ព័ត៌មានជាតិ

ប.ស.ស ណែនាំឱ្យសមាជិក ប.ស.ស ប្តឹងពេលឃើញមានភាពមិនប្រក្រតីណាមួយ នៅពេលទៅទទួលសេវា

បានផុស

១ year មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

បេឡាជាតិសន្តិសុខសង្គម (ប.ស.ស) នៃក្រសួងការងារ និង បណ្តុះបណ្តាលវិជ្ជាជីវៈ បានណែនាំឱ្យសមាជិក ប.ស.ស. ប្តឹងតាមរយៈបណ្តឹងអនាមិករបស់ក្រសួងការងារ ពេលឃើញមានភាពមិនប្រក្រតីណាមួយនៅពេលទៅទទួលសេវានៅមូលដ្ឋានសុខាភិបាលដៃគូ ប.ស.ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប.ស.ស បានលើកឡើងថា «ប្រសិនបើគ្រូពេទ្យផ្ដល់ការព្យាបាលមិនត្រឹមត្រូវ ឬមើលឃើញមានភាពមិនប្រក្រតីណាមួយនៅពេលទៅទទួលសេវានៅមូលដ្ឋានសុខាភិបាលដៃគូ ប.ស.ស លោកអ្នក ត្រូវរាយការណ៍ភ្លាមៗ មក ប.ស.ស តាមរយៈបណ្តឹងអនាមិក ដោយគ្រាន់តែស្កែន QR Code ដែលមាននៅក្នុង Poster ខាងលើ និងត្រូវរាយការណ៍ឈ្មោះមូលដ្ឋានសុខាភិបាល ឬបុគ្គលិកណាមួយក្នុងមូលដ្ឋានសុខាភិបាល និងបរិយាយអំពីសកម្មភាពមិនប្រក្រតី ឬ ការប្រព្រឹត្តខុសវិជ្ជាជីវៈ នៃបុគ្គលនោះ»។

ប.ស.ស បានណែនាំឱ្យគ្រូពេទ្យព្យាបាលមិនត្រូវបើកថ្នាំជូនសមាជិក ប.ស.ស ដោយមិនទាន់បានពិគ្រោះ និងពិនិត្យព្យាបាលជំងឺនោះទេ។ ព្រោះអាចបង្កឱ្យប៉ះពាល់ដល់សុខភាពធ្ងន់ធ្ងរ ឬអាចបណ្តាលឱ្យបាត់បង់ជីវិតផងដែរ។ ដូចនេះសមាជិក ប.ស.ស មិនត្រូវទទួលទានថ្នាំដោយមិនទាន់បានពិគ្រោះជាមួយគ្រូពេទ្យនោះឡើយ។ ត្រូវហ៊ានសាកសួរគ្រូពេទ្យពេលគ្រូពេទ្យបើកថ្នាំដោយមិនទាន់បានពិគ្រោះជំងឺ ឬពិនិត្យជំងឺត្រឹមត្រូវ។

ប.ស.ស បានលើកឡើងទៀតថា សមាជិក ប.ស.ស និងគ្រូពេទ្យព្យាបាលទាំងឡាយណាដែលបានសមគំនិតគ្នាដោយចេតនាក្នុងគោលបំណងកេងចំណេញផលប្រយោជន៍ពី ប.ស.ស នោះ ប.ស.ស នឹងកសាងសំណុំរឿងបញ្ជូនទៅកាន់តុលាការ ដើម្បីទទួលខុសត្រូវចំពោះមុខច្បាប់ជាធរមាន។ ក្រៅពីនេះ ប.ស.ស នឹងមិនអនុញ្ញាតឱ្យបន្តប្រើប្រាស់សេវា ប.ស.ស បន្តទៀតឡើយ និងត្រូវសងត្រឡប់មកវិញទឹកប្រាក់ដែលបានកេងចំណេញនៅតាមការខាតបង់របស់មូលនិធិសន្តិសុខសង្គម។ ចំណែកមូលដ្ឋានសុខាភិបាលជាដៃគូ នឹងត្រូវផ្តាច់កិច្ចព្រមព្រៀងជាមួយ ប.ស.ស ដោយមិនអនុញ្ញាតឱ្យបន្តផ្តល់សេវាជូនសមាជិក ប.ស.ស ទៀតហើយ និងត្រូវសងត្រឡប់មកវិញទឹកប្រាក់ដែលបានកេងចំណេញនៅតាមការខាតបង់របស់មូលនិធិសន្តិសុខសង្គម។

នៅក្នុងពិធីចុះអនុស្សរណៈ នៃការយោគយល់គ្នាស្តីពី“កិច្ចសហប្រតិបត្តិការក្នុងការសម្រុះសម្រួលផ្សះផ្សាវិវាទ” រវាងយ័តករសន្តិសុខសង្គម (ន.ស.ស.) និងអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) កាលពីពេលថ្មីៗ នេះ លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គនាយក នៃនិយ័តករសន្តិសុខសង្គម ហៅកាត់ថា ន.ស.ស បានលើកឡើងថា ប្រសិនបើពលរដ្ឋដែលជាកម្មករ-និយោជិត បុគ្គលស្វ័យនិយោជន៍ ដែលជាសមាជិកបេឡាជាតិសន្តិសុខសង្គម(ប.ស.ស) នៅពុំទាន់មានភាពស្ងប់ចិត្តចំពោះការផ្តល់សេវា និងដំណោះស្រាយដែលប.ស.ស បានផ្តល់ឱ្យ អាចដាក់ពាក្យប្តឹងមកកាន់និយ័តករសន្តិសុខសង្គម ដើម្បីនិយ័តករសន្តិសុខសង្គម ជួយស្វែងរកដោះស្រាយ ដោយមានចរិតលក្ខណៈ ជាការដោះស្រាយវិវាទក្រៅប្រព័ន្ធតុលាការ។