លោក​ ធន់ វឌ្ឍនា៖ ការធ្វើវេទិការបស់ព្រឹទ្ធសភា គឺផ្ដល់ព័ត៌មានពិតដល់មូលដ្ឋាន ដើម្បីបន្សាបព័ត៌មានក្លែងក្លាយ

ការរៀបចំធ្វើវេទិការផ្សព្វផ្សាយរបស់ព្រឹទ្ធសភាតាមមូលដ្ឋាន ជាការផ្សាភ្ជាប់រវាងស្ថាប័នសភា និងអាជ្ញាធរសាធារណៈ​នៃរាជរដ្ឋាភិបាល ពិសេសគឺផ្ដល់ឱ្យនូវព័ត៌មានពិតដល់ប្រជាពលរដ្ឋជាម្ចាស់ឆ្នោត ដើម្បីទៅបន្សាបព័ត៌មានក្លែងក្លាយ ដែលបង្កឡើងដោយជនខ្លះក្នុងបំណងបំពុលសង្គម។ នេះជាការលើកឡើងរបស់អនុប្រធានទី២ ព្រឹទ្ធសភា លោកបណ្ឌិត ធន់ វឌ្ឍនា។

លោកបណ្ឌិត ធន់ វឌ្ឍនា បានគូសបញ្ជាក់ថា ការរៀបចំធ្វើវេទិកាផ្សព្វផ្សាយ គឺពិតជាមានសារសំខាន់ណាស់ ព្រោះថា ជាការចែករំលែកព័ត៌មាន និងផ្សាភ្ជាប់រវាងអង្គនីតិបញ្ញត្តិ និងអង្គនីតិប្រតិបត្តិ និងជាពិសេសជាការផ្សព្វផ្សាយចំណេះដឹង និងព័ត៌មានពិត ដើម្បីទៅបន្សាបព័ត៌មានមិនពិត ដែលធ្វើឱ្យមានចលាចលសង្គម។ ម្យ៉ាង ក៏ជាការបំពេញមុខងារតំណាងក្នុងការផ្សព្វផ្សាយព័ត៌មានទៅដល់ប្រជាជនតាមប្រព័ន្ធផ្សព្វផ្សាយដែរ។

ការលើកឡើងដូច្នេះរបស់អនុប្រធានទី២ ព្រឹទ្ធសភា បានធ្វើឡើងក្នុងឱកាសលោកដឹកនាំកិច្ចប្រជុំពិភាក្សាការងារជាមួយគណៈកម្មការជំនាញទាំង១០ នៃព្រឹទ្ធសភា ប្រធានក្រុមសមាជិកព្រឹទ្ធសភាប្រចាំភូមិភាគទាំង៨ និងប្រធានគណៈកម្មការក្រមសីលធម៌សភារបស់សមាជិកព្រឹទ្ធសភា កាលពីនារសៀលថ្ងៃទី៣ ខែកុម្ភៈ ឆ្នាំ២០២៥។ កិច្ចប្រជុំនេះ បានផ្ដោតការពិភាក្សាលើការរៀបចំវេទិកាពាក់ព័ន្ធនឹងវិស័យផ្សេងៗ ការរៀបចំផែនការប្រចាំឆ្នាំ ប្រចាំនីតិកាល និងបញ្ហាផ្សេងៗ។

ដោយនីតិកាលនេះ ទាំងរដ្ឋសភា និងព្រឹទ្ធសភា បានដាក់ចេញអាទិភាពលើមុខងារតំណាង ដែលតម្រូវឱ្យសមាជិកសភាផ្សាភ្ជាប់ជាមួយមូលដ្ឋាន និងអង្គបោះឆ្នោតជាប់ជាប្រចាំនោះ លោកបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានជំរុញឱ្យគណៈកម្មការ និងក្រុមនីមួយៗ គួររៀបចំវេទិកាផ្សព្វផ្សាយក្នុងមួយឆ្នាំឱ្យបានម្ដង ដោយត្រូវគិតគូពីប្រធានបទ សមាសភាពចូលរួម ពេលវេលារៀបចំ និងការស្វែងរកថវិកា​ ព្រមទាំងដៃគូគាំទ្រ។

វិស័យអាទិភាពមួយចំនួនដែលអង្គប្រជុំបានលើកឡើង គឺមានបញ្ហាសិទ្ធិមនុស្ស ទំនើបកម្មបច្ចេកវិទ្យា បញ្ហាបញ្ញាសិប្បនិម្មិត AI ព័ត៌មានក្លែងក្លាយ និងបញ្ហាតម្លៃទីផ្សាកសិកម្ម ជាដើម ដែលបញ្ហាទាំងនេះ បាននិងកំពុងក្លាយជាប្រធានបទក្ដៅ នាពេលបច្ចុប្បន្ន។

កិច្ចប្រជុំខាងលើ ក៏បានពិភាក្សាពីការត្រៀមខ្លួនសម្រាប់ការរៀបចំសមាជរដ្ឋសភា និងព្រឹទ្ធសភា នាពេលខាងមុខផងដែរ ដែលក្នុងនោះ លោកអនុប្រធានទី២ ព្រឹទ្ធសភា ថា ការងារស្រាវជ្រាវ និងប្រមូលព័ត៌មាន គឺជាការងារសំខាន់ ដើម្បីចូលរួមយោបល់ និងអនុសាសន៍ ប្រកបដោយប្រសិទ្ធភាព និងស័ក្តសិទ្ធភាពខ្ពស់៕

ដោយ៖ ធឿន វ៉ាន់សុង