នាយករដ្ឋមន្ត្រីជំរុញឱ្យមើលពីភាពវិជ្ជមានលើស្ថានភាពសង្គមឱ្យបានច្រើន

នាយករដ្ឋមន្ត្រី សម្ដេចធិបតី ហ៊ុន ម៉ាណែត បាន​ថ្លែងថាគ្មានអ្វីល្អឥតខ្ចោះនោះទេតែរដ្ឋាភិបាលក៏ព្យាយាមដោះស្រាយជាបណ្ដើរៗហើយដែរ។ សម្ដេចយល់ថាពលរដ្ឋគួរមើលពីភាពវិជ្ជមានក្នុងសង្គមឱ្យបានច្រើនដើម្បីជំរុញការចូលរួមលើសកម្មភាពវិជ្ជមានលើកស្ទួយប្រទេស។

ថ្លែងពីពិធីសម្ពោធដាក់ឱ្យប្រើប្រាស់ជាផ្លូវការ​កំពង់ផែទេសចរណ៍អន្តរជាតិកំពត ក្នុងស្រុកទឹកឈូរ ខេត្តកំពត ព្រឹកថ្ងៃទី២១ ខែមេសា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានបង្ហាញនូវក្ដីបារម្ភពីគ្រោះថ្នាក់ចំពោះជាតិ ប្រសិនជាពលរដ្ឋ​គ្រប់គ្នាផ្ដោតសំដៅតែរឿងអវិជ្ជមានក្នុងសង្គមនោះ។ ការលើកឡើងនេះបានឆ្លើយតបនឹងមនុស្សមួយចំនួនដែលថារដ្ឋបណ្ដោយឱ្យពលរដ្ឋ​លេងបាញ់ទឹក ប៉ាតម្សៅ ស្លៀកពាក់មិនសមរម្យជាដើម។ សម្ដេចស្នើមើលរូបភាពជារួមវិញ ព្រោះរដ្ឋមិនបានបោះបង់សិល្បៈ វប្បធម៌ ប្រពៃណីនោះទេ ការលេងបាញ់ទឹក ប៉ាតម្សៅជាសិទ្ធិសេរីភាពរបស់ពលរដ្ឋ ហើយការស្លៀកពាក់ទៀតសោតក៏មានពលរដ្ឋជាច្រើនស្លៀកពាក់ប្រពៃណីផងដែរ។

សម្ដេចថាពលរដ្ឋគួររួម​គ្នាមើល ផ្សព្វផ្សាយ ចូលរួមគិត និងធ្វើសកម្មភាពវិជ្ជមានបានច្រើនគឺជាការចូលរួមជួយដល់ប្រទេសជាតិ។

សម្ដេចថា៖ «មិនល្អឥតខ្ចោះទេ! បញ្ហាអវិជ្ជមានយើងដោះស្រាយ តែយើងត្រូវអបអរសាទរនូវអ្វីដែលយើងបាន អ្វីដែលយើងរួមគ្នាកសាងបាន ហើយជាមូលដ្ឋានសម្រាប់យើងធ្វើដំណើរទៅមុខឆ្នាំថ្មីនេះហើយអត្ថន័យនៃការរួមគ្នាសប្បាយឆ្នាំថ្មីរបស់យើង»។

អ្នកជំនាញផ្នែកទស្សនវិជ្ជា និងកិច្ចការសង្គម លោកបណ្ឌិត ឈត ប៊ុនថង មានប្រសាសន៍ថា ការគិតវិជ្ជមានមិនត្រឹមតែជួយដល់សង្គមជាតិប៉ុណ្ណោះទេ វាជួយដល់សុខភាពផ្លូវចិត្តរបស់មនុស្សក្នុងសង្គមផងដែរ។ លោកបន្ថែមថា ការគិតវិជ្ជមានដូចជាការបង្កើតនូវក្ដីសង្ឃឹម និងផ្ដល់ឱកាសសម្រាប់ខ្លួនឯង។

លោកមានប្រសាសន៍ទៀតថាក្នុងសង្គមជាតិមួយតែងតែងមានបញ្ហាអវិជ្ជមានក្នុងសង្គមហើយដូច្នេះពលរដ្ឋគួរចូលរួមដោះស្រាយ ហើយសូមគិតថាគ្រប់ឧបសគ្គ គ្រប់បញ្ហាសុទ្ធតែមានដំណោះស្រាយ។

លោកថា៖ «នៅលើពិភពលោកមេដឹកនាំដែលល្អពូកែ សូម្បីតែនៅកម្ពុជាក្សត្រយើងដែលពូកែពីមុនៗមក​មិនមានក្សត្រណាមួយដែលអាចគេចផុតពីចន្លោះប្រហោង ឬចំណុចអវិជ្ជមានមួយចំនួនដែលកើតឡើងទេ។ អ៊ីចឹងបើសិនជាយើងគិតថាមានកំហុសតិចតួចសុទ្ធតែមិនអាច​ដោះស្រាយបាន សុទ្ធតែរឿងដែលមិនអាចកែប្រែបាននោះហើយដែលជារឿងធ្វើឱ្យសង្គមយើងបែកបាក់នោះ»។

ក្នុងពិធីបុណ្យចូលឆ្នាំកន្លងទៅថ្វីត្បិតតែមានបញ្ហាបន្តិចបន្តួចតែកម្ពុជាបានរៀបចំពិធីបុណ្យដ៏ធំនេះដោយរលូននិងសប្បាយរីករាយ។ សាលារាជធានីភ្នំពេញបានបញ្ចេញរថយន្តក្រុងសាធារណៈជូនដំណើរពលរដ្ឋទៅស្រុកដោយឥតគិតថ្លៃដោយបានជួយសន្សំលុយពលរដ្ឋលើថ្លៃធ្វើដំណើរបានជាង១លានដុល្លារ ខណៈតាមបណ្ដាខេត្តនានាបានរៀបចំពិធីចូលឆ្នាំក្នុងខេត្តរបស់ខ្លួនដោយមានការជំរុញឱ្យមានការលេងល្បែងប្រជាប្រិយ និងសិល្បៈប្រពៃណីរបស់ខ្មែរផងដែរ៕

អត្ថបទដោយ ហ៊ុន សិរីវឌ្ឍន៍