤០០ករណី និង ឃាត់ខ្លួន​ជិត៧០០នាក់

នៅក្នុងឆ្នាំ២០២៤កន្លងមកនេះ នៅ​រាជធានីភ្នំពេញ បង្ក្រាបបទល្មើសព្រហ្មទណ្ឌបានជាង៤០០ករណី ឃាត់ខ្លួនជិត៧០០នាក់ បង្ក្រាប​ក្មេងទំនើងបានជិត៧០០ករណី ឃាត់​ខ្លួន ជាង១០០០នាក់ ជាមួយនិងការបង្ក្រាបបទល្មើសគ្រឿងញៀនបានជាង១០០០ករណី ឃាត់ខ្លួន ជាង២០០០នាក់។

តាមរបាយការណ៍ស្តីពីការបូកសរុបលទ្ធផលការងារប្រចាំឆ្នាំ២០២៤ ដែល​បាន​បង្ហាញ​នៅ​ក្នុង​ពីធីបើកសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ នៅសណ្ឋាគាររ៉េស៊ីដង់សុខាភ្នំពេញនាថ្ងៃទី២១ ខែមករា ឆ្នាំ២០២៥នេះបានឱ្យដឹងថា ក្នុងរយៈពេលពេញមួយឆ្នាំ២០២៤នេះ នៅរាជធានីភ្នំពេញបង្ក្រាបបទល្មើសព្រហ្មទណ្ឌបាន ៤៣៩ករណី ឃាត់ខ្លួន ៦៨៥នាក់ បង្ក្រាបក្មេងទំនើងបាន ៦៩៥ករណី ឃាត់ខ្លួន ១.៤១៥នាក់ (ស្រី ៦១នាក់)

បង្ក្រាបបទល្មើសគ្រឿងញៀនបាន ១.៤០៦ករណី ឃាត់ខ្លួន ២.៥៨៣នាក់។ បង្ក្រាបល្បែងស៊ីសងខុសច្បាប់ ៧៤ករណី ឃាត់ខ្លួន ៣៨០នាក់ (ស្រី ៧១នាក់)។ចំពោះការងារប្រឆាំងជួញដូរមនុស្ស និងការពារអនីតិជន៖ បង្ក្រាបបាន ១០ករណី ឃាត់ខ្លួន ១៣នាក់ (ស្រី ៤នាក់)។ បង្ក្រាបបទល្មើសសេដ្ឋកិច្ចចំនួន ២៦ករណី ឃាត់ខ្លួន ៣នាក់ (ស្រី ១នាក់)។

គ្រោះអគ្គិភ័យកើតមាន ១៣៦លើក (ស្លាប់ ៣នាក់, របួស ៤នាក់)។ចំណែកគ្រោះថ្នាក់ចរាចរណ៍វិញបានកើតមាន ៨៩៧លើក (ស្លាប់ ២៧៨នាក់, របួស ១.២១៥នាក់), ខូចខាត យានយន្តសរុប ៤៩៩គ្រឿង, ម៉ូតូ ៩៨៤គ្រឿង, ម៉ូតូកង់បី ៤៥គ្រឿង, រ៉ឺម៉ក ៣៤គ្រឿង, កង់ ១៨គ្រឿង និងយានផ្សេងៗ ២គ្រឿង។បានធ្វើការត្រួតពិនិត្យ និងអប់រំយានយន្ដល្មើសច្បាប់ចរាចរណ៍ផ្លូវគោកបានចំនួន ១៣.០៤៨គ្រឿង។បានរៀបចំសណ្តាប់ធ្នាប់ និងអប់រំអ្នកលក់ដូរចំនួន ៨.១៤១កន្លែង។បានត្រួតពិនិត្យអាវុធគ្រឿងផ្ទុះតាមដងផ្លូវសាធារណៈចំនួន ៥៤៧លើក មានអាវុធឆ្លងកាត់ ចំនួន ៣៨ដើម មានលិខិតស្នាមប្រើប្រាស់ត្រឹមត្រូវចំនួន ៣៧ដើម និងខុសច្បាប់ ១ដើម៕

ដោយ ៖ ស្រីរ័ត្ន