ការដាក់ឱ្យប្រើប្រាស់ QR Code លើសញ្ញាបត្របាក់ឌុប ដើម្បីទប់ស្កាត់ការបន្លំឯកសារនានា

អន្តរក្រសួងរួមមាន ក្រសួងអប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍ បានប្រកាសដាក់ឱ្យប្រើប្រាស់ វិញ្ញាបនបត្រ និងសញ្ញាបត្រដែលពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖
៥ ធ្នូ ២០២២ តទៅ ដែលមានដាក់ QR Code ស្តង់ដា​ អាចផ្ទៀងផ្ទាត់បានតាមរយៈ ថ្នាលផ្ទៀងផ្ទាត់ឯកសារ Verify.gov.kh ។

សេចក្តីប្រកាសអន្តរក្រសួងបញ្ជាក់ថា វិញ្ញាបនបត្រនិងសញ្ញាបត្រដែលពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ ដែលមានដាក់ QR Code ស្តង់ដា” មានតម្លៃគតិយុត្តស្មើ នឹងវិញ្ញាបនបត្រ និងសញ្ញាបត្រដែលពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ ក្នុងគោលបំណងផ្តល់ភាពងាយស្រួលដល់សិស្សានុសិស្សយកទៅប្រើប្រាស់ និងជំរុញការធ្វើបរិវត្តកម្មឌីជីថលសេវាសាធារណៈ ស្របតាមគោលនយោបាយ រដ្ឋាភិបាលឌីជីថលកម្ពុជា ២០២២-២០៣៥។

វិញ្ញាបនបត្រនិងសញ្ញាបត្រ ដែលមានដាក់ QR Code  អាចផ្ទៀងផ្ទាត់អំពីយថាភូតភាព បូរណភាព និងសុពលភាពបានតាមរយៈ “ផ្ទាលផ្ទៀងផ្ទាត់ឯកសារ verify.gov.kh” ដែលអភិវឌ្ឍដោយក្រសួងប្រៃសណីយ៍ និងទូរគមនាគមន៍។

អ្នកនាំពាក្យក្រសួងអប់រំ យុវជន និងកីឡា​ លោកស្រី ឃួន វិច្ឆិកា ប្រាប់កម្ពុជាថ្មីបន្ថែមថា ការដាក់ QR Code ទៅលើវិញ្ញាបនបត្រ និងសញ្ញាបត្រដែលទាក់ទងទៅនឹងការប្រឡងសញ្ញាបត្រមធ្យមសិក្សាទុតិយភូមិនេះ គឺដើម្បីសម្រួលក្នុងការផ្ទៀងផ្ទាត់ភាពត្រឹមត្រូវ ក៏ដូចជាសុពលភាពរបស់ឯកសារ ដោយគ្រាន់តែធ្វើការស្កេនទៅលើ QR Code ដោយពុំតម្រូវឱ្យមានធ្វើនីត្យានុកូលកម្មលើឯកសារថតចម្លងនៃសញ្ញាបត្រ និងវិញ្ញាបនបត្រនេះទេ។

លោកស្រីបញ្ជាក់ថា៖« ការប្រើប្រាស់ QR Code ទៅលើសញ្ញាបត្រមធ្យមសិក្សាទុតិយភូមិនេះ គឺយើងចាប់ផ្តើមប្រើប្រាស់ចាប់ពីសម័យប្រឡង ៥ ធ្នូ ២០២២ រហូតមកដល់ពេលបច្ចុប្បន្ន ហើយក្រសួងទាំងពីរ នឹងបន្តសហការរៀបចំប្រើប្រាស់ដាក់ QR Code នេះ ដើម្បីបន្តភាពងាយស្រួល និងទប់ស្កាត់នូវរាល់ការបន្លំ​ឯកសារនានាផងដែរ»។

ជាមួយគ្នានេះ អង្គភាពជំនាញនៃក្រសួងអប់រំ យុវជន និងកីឡា និងអង្គភាពជំនាញនៃក្រសួងប្រៃសណីយ៍និងទូរគមនាគមន៍ ត្រូវសហការគ្នា ដើម្បីអនុវត្តការផ្តល់វិញ្ញាបនបត្រ និងសញ្ញាបត្រដែលពាក់ព័ន្ធនឹងការប្រឡងសញ្ញាបត្រមធ្យមសិក្សា ទុតិយភូមិ សម័យប្រឡង៖ ៥ ធ្នូ ២០២២ តទៅ។

គ្រប់គ្រឹះស្ថានសិក្សាសាធារណៈ និងឯកជន ព្រមទាំងសិស្សានុសិស្ស អាចផ្ទៀងផ្ទាត់និងប្រើប្រាស់វិញ្ញាបនបត្រ និងសញ្ញាបត្រដែលពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ ដោយពុំតម្រូវឱ្យមានការធ្វើនីត្យានុកូលកម្ម លើឯកសារថតចម្លងនៃវិញ្ញាបនបត្រនិងសញ្ញាបត្រដែលពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ ក្នុងទម្រង់ជាក្រដាស៕