ព័ត៌មានជាតិ

អ្នកការទូតជើងចាស់កម្ពុជាថា ពានរង្វាន់សន្តិភាពស៊ុនហាក់ ពិតជាស័ក្ដិសមបំផុតចំពោះសម្តេចតេជោ

បានផុស

២ years មុន

នៅ

ថ្ងៃចន្ទ ១៤ កុម្ភៈ ២០២២

ដោយ

លោកឧបនាយករដ្ឋមន្រ្តី ហោ ណាហុង ដែលជាអតីតរដ្ឋមន្រ្តីការបរទេស និងសហប្រតិបត្តិការអន្តរជាតិបានលើកឡើងថា ពានរង្វាន់ “សន្តិភាពស៊ុនហាក់ ឆ្នាំ២០២២ (SUNHAK PEACE PRIZE 2022)” នេះ ពិតជាស័ក្តិសមបំផុត សម្រាប់សម្តេចអគ្គមហាសេនាបតីតេជោ ហ៊ុន សែន ពីព្រោះលោកជារដ្ឋបុរសប្រកបដោយគំរូវីរភាពថ្លៃថ្លា គតិបណ្ឌិត និងទេពកោសល្យនយោបាយដ៏ខ្ពង់ខ្ពស់ ជាបិតាស្ថាបនិកសន្តិភាព ដែលបានខិតខំប្រឹងប្រែងអស់ពីកម្លាំងកាយចិត្ត និងបញ្ញាញាណឈ្លាសវៃ ព្រមទាំងបានធ្វើពលិកម្មគ្រប់បែបយ៉ាង ក្នុងបេសកកម្មជាប្រវត្តិសាស្ត្រដ៏ឧត្តុងឧត្តម ដើម្បីសន្តិភាព ជូន មាតុភូមិ និងប្រជាជនកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកឧបនាយករដ្ឋមន្រ្តី ហោ ណាហុង ការទទួលពានរង្វាន់ សន្តិភាពស៊ុនហាក់ ឆ្នាំ២០២២ របស់សម្តេចតេជោនាពេលនេះ គឺជាមហាកិត្តិយសដ៏ធំធេងឧត្តុង្គឧត្ដម វិសេសវិសាល សម្រាប់ប្រទេសជាតិ និងប្រជាជនកម្ពុជា។ លោកបញ្ជាក់ថា សម្ដេចតេជោបានរួមចំណែកយ៉ាងធំធេង ដែលជាតិ និងប្រជាជនកម្ពុជាមិនអាចខ្វះបានក្នុងការរំដោះជាតិ និងប្រជាជនកម្ពុជារួចផុតពីរបបប្រល័យពូជសាសន៍ខ្មែរក្រហម ដែលបានចាប់ផ្តើមពីថ្ងៃ២០ មិថុនា ឆ្នាំ១៩៧៧ និងបន្ទាប់មកនយោបាយ ឈ្នះ ឈ្នះ របស់សម្ដេចបានបញ្ចប់សង្គ្រាមបង្ហូរឈាមនៅកម្ពុជា ធ្វើឱ្យប្រទេសជាតិមានសុខសន្តិភាពពេញលេញ មានការបង្រួបបង្រួមជាតិ និងឯកភាពទឹកដីពេញលេញ មានការធានាឯករាជ្យ និងអធិបតេយ្យជាតិ មានការលើកកម្ពស់លទ្ធិប្រជាធិបតេយ្យ សេរីពហុបក្ស និងនីតិរដ្ឋ ព្រមទាំងធ្វើឱ្យប្រទេសជាតិ មានការអភិវឌ្ឍរីកចម្រើនថ្កុំថ្កើងរុងរឿងខ្ពស់ត្រដែតល្បីល្បាញ នៅលើឆាកអន្តរជាតិ។

អតីតរដ្ឋមន្រ្តីការបរទេសរូបនេះយល់ថា “ពានរង្វាន់សន្តិភាពស៊ុនហាក់នេះ គឺមានអត្ថន័យជារង្វាន់សន្តិភាព ( NOBEL ដែលយកកត្តានយោបាយជាមូលដ្ឋានដែលអត់ទាក់ទងនឹងសន្តិភាពសោះ) ការពិតរង្វាន់សន្តិភាព NOBEL បើមានលក្ខណៈស្វែងរកសន្តិភាពពិតមែន គឺត្រូវផ្តល់ជូនសម្តេចក្រោយពីនយោបាយឈ្នះឈ្នះ របស់សម្តេចតេជោ តាំងពីឆ្នាំ១៩៩៨ ហើយនៅពេលថ្មីៗនេះ សម្ដេចតជោក៏បានខិតខំស្វែងរកសន្តិភាពជូនបរទេសមីយ៉ាន់ម៉ាដែរ ដែលផ្អែកលើ Consensus ៥ ចំនុចដែលចាំបាច់ត្រូវអនុវត្តចំនុចទី១មុនជាចាំបាច់ តែមជ្ឈដ្ឋាននយោបាយខ្លះពុំបានយល់ច្បាស់ អំពី Consensus ៥ ចំនុចនេះទេ។

សូមបញ្ជាក់ថា ប្រសាសន៏របស់លោកឧបនាយករដ្ឋមន្រ្តី ហោ ណាហុង បានធ្វើឡើងនៅក្នុងសារលិខិតអបអរសាទរជូនសម្តេចអគ្គមហាសេនាបតីតេជោ ហ៊ុន សែន នៅថ្ងៃទី១៤ ខែកុម្ភៈ ឆ្នាំ២០២២ នេះ និងបន្ទាប់ពីសម្តេចទទួលជ័យលាភីពានរង្វាន់សន្តិភាពស៊ុនហាក់ ឆ្នាំ២០២២ នៅក្នុងកិច្ចប្រជុំកំពូល ស្តីពីសន្តិភាពនៅឧបទ្វីបកូរ៉េ នាទីក្រុងសេអ៊ូល៕

អត្ថបទ៖ កោះកែវ