ព័ត៌មានជាតិ

ប.ស.ស អំពាវនាវពលរដ្ឋបង្កើនការប្រុងប្រយ័ត្នខ្ពស់ ជៀសវាងចាញ់បោកជនបោកប្រាស់ក្លែងបន្លំលិខិតផ្សេងៗ

បានផុស

១ year មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

បេឡាជាតិសន្តិសុខសង្គម(ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ២៤ ខែកុម្ភៈ ឆ្នាំ ២០២៥ នេះ បានធ្វើការអំពាវនាវដល់ប្រជាពលរដ្ឋ ពិសេសសមាជិកប.ស.ស. ត្រូវបង្កើនការប្រុងប្រយ័ត្នខ្ពស់ ជៀសវាងការចាញ់បោកជនឆបោកដែលតែងតែធ្វើលិខិតក្លែងបន្លំផ្សេងៗ ដើម្បីតែផលប្រយោជន៍ផ្ទាល់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវនេះបានធ្វើឡើងបន្ទាប់ពីមានជនឆបោកបានក្លែងបន្លំលិខិតមួយលេខ ០១៣១/២៥ ប.ស.ស./ប.ភ ចុះថ្ងៃទី ១៥ ខែមករា ឆ្នាំ ២០២៥ យកទៅកែខុសពីលក្ខណៈដើម ក្លែងបន្លំខ្លឹមសារ (ACLEDA Bank: 0716946457 (OUK CHANRATANA) ដោយប្រើប្រាស់និមិត្តសញ្ញា (Logo) និងត្រារបស់បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ ខុសពីលិខិតដើម។

ប.ស.ស. បានបដិសេធទាំងស្រុងចំពោះលិខិតក្លែងបន្លំរបស់ជនឆបោក ហើយសូមសាធារណជន ជាពិសេសសមាជិក ប.ស.ស. ទាំងអស់បង្កើនការប្រុងប្រយ័ត្នឱ្យបានខ្ពស់ ជៀសវាងការចាញ់បោកជនឆបោកទាំងនេះ។

ករណីក្លែងបន្លំលិខិតនេះដែរ ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ នឹងចាត់វិធានការដោយសហការជាមួយអាជ្ញាធរមានសមត្ថកិច្ចពាក់ព័ន្ធ ដើម្បីរកជនឆបោកទាំងនោះមកទទួលខុសត្រូវចំពោះមុខច្បាប់។

គួរបញ្ជាក់ថា ការក្លែងបន្លំ និងការប្រើប្រាស់លិខិតក្លែងជាកម្មវត្ថុ នៃបណ្តឹងអាជ្ញា ស្របតាមមាត្រា ៦២៦, ៦២៧, ៦២៨, ៦២៩ នៃក្រមព្រហ្មទណ្ឌ នៃព្រះរាជាណាចក្រកម្ពុជា៕

អត្ថបទ ៖ សំអឿន