ចំណុច​ពិសេសៗ​​ ពីអាកាសយានដ្ឋាន​​អន្តរជាតិ​តេជោ ជា​សំណង់​​អភិវឌ្ឍ​ន៍​កំពូលមួយ​របស់ពិភពលោក

អាកាសយានដ្ឋាន​អន្តរជាតិ​តេជោ សម្រេចការ​សាងសង់​​បាន​ប្រមាណ ៩៥% និង​គ្រោង​ដាក់​ឲ្យ​ប្រើប្រាស់​នៅអំឡុង​ខែ​កក្កដា​​ឆ្នាំ ២០២៥។

​អាកាសយានដ្ឋានដែលនឹង​ក្លាយជាមជ្ឈមណ្ឌលដឹកអ្នកដំណើរប្រចាំតំបន់​របស់​កម្ពុជា​នេះ​ ត្រូវ​បានសាងសង់​​ឡើង​ក្រោម​ទុន​វិនិយោគ​ប្រមាណ ១ ៥០០ លាន​ដុល្លារ ខណៈ​​ដំណើរការសាងសង់​បាន​គិតគូរ​យកចិត្តទុកដាក់​លើ​គ្រប់​ចំណុច​ ដើម្បីក្លាយ​ជា​អាកាសយានដ្ឋានលំដាប់កំពូល​​មួយ​របស់ពិភពលោក។

តើ​អាកាសយានដ្ឋាន​អន្តរជាតិតេជោ​តម្លៃ​ប្រមាណ ១ ៥០០ លាន​ដុល្លារ​នេះ មាន​ចំណុច​ពិសេស​អ្វីខ្លះ?

អាកាសយានដ្ឋាន​​តម្លៃ ១ ៥០០ លាន​ដុល្លារនេះ​ ត្រូវ​បាន​អភិវឌ្ឍ​ឡើង​​ដោយ​បង្កប់​ចំណុចលេចធ្លោ​ពិសេសៗ​ជាច្រើន​ ​​រហូត​ត្រូវបាន​គេ​ផ្តល់ចំណាត់ថ្នាក់​នៅក្នុ​ងចំណោម​​​​អាកាសយានដ្ឋានដ៏ទំនើប​មួយ​​​របស់​ពិភពលោក។

-អាកាសយានដ្ឋាន​អន្តរជាតិតេជោ ត្រូវ​បាន​អភិវឌ្ឍ​ឡើង​ជាព្រលានយន្តហោះលំដាប់ 4F ដែល​ក្នុង​មួយ​ឆ្នាំៗអាច​ទទួលអ្នក​ដំណើរបាន​​​រហូត​ដល់ ១៣ លាននាក់ នៅ​ដំណាក់កាលទី១។

-ស្ទើរ​តែគ្រប់ហេដ្ឋារចនាសម្ព័ន្ធនៃសំណង់អគារ​គឺ​យកលេខ ៩ ​ជា​គោល ដែល​ផ្អែកតាមជំនឿជា​លេខ​​ហុងស៊ុយ​

-ការ​ឌីហ្សាញ​ដំបូល​អគារ​​​មាន​​​រាងជា​​អង្រុត ដែល​​អង្រុត​ជា​ឧបករណ៍​​ប្រពៃណីបុរាណ​​របស់ខ្មែរ ​​ត្រូវ​បានរចនា​​បង្កប់ជាទម្រង់​សិល្បៈបញ្ចូល​ទៅក្នុង​​សំណង់​​ស្ថាបត្យកម្ម​សម័យថ្មីនៃ​អាកាសយានដ្ឋាន​អន្តរជាតិតេជោ

-​ដោយគិតគូរពីការ​សន្សំសំចៃ​ការ​ប្រើប្រាស់​ថាមពល ការ​ទាញយក​ប្រភព​ថាមពល​​ពន្លឺពី​ខាងក្រៅបានជួយ​កាត់បន្ថយ​ការ​​ប្រើប្រាស់​ថាមពលខាងក្នុង​អគារ​​​បាន​​រហូត​ដល់ ២០%

-ស្ថានីយអ្នកដំណើរ​ (Terminal) ត្រូវ​បាន​​អភិវឌ្ឍនៅ​​លើ​ផ្ទៃដី​​ទំហំ​​ ២៤ ហិកតា ខណៈអាកាសយានដ្ឋាន​អន្តរជាតិតេជោសាងសង់​នៅលើ​ផ្ទៃដីសរុប​ទំហំ​​ ២ ៦០០ ហិកតា

-ថ្មម៉ាប​ពីខេត្តកំពង់ស្ពឺ​ប្រមាណ ២ ម៉ឺន​ម៉ែត្រគីប ត្រូវ​បាន​រៀបក្រាល​នៅខាង​ក្នុង​និង​ខាងក្រៅ​​បរិវេណ​អាកាសយានដ្ឋាន​អន្តជាតិតេជោ

-​អគារ​ដំបូល​ស្ថានីយអ្នកដំណើរ​​​សាងសង់​ពី​អាលុយមីញូម​ ​ដែលអាច​ទប់ស្កាត់និង​បញ្ចៀស​ការ​ឆាបឆេះ​ផ្សេងៗ។

-ប៉មបញ្ជាចរាចរណ៍យន្តហោះ (Air Traffic Control Tower) នៃ​អាកាសយានដ្ឋានអន្តរជាតិតេជោ ​រចនា​យក​លំនាំតាម​កំពូលប្រាសាទអង្គរវត្ត ដែល​ប៉មនេះមានកម្ពស់ ១១៨ ម៉ែត្រ

-ដើមត្នោត ដែលជា​រុក្ខជាតិ​តំណាង​ជាតិ​​ត្រូ​វ​បានយកទៅដាំលម្អនៅក្នុង​បរិវេណ​អាកាសយានដ្ឋាន​អន្តរជាតិ​តេជោដែល​រំលេចបាន​សោភណភាព​ទាក់ទាញបន្ថែមទៀត

-​​គំរូ​ភូមិ​វប្បធម៌នៅ​ខេត្ត​សៀមរាប ត្រូវបានយកមក​​រៀបចំ​នៅក្នុង​បរិវេណ​​អាកាសយានដ្ឋាន ក្នុង​គោលដៅ​ដើម្បី​ចូលរួម​ផ្សព្វផ្សាយ​ និង​លើក​តម្លៃ​ពី​អត្តសញ្ញាណជាតិ​

-អាកាសយានដ្ឋាន​អន្តរជាតិ​តេជោ​ បំពាក់ប្រព័ន្ធ​បច្ចេកវិទ្យាជំនួយការ​ចត AVGS (Aircraft Ground Vehicle System) ដែល​ជួយ​សម្រួលដល់​ប្រតិបត្តិកាចូលចតរបស់យន្តហោះ​នៅ​ក្នុងអាកាសយានដ្ឋាន។

-ស្លាប​ (Pier) នៅ​ស្ថានីយ​អ្នក​ដំណើរ​មាន​ប្រវែង​រហូតដល់ ១ គីឡូម៉ែត្រ ដែលស្លាបម្ខាងៗ​មានប្រវែង ៥០០ ម៉ែត្រ

-ហាងអាហារ និង​ហាង​លក់ទំនិញ​​ប្រមូល​ផ្តុំផលិត​ផល​ល្បីៗសាងសង់​លើ​​ទំហំ ២ ហិកតា ដើម្បី​ផ្តល់​សេវាដល់អ្នកដំណើរ​​​នៅ​អាកាសយានដ្ឋាន​

-បញ្ជរ​ (Check-in Counter) នៅអាកាសយានដ្ឋានសរុបមាន​ចំនួន ១១២ បញ្ជរ

-ចំណតឡានមាន​ភាព​ធំទូលាយ ដែល​អាច​ចតរថយន្ត​បានប្រមាណ ១ ១០០​ គ្រឿង

-​ការ​វាយ​តម្លៃ​ពី​អាកាសចរណ៍​ស៊ីវិល​ បានចាត់ថ្នាក់​អាកាសយានដ្ឋាន​តេជោ​អន្តរជាតិ​​ជាប់​ចំណាត់ថ្នាក់​​​ទី ៩ លើ​ពិភពលោក

-អាកាសយានដ្ឋានអន្តរជាតិតេជោត្រូវ​បាន​គេ​ផ្តល់​ចំណាត់ថ្នាក់ទី ៥ នៃគម្រោងស្ថាបត្យកម្មកំពូល​ទាំង ១១ របស់ពិភពលោក​ក្នុងឆ្នាំ២០២៥៕