ស្រុកបុទុមសាគរ ខេត្តកោះកុង ត្រៀមប្រកាសជាស្រុកអស់មីន ក្នុងខែនេះ

អាជ្ញាធរមីន និងរដ្ឋបាលខេត្តកោះកុង នឹងសហការរៀបចំ ពិធីអបអរសាទរការប្រកាសស្រុកបុទុមសាគរ ក្នុងខេត្ត​កោះកុង ជាស្រុកអស់មីន នៅថ្ងៃទី ២៩​ខែ មេសា ខាងមុខនេះ។ នេះបើតាមសេចក្តីជូនដំណឹងរបស់អាជ្ញាធរមីន។

ពិធីនេះនឹងប្រារព្ធធ្វើនៅសាលាស្រុកបុទុមសាគរ ខេត្តកោះកុង ក្រោមអធិបតីភាពលោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី១ អាជ្ញាធរមីន និងលោក Vanlalvawna Bawitlung ឯកអគ្គរដ្ឋទូតសាធារណរដ្ឋឥណ្ឌាប្រចាំនៅកម្ពុជា នឹងមានការចូលរួមពីតំណាងរដ្ឋបាលខេត្តកោះកុង កងកម្លាំងប្រដាប់អាវុធ មន្ត្រីរាជការ ប្រជាពលរដ្ឋ និងសិស្សានុសិស្ស។

លោកទេសរដ្ឋមន្រ្តី ធ្លាប់បានលើកឡើងអំពីភាពជោគជ័យនៃការងារបោសសម្អាតមីន និងសំណល់ជាតិផ្ទុះពីសង្រ្គាមរយៈពេលជាង ៣០ឆ្នាំនៅកម្ពុជា គឺដើម្បីធានាសុខសុវត្ថិភាព និងសុខក្សេមក្សាន្តជូនប្រជាពលរដ្ឋទូទាំងប្រទេស។

គិត​មកទល់ពេលនេះ កម្ពុជា​បានប្រកាស​រាជធានី​ខេត្ត​អស់​មីន​សរុប​ប្រមាណ ១៥​ ខេត្តហើយ ក្នុងនោះ ​រួមមានខេត្ត​ស្ទឹងត្រែង ខេត្ត​កែប ខេត្តព្រៃវែង ខេត្ត​ព្រះសីហនុ រាជធានី​ភ្នំពេញ ខេត្តកណ្តាល ត្បូងឃ្មុំ ស្វាយរៀង កំពង់ចាម តាកែវ  កំពង់ឆ្នាំង កំពត មណ្ឌលគិរី កំពង់ស្ពឺ និង​ខេត្តក្រចេះ ជាដើម​។​

គួរជម្រាបថា អស់រយៈពេលជាង ៣០ ឆ្នាំ គិតចាប់ពីឆ្នាំ ១៩៩២ មក រាជរដ្ឋាភិបាលកម្ពុជាបានចំណាយថវិកាជាង ១ ពាន់លានដុល្លារ នៅក្នុងប្រតិបត្តិការបោសសម្អាតមីន។ ក្នុងនោះថវិកាដែលទទួលបានពីសហគមន៍ជំនួយ និងបណ្តាប្រទេសជាមិត្តមានប្រមាណ ៦០ភាគរយ ក្រៅពីនោះជាថវិការរបស់រដ្ឋាភិបាលកម្ពុជា និងសប្បុរសជន៕