មន្ត្រីជំនាញព្រួយបារម្ភ មាន់ទាងាប់ប្រមាណជាង ១៥០ ក្បាល នៅក្រុងក្រចេះ ជាជំងឺផ្ដាសាយបក្សី

សត្វមាន់ទាឈឺឬងាប់ប្រមាណជា ១៥៥ ក្បាល ស្ថិត​នៅភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ មន្ត្រីជំនាញការិយាល័យផលិតកម្ម និងបសុព្យាបាល ព្រួយ​បារម្ភថា ជារោគសញ្ញាផ្ដាសាយបក្សី។ នេះបើ​តាមការឲ្យដឹងពីលោក កេត សារឿន ប្រធានការិយាល័យ​ផលិតកម្ម និងបសុព្យាបាល​បានឲ្យកម្ពុជាថ្មីនៅព្រឹកថ្ងៃទី១ ខែមេសា ឆ្នាំ​២០២៥​នេះ។

យោងតាមការសាកសួរប្រជាពលរដ្ឋ សត្វមាន់ទាចាប់ផ្ដើមឈឺប្រហែលជា ១០ ថ្ងៃមុន លុះ ១០ ថ្ងៃក្រោយមកទើបរាយការ​មកមន្រ្តី​ជំនាញ។ ជាក់ស្ដែង នៅព្រឹកថ្ងៃទី ១ ខែមេសា ឆ្នាំ២០២៥ មន្ត្រីជំនាញការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ បាន​ចុះអន្តរាគមន៍បាញ់សម្លាប់មេរោគ និងតាមដានសុខភាពសត្វនៅទីតាំងកើតហេតុខាងលើ។

បើ​តាមការឲ្យដឹងពីលោក កេត សារឿន ក្រោយ​ទទួលពត៌មានពីប្រជាពលរដ្ឋ មន្ត្រីជំនាញបានចុះតាមដានសុខភាពសត្វមាន់ និងទា នៅក្នុងភូមិកើតហេតុបានចំនួន ០៦ ខ្នងផ្ទះ ដែល​មាន់ទា​ទាំងនោះ​មានសុខភាពល្អ និងបានចុះ​យកសំណាក​សត្វមាន់ចំនួន ០២ ក្បាល សត្វទា ០១ ក្បាល ផ្ញើទៅពិនិត្យនៅវិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ ដើម្បីតាមដានរោគសញ្ញាជាក់លាក់។ ជាមួយគ្នានេះ ក្រុមការងារក៏បាញ់ថ្នាំសំលាប់មេរោគ បានចំនួន ០៣ ខ្នងផ្ទះ​ ជាកន្លែងមានមាន់ងាប់ ហើយពេលរសៀលថ្ងៃដដែល ក្រុមការងារនឹងបន្តចុះបាញ់ថ្នាំសម្លាប់មេរោគបន្តទៀតផងដែរ។

ចំពោះករណីសត្វមាន់ទាងាប់នេះដែរ លោកកេត សារឿន បានបញ្ជាក់ថា តាមការសន្និដ្ឋានជាក់ស្ដែង ជាជំហានដំបូង ​សត្វមាន់ទាឈឺឬងាប់ខាងលើនេះ អាចបង្កឡើងដោយបញ្ហាបំរែបំរួលអាកាសធាតុ។ ចំពោះរោគសញ្ញា មន្ត្រីជំនាញ មិនទាន់ប្រាកដទេ រង់​ចាំលទ្ធផលនៃវត្ថុវិភាគចេញមកសិន។

លោកក៏បានណែនាំឲ្យបងប្អូនប្រជាពលរដ្ឋ កុំប៉ះពាល់សត្វមាន់ទា ឈឺ ឬ ងាប់ កុំយកទៅធ្វើជាអាហារបរិភោគ ត្រូវយកទៅដុត ឬកប់ចោល ជៀសវាងឆ្លងជំងឺផ្ដាសាយបក្សី៕

អត្ថបទ៖ ប្រុញ វិធិន