គ្រួសារមួយនៅសង្កាត់ប៉ាល់ហាល ក្រុងព្រះវិហារ មានជីវភាពល្អប្រសើរពីការដាំដំណាំសាវម៉ៅ ទុរេន និងផ្លែបំពេញរាជ្យ

អ្នកស្រី ឃួន ស្រីមុំ កសិករដាំដំណាំសាវម៉ាវ ទុរេន និងផ្លែកំពីងរាជ មានទីលំនៅភូមិស្រម៉ូវ សង្កាត់ប៉ាល់ហាល ក្រុងព្រះវិហារ បានឲ្យដឹងនៅល្ងាចថ្ងៃទី០៥ ខែមិថុនា ឆ្នាំ២០២៥នេះថា គ្រួសាររបស់អ្នកស្រីមានជីវភាពល្អប្រសើរតាមរយៈផលដំណាំទាំងនេះ។

អ្នកស្រីបន្តថា សាវម៉ាវឆ្នាំនេះមិនបានផលដូចឆ្នាំមុនទេ គឺដោយសារពេលចេញផ្កាក្ដឹប មានខ្យល់ និងភ្លៀងធ្លាក់ជាប់ៗគ្នាធ្វើឲ្យរួយជ្រុះ និងស្អុយរលួយផ្កាស្ទើរតែអស់។ ដំណាំសាវម៉ៅមានការប្រឈមខ្លាំងក្នុងការថែទាំជាងទុរេន តែសម្រាប់រស់ជាតិសាវម៉ៅលើទឹកដីខេត្តព្រះវិហារ គឺផ្អែមមុតតែម្តង។ អ្នកស្រីបន្ថែមថា សម្រាប់ទីផ្សារសាវម៉ាវលោកស្រីលក់ចេញបាន ៦០០០ រៀល ទៅ ៨០០០រៀលក្នុង ១គីឡូក្រាម។ ហើយភាគច្រើនមានម៉ូយមកទិញដល់កន្លែងសម្រាប់ទុកលក់ឲ្យភ្ញៀវតាមផ្លូវជាតិលេខ៦២។ ចំពោះផ្លែទុរេន នឹងត្រូវប្រមូលផលនៅអំឡុងពាក់កណ្តាលខែមិថុនានេះ។

ទាក់ទងការដាំដំណាំសាវម៉ាវ លោកស្រីសំណូមពរដល់មន្ត្រីជំនាញចុះជួយណែនាំ និងផ្តល់បច្ចេកទេសថ្មីៗដល់កសិករឲ្យកាន់តែទទួលបានផលល្អ។ ជាមួយគ្នានេះដែរ លោកស្រីក៏អំពាវនាវទៅដល់អតិថិជនដែលចូលចិត្តគាំទ្រហូបទុរេន និងសាវម៉ាវ នៅខេត្តព្រះវិហារ សូមជួយបន្តគាំទ្របន្ថែមទៀត។

មន្ត្រីជំនាញនៃខេត្តព្រះវិហារ បានឲ្យដឹងថា មូលហេតុដែលតាមបណ្តាស្រុកផ្សេងមិនប្រកបរបរដាំដំណាំសាវម៉ាវនេះ គឺមាន ២កត្តា។ កត្តាទី១ ប្រភពដីមិនអំណោយផលសម្រាប់ដំណាំសាវម៉ាវ និងកត្តាទី២ មកពីខ្សែសង្វាក់ផលិតកម្មទាបជាងទុរេន ទើបទុរេនមានផ្ទៃដីដាំច្រើនជាងសាវម៉ាវ៕

អត្ថបទ៖ ជុន កុសល