រដ្ឋបាលខេត្តព្រះវិហារ កំពុងរៀបចំ «ព្រះវិហារសង្ក្រាន្ត» ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិ

នៅជាង ១សប្ដាហ៍ទៀតប៉ុណ្ណោះ ពិធីចូលឆ្នាំប្រពៃណីជាតិខ្មែរ នឹងឈានចូលមកដល់ ហើយដើម្បីអបអរសាទរពិធីចូលឆ្នាំថ្មីប្រពៃណីជាតិខ្មែរ នៅពេលខាងមុខ រដ្ឋបាលខេត្តព្រះវិហារ បានរៀបចំទីតាំង ព្រះវិហារសង្ក្រាន្ត លេងល្បែងប្រជាប្រិយខ្មែរគ្រប់ប្រភេទ ដើម្បីទទួលស្វាគមន៍ប្រជាពលរដ្ឋខ្មែរ គ្រប់ស្រទាប់វណ្ណៈ ក៏ដូចជាភ្ញៀវទេសចរជាតិ អន្តរជាតិ ដែលបានមកលេងកម្សាន្តក្នុងខេត្តព្រះវិហារ។

លោក ប៉ុក ងួន អភិបាលក្រុងព្រះវិហារ បានមានប្រសាសន៍ថា ពិធីបុណ្យចូលឆ្នាំប្រពៃណីជាតិជាតិខ្មែរ ដែលប្រព្រឹត្តទៅរយៈ ៣ថ្ងៃ ស្ថិតនៅក្នុងរដ្ឋបាលខេត្ត និងទីតាំងមួយចំនួនទៀត។ លោកថា អាជ្ញាធរបានរៀបចំឱ្យលេងល្បែងប្រជាប្រិយគ្រប់ប្រភេទ នឹងមានការចូលរួមពីក្រុមអាជីវករលក់ផលិតផលប្រចាំតំបន់ជាច្រើនតូប ក៏ដូចជាមានការប្រគំតន្ត្រីរាំលេងកម្សាន្ត ដើម្បីញ៉ាំងបរិយាកាសឱ្យប្រជាពលរដ្ឋសប្បាយរីករាយនៅពេលយប់ផងដែរ។ ទន្ទឹមនឹងការរៀបចំតុបតែងកន្លែងលេងល្បែងប្រជាប្រិយ អាជ្ញាធរក៏បានតុបតែងកែលម្អដាក់អំពូលនៅតាមសួនច្បារទីធ្លាសាធារណៈ ដើម្បីបង្កើនសោភ័ណភាពនៅក្នុងក្រុងបន្ថែមទៀត។

លោកបានបញ្ជាក់ថា ការរៀបចំទីតាំងលេងល្បែងប្រជាប្រិយ គឺដើម្បីទទួលអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខនេះ ក៏ដូចជាបានតុបតែងកែលម្អនៅទីធ្លាសាធារណៈ ឱ្យមានសោភ័ណភាពស្រស់បំព្រង ដើម្បីទាក់ទាញភ្ញៀវទេសចរជាតិ និងអន្តរជាតិ ឱ្យមកកម្សាន្ត និងបង្កបរិយាកាសសប្បាយរីករាយ នៅក្នុងខេត្តព្រះវិហារ៕

ដោយ៖ជុន កុសល