ព័ត៌មានជាតិ

មន្ត្រីជាន់ខ្ពស់អប់រំ ៖ កម្មវិធី Technovation ជាកម្លាំងចលករមួយយ៉ាងសំខាន់ ក្នុងការលើកកម្ពស់ការអប់រំបែបឌីជីថលនៅកម្ពុជា

បានផុស

៤ ខែ មុន

នៅ

ថ្ងៃអង្គារ ១១ មីនា ២០២៥

ដោយ

មន្ត្រីជាន់ខ្ពស់ នៃក្រសួងអប់រំ យុវជន និងកីឡា បានអះអាងថា កម្មវិធី Technovation កម្ពុជា គឺជាកម្មវិធីមួយដែលមានសក្តានុពល និងបានដើរតួនាទី និងជាកម្លាំងចលករមួយយ៉ាងសំខាន់ក្នុងការលើកកម្ពស់ការអប់រំបែបឌីជីថលនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកម្មវិធី Technovation x Future Digital Talents កម្ពុជា ២០២៥ កាលពីថ្ងៃទី ១០ មីនា លោកបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា តំណាងខ្ពង់ខ្ពស់ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ដ្រីក្រសួងអប់រំ យុវជន និងកីឡា បានឱ្យដឹងថា កម្មវិធី Technovation កម្ពុជា គឺជាកម្មវិធីមួយដែលមានសក្តានុពល និងបានដើរតួនាទីជាកម្លាំងចលករមួយយ៉ាងសំខាន់ក្នុងការលើកកម្ពស់ការអប់រំបែបឌីជីថលនៅកម្ពុជា ជាពិសេសគឺការគាំទ្រ និងលើកទឹកចិត្តដល់ក្មួយៗ ជាកុមារី ជាយុវនារី ក្នុងវិស័យបច្ចេកវិទ្យា និងសហគ្រិនភាព ដែលមានអាយុចាប់ពី ៨ ដល់ ១៨ ឆ្នាំ តាមរយៈការបណ្តុះគំនិតឱ្យបានយល់ដឹង បង្កើនទំនុកចិត្ត និងសេចក្តីក្លាហាន ក្នុងការជ្រើសរើសយកវិស័យបច្ចេកវិទ្យាជាជំនាញសម្រាប់បន្តការសិក្សានាពេលអនាគត និងជាពិសេសបង្កើនចំនួនស្ត្រីមានអាជីពវិជ្ជាជីវៈលើផ្នែកបច្ចេកវិទ្យាកាន់តែច្រើនផងដែរ។

លោកបណ្ឌិត បានបន្តថា សម្រាប់ឆ្នាំ ២០២៥ នេះ មានគ្រឹះស្ថានសាធារណៈប្រមាណជា ៣៤ សាលា មកពី ១២ រាជធានី-ខេត្ត ចូលរួមកម្មវិធី Technovation x Future Digital Talents កម្ពុជា ២០២៥ មានដូចជា ៖ រាជធានីភ្នំពេញ ខេត្តកំពង់ចាម ខេត្តសៀមរាប ខេត្តកំពង់ស្ពឺ ខេត្តតាកែវ ខេត្តបាត់ដំបង ខេត្តកំពត ខេត្តស្វាយរៀង ខេត្តស្ទឹងត្រែង ខេត្តបន្ទាយមានជ័យ ខេត្តព្រៃវែង និងខេត្តពោធិ៍សាត់ ក្នុងនោះដែរ មានសាលាចំនួន ៥ មកពីស្រុកកងមាស ខេត្តកំពង់ចាម រាប់ចាប់ពីកម្រិតបឋមសិក្សា រហូតដល់កម្រិតវិទ្យាល័យ។

លោកបណ្ឌិត បានបន្ថែមថា ក្រសួងអប់រំ យុវជន និងកីឡា សូមគាំទ្រចំពោះការបង្កើតឱ្យមានកម្មវិធី Technovation x Future Digital Talents នេះ សម្រាប់សិស្សានុសិស្សកម្ពុជាជំនាន់ក្រោយ ក្នុងការចាប់ផ្តើមគំនិតអាជីវកម្មរបស់ពួកគេដែលអាចដោះស្រាយបញ្ហាប្រឈមនានា សម្រាប់ការអភិវឌ្ឍក្នុងប្រទេសកម្ពុជា ជំរុញការប្រើប្រាស់ជំនាញបច្ចេកវិទ្យាឌីជីថល (ICT) ឱ្យកាន់តែទូលំទូលាយបន្ថែមទៀត។

គួរបញ្ជាក់ថា កម្មវិធី “Technovation x Future Digital Talents 2025” ត្រូវបានរៀបចំឡើងដោយសហគមន៍ Technovation Cambodia និងមានការគាំទ្រ និងសហការជាមួយនឹងក្រសួងអប់រំ យុវជន និងកីឡា ក្នុងគោលបំណងជំរុញសិស្សនារីឱ្យចាប់អារម្មណ៍ និងសិក្សាផ្នែកបច្ចេកវិទ្យា និងសហគ្រិនភាព ប្រកបដោយនវានុវត្តន៍ ដើម្បីបង្កើនអត្រាអ្នកចូលរួមជាស្ត្រីក្នុងវិស័យបច្ចេកវិទ្យាឱ្យកាន់តែច្រើន។ បច្ចុប្បន្នក្រុមនារីវ័យក្មេងកម្ពុជាមានសមត្ថភាពលើវិស័យបច្ចេកវិទ្យា និងធុរកិច្ចមិនចាញ់ក្រុមនារីវ័យក្មេងបរទេសឡើយ។ ដោយមើលឃើញពីតម្រូវការ និងសមភាព នៃការចូលរួមប្រកួតប្រជែងរបស់សិស្សានុសិស្សទាំងប្រុស ទាំងស្រី Technovation Girls Cambodia បានរួមសហការជាមួយ Future Digital Talents ដើម្បីប្រែក្លាយជាកម្មវិធីមួយដែលមានការចូលរួមពីសិស្សទូទៅ ក្នុងការទទួលបានការអប់រំតាមបែបបច្ចេកវិទ្យា និងដើម្បីចូលរួមប្រកួតប្រជែងនៅកម្រិតថ្នាក់ជាតិ៕

អត្ថបទ ៖ សំអឿន

Related Topics:ក្រសួងអប់រំ យុវជន និងកីឡា