ពលរដ្ឋជាង៣០០០នាក់ ភៀសខ្លួនពីតំបន់ប្រឈមនៅបន្ទាត់ព្រំដែនខេត្តព្រះវិហារ ដើម្បីទៅកន្លែងសុវត្ថិភាព

មកដល់ថ្ងៃទី១៧ ខែមិថុនា ឆ្នាំ២០២៥នេះ មានប្រជាពលរដ្ឋប្រមាណជាង៣០០០នាក់ បានភៀសខ្លួនពីតំបន់ប្រឈមគ្នារវាងកងទ័ពកម្ពុជា និងកងទ័ពថៃ នៅតាមបន្ទាត់ព្រំដែន ខេត្តព្រះវិហារ មករកទីសុវត្ថិភាពបណ្ដោះអាសន្ន ស្ថិតក្នុងមណ្ឌលវត្តពោធិ៍៥,០០០ដើម ក្នុងភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។

របាយការណ៍របស់អាជ្ញាធរខេត្តព្រះវិហារ បានឲ្យដឹងថា គិតពីថ្ងៃទី១៦ ដល់១៧ខែមិថុនា ឆ្នាំ២០២៥ នេះ ប្រជាពលរដ្ឋដែលបានមកស្នាក់នៅបណ្ដោះអាសន្ននៅតំបន់សុវត្ថិភាពនេះ មានជាង៣០០០នាក់។

អភិបាលរង និងជាអ្នក​នាំពាក្យ​រដ្ឋបាលខេត្តព្រះវិហារ លោក គឹម ចាន់បញ្ញា បានឱ្យកម្ពុជា​ថ្មី​ដឹង​ថាការ​ភ្លៀសខ្លួន​របស់ពលរដ្ឋ​នេះគឺ​ដោយ​សារពលរដ្ឋមានការ​បារម្ភពីស្ថានភាពនៅ​តំបន់​ព្រំដែនកន្លែង​ដែលខ្លួនរស់នៅ ទោះជា​យ៉ាងណាអាជ្ញាធរ​បាន​ទទួល​រៀបចំកន្លែង​ និងផ្ដល់​គ្រឿងឧបភោគបរិភោគ គាំទ្រ​ដល់​ពលរដ្ឋ​នៅ​មណ្ឌលសុវត្តិភាពនោះ។

លោក​ថា៖ «ជារួម​មិនមាន​ផែន​ការ​សម្រាប់​ជម្លៀសទេ! គ្រាន់តែ​បងប្អូនបារម្ភពី​សុវត្ថិភាព​អ៊ីចឹង​គាត់​ធ្វើ​ដំណើរ​តាម​គោយន្ត តាម​ម៉ូតូ អ៊ីចឹង​ហើយ​ទទួល​គាត់​ឱ្យ​ស្នាក់​នៅ​បណ្ដោះអាសន្នសិន»។

ក្នុងឱកាសនោះ អាជ្ញាធរខេត្តព្រះវិហារ បានថ្លែងនាំនូវប្រសាសន៍ផ្តាំផ្ញើសាកសួរសុខទុក្ខ សេចក្តីនឹករលឹក និងសេចក្តីស្រឡាញ់ដ៏ជ្រាលជ្រៅ ព្រមទាំងពរសព្ទសាធុការពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ជូនចំពោះបងប្អូនប្រជាពលរដ្ឋទាំងអស់នៅក្នុងទីតាំងនេះ។

អាជ្ញាធរខេត្ត បានផ្ដាំផ្ញើដល់បងប្អូនប្រជាពលរដ្ឋទាំងអស់ ត្រូវចេះរក្សាសាមគ្គីភាព ចេះយោគយល់គ្នា យល់ទុក្ខធុរៈគ្នា និងចេះយកអសារគ្នាទៅវិញទៅមក ជាពិសេសត្រូវរក្សាសុខភាពឱ្យល្អ ដោយការប្រតិបត្តិអនាម័យ និងថែរក្សាបរិស្ថានឱ្យស្អាត ដើម្បីចៀសវាងពីឆ្លងមេរោគផ្សេងៗ។

សូមបញ្ជាក់ថា គ្រឿងឧបភោគបរិភោគ ១កញ្ចប់ មាន អង្ករ ២០គីឡូក្រាម, ទឹកត្រី ១យួរ, ទឹកស៊ីអីវ ១យួរ និងក្រមា១ គឺជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត៕

ដោយ៖ជុន កុសល