ឯកអគ្គរដ្ឋទូតកូរ៉េខាងត្បូង សង្ឃឹមថា ស្ពានមិត្តភាពកម្ពុជា-កូរ៉េ នឹងបើកការដ្ឋានដើមឆ្នាំ ២០២៦

នៅក្នុងអាណត្តិជាឯកអគ្គរដ្ឋទូត​សាធារណរដ្ឋកូរ៉េប្រចាំកម្ពុជា លោក Park Jung-Wook បានលើកឡើងពីបេសកកម្មរបស់ខ្លួនបានធ្វើឱ្យទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ មានការរីកចម្រើនគួរឱ្យកត់សម្គាល់ ហើយលោកសង្ឃឹមថា​ ស្ពានមិត្តភាពកម្ពុជា-កូរ៉េ នឹងបើកការដ្ឋានដើមឆ្នាំ ២០២៦ ខាងមុខនេះ។

លោកបានលើកឡើងបែបនេះ នាឱកាសស្ថានទូតកូរ៉េខាងត្បូងប្រចាំកម្ពុជា បានរៀបចំពិធីជំនួប​អាហារ​ថ្ងៃត្រង់​ Farewell Reception (ជម្រាបលា) នាថ្ងៃទី ១៦​ខែកក្កដា ឆ្នាំ ២០២៥  ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ថ្នាក់ដឹកនាំក្រសួង ស្ថាប័ននានា អង្គទូត តំណាងវិស័យឯកជន ភ្ញៀវជាតិ និងអន្តរជាតិ។

ក្នុងឱកាសនេះ លោកឯកអគ្គរដ្ឋទូត បានបង្ហាញសេចក្តីសោមនស្សរីករាយ និងថ្លែងអំណរគុណដល់រាជរដ្ឋាភិបាលកម្ពុជា ចំពោះមិត្តភាពយ៉ាងកក់ក្ដៅ និងកិច្ចសហប្រតិបត្តិការប្រកបដោយការយកចិត្តទុកដាក់ខ្ពស់អំឡុងពេលបំពេញបេសកកម្មនៅកម្ពុជាកាលពីឆ្នាំ ២០២៣មក ។ ជាមួយគ្នានេះលោកសង្ឃឹមថា ស្ពានមិត្តភាពរវាងកម្ពុជា និងកូរ៉េខាងត្បូង នឹងបើកការដ្ឋាននាពេលឆាប់ៗ ជាពិសេសនៅក្នុងដើមឆ្នាំ២០២៦ នៅឆ្នាំក្រោយនេះ។

ស្ពានមិត្តភាពកម្ពុជា-សាធារណរដ្ឋកូរ៉េ (ផ្សារចាស់-ជ្រោយចង្វារ និង​ជ្រោយចង្វារ-អរិយក្សត្រ) គ្រោង​ចំណាយថវិកា​សាងសង់​ប្រមាណ ២៤០ លាន​ដុល្លារអាមេរិក។ ​ស្ពាន​នេះ​ត្រូវសាងសង់ចំនួន ២ ខ្សែ ដោយខ្សែទី១ តភ្ជាប់ពីខាងមុខផ្សាររាត្រី​ឆ្លងកាត់​ទន្លេសាប​ទៅកាន់​តំបន់ជ្រោយចង្វារ និងខ្សែទី២ តភ្ជាប់ពីជ្រោយចង្វារឆ្លងកាត់ទន្លេមេគង្គទៅអរិយក្សត្រ​។ អំឡុងខែមករា ឆ្នាំ ២០២៥ ក្រុមការងារអន្តរក្រសួង និងអាជ្ញាធររាជធានីភ្នំពេញ ​បានចុះ​ទៅ​ពិនិត្យនិងសិក្សាលើលំហូរចរាចរណ៍​គម្រោងសាងសង់​ស្ពានមិត្តភាពកម្ពុជា-កូរ៉េ ដើម្បីឈានទៅបើកការដ្ឋានឆាប់ៗខាងមុខនេះ។

គួរជម្រាបថា នៅក្នុងអាណត្តិជាឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជារបស់លោក Park Jung-Wook បានរៀបចំនូវដំណើរទស្សនកិច្ចរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ​ព្រះរាជាណាចក្រកម្ពុជា​ ទៅកាន់ប្រទេសកូរ៉េខាងត្បូងកាលពីឆ្នាំ២០២៤ កន្លងទៅ និងបានលើកស្ទួយដល់ការពង្រីកកិច្ចសហប្រតិបត្តិការជាច្រើន តាមរយៈការជំរុញ​ការចូលរួមចំណែករបស់កូរ៉េខាងត្បូងជួយដល់វិស័យនានា និង​គម្រោងអភិវឌ្ឍនៅតាមបណ្ដាក្រសួងស្ថាប័ននៅកម្ពុជា៕