រដ្ឋមន្ត្រីមហាផ្ទៃ អះអាងពីឆន្ទៈដ៏មោះមុតរបស់រដ្ឋាភិបាលក្នុងកិច្ចការពារទឹកដី គឺមិនឱ្យបាត់សូម្បីតែ១សង់ទីម៉ែត្រ

ឆន្ទៈរបស់រដ្ឋាភិបាលដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី គឺមិនឱ្យទឹកដីបាត់សូម្បីតែ១សង់ទីម៉ែត្រ ហើយក៏មិនមានចិត្តទៅដណ្ដើមទឹកដីរបស់អ្នកណាឡើយ។ នេះជាការថ្លែងរបស់ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ដោយលោក បានអះអាងពីឆន្ទៈដ៏មោះមុតរបស់រដ្ឋាភិបាលកម្ពុជាក្នុងកិច្ចការពារបូរណភាពទឹកដី និងធានារក្សាអធិបតេយ្យភាពជាតិ។

ការថ្លែងបែបនេះរបស់លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានធ្វើឡើងក្នុងឱកាសអញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលនានា និងសំណេះសំណាលជាមួយកងកម្លាំងនគរបាលជាតិនៃស្នងការដ្ឋាននគរបាលខេត្តកំពង់ចាម នាព្រឹកថ្ងៃទី០៤ ខែមេសា ឆ្នាំ២០២៥នេះ។

លោករដ្ឋមន្ត្រីក្រសួងមហាផ្ទៃ គូសបញ្ជាក់ថា ជាច្រើនអាណត្តិមកហើយ មិនមានថ្នាក់ដឹកនាំណាម្នាក់បណ្តែតបណ្តោយ ឬចង់ឱ្យបាត់បង់ទឹកដីរបស់ខ្លួនឯងនោះទេ។ ទន្ទឹមនេះដើម្បីថែរក្សាទឹកដី និងព្រំដែនឱ្យបានគត់មុត និងគង់វង្ស លោកឧបនាយករដ្ឋមន្ត្រី ស សុខា បន្តថា ប្រជាពលរដ្ឋគ្រប់រូប ក៏មានភាគហ៊ុនដូចគ្នា ក្នុងការចូលរួមថែរក្សាបូរណភាពទឹកដី ដោយមិនមែនជាកាតព្វកិច្ចរបស់ថ្នាក់ដឹកនាំណាម្នាក់ឡើយ ពោលគឺជាកិច្ចការរួម។

ការថ្លែងអះអាងពីបញ្ហាព្រំដែនពេលនេះ គឺជាការឆ្លើយតបទៅនឹងក្រុមនិន្នាការប្រឆាំង ដែលបាននិងកំពុងព្យាយាមយកបញ្ហាព្រំដែនកម្ពុជាជាមួយប្រទេសជិតខាង ពិសេសការរុញស្ថានការណ៍តាមព្រំដែនរវាងកម្ពុជា និងថៃ ជាអាទិ៍ ព្រំដែនទឹក បញ្ហាកោះគុត និងប្រាសាទតាមាន់ ធ្វើជាប្រធានបទលាបពណ៌ និងបានចោទប្រកាន់ឱ្យមានការភាន់ច្រឡំលើរាជរដ្ឋាភិបាលកម្ពុជា ដោយចោទថា រាជរដ្ឋាភិបាលព្រងើយកន្ដើយចំពោះបញ្ហានេះ។

កន្លងមក តបនឹងការចោទប្រកាន់បែបនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអះអាងពីឆន្ទៈមោះមុតរបស់រដ្ឋាភិបាលក្នុងការបន្តរក្សាការពារបូរណភាពទឹកដី តាមរយៈការកសាងខ្សែបន្ទាត់ព្រំដែនមួយពេញលេញ និងច្បាស់លាស់ជាមួយប្រទេសជិតខាង ដោយមិនឱ្យមានការរំលោភបានជាដាច់ខាត។

សម្តេចធិបតី ហ៊ុន ម៉ាណែត បានប្រកាសធានារក្សាការពារមិនឱ្យមានការរំលោភបំពានបានជាដាច់ខាតលើអធិបតេយ្យភាព និងបូរណភាពទឹកដីរបស់កម្ពុជា។ ក៏ប៉ុន្តែ បើករណីប្រទេសណាចង់ឈ្លានពានចូលដែនទឹកដីរបស់កម្ពុជា កម្ពុជាក៏នឹងប្រើសិទ្ធិការពារខ្លួន ដោយការប្រើអាវុធតបទៅវិញផងដែរ៕