ព័ត៌មានជាតិ

រដ្ឋមន្រ្តីក្រសួងបរិស្ថានលើកទឹកចិត្តពលរដ្ឋនៅភ្នំពេញ ដាំដើមឈើតាមផ្ទះម្នាក់មួយដើម បង្កើតម្លប់បៃតងក្នុងសហគមន៍

បានផុស

៣ ថ្ងៃ មុន

នៅ

ថ្ងៃចន្ទ ២៦ ឧសភា ២០២៥

ដោយ

រដ្ឋមន្រ្តីក្រសួងបរិស្ថាន បានលើកទឹកចិត្តដល់ពលរដ្ឋនៅរាជធានីភ្នំពេញ អាចចូលរួមដោយស្ម័គ្រចិត្តក្នុងការដាំដើមឈើក្នុងន័យបង្កើតគម្របបៃតង ដើម្បីលើកកម្ពស់បរិស្ថានរស់នៅឲ្យកាន់តែល្អប្រសើរ។

ថ្លែងចូលរួមក្នុងកម្មវិធីមាគ៌ាបៃតងដែលរៀបចំឡើងកាលពីសប្ដាហ៍មុននេះ លោក អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងថា ក្រសួងបរិស្ថានបានកំពុងបង្កើតថ្នាលបណ្ដុះកូនឈើតាមខេត្តនានា ដែលអាចផលិតកូនឈើបានរាប់លានដើម ដើម្បីចែកដល់ពលរដ្ឋយកទៅដាំនៅតាមលំនៅដ្ឋាន និងតាមទីប្រជុំជននានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាជធានីភ្នំពេញនៅមានសក្ដានុពលច្រើន ដែលអាចពង្រីកគម្របបៃតងបន្ថែមទៀត។ បើតាមលោករដ្ឋមន្រ្តី ការជំរុញឲ្យពលរដ្ឋចូលរួមដាំដើមឈើមិនអាចចាប់បង្ខំបានទេ តែអាចចូលរួមដោយស្ម័គ្រចិត្តតាមលទ្ធភាព ខណៈក្រសួងមានកូនឈើចែកយកទៅដាំដោយឥតគិតថ្លៃ។

លោក អ៊ាង សុផល្លែត បានថ្លែងបញ្ជាក់ថា ក្រសួងនឹងសហការជាមួយអាជ្ញាធរដែនដីនៅតាមរាជធានីខេត្តបំផុសចលនាក្នុងការដាំដើមឈើ ហើយលោកលើកទឹកចិត្តដល់ពលរដ្ឋក្នុងរាជធានីភ្នំពេញជាចលនា ចូលរួមដោយស្ម័គ្រចិត្តក្នុងការដាំដើមឈើនៅតាមសហគមន៍ ដើម្បីបង្កើតគម្របបៃតង និងជាការរួមចំណែកចូលរួមទប់ស្កាត់ការឡើងកម្តៅផែនដី៕