ព័ត៌មានជាតិ

យប់នេះសមត្ថកិច្ចខេត្តកំពង់ស្ពឺនឹងចុះអនុវត្តច្បាប់ចំពោះភោជនីយដ្ឋាននិងអាហារដ្ឋានណាល្មើសបម្រាម

បានផុស

៥ years មុន

នៅ

ថ្ងៃសៅរ៍ ៣ មេសា ២០២១

ដោយ

ភោជនីយដ្ឋាន អាហារដ្ឋាន តូបលក់អាហារចល័ត ហាងលក់ភេសជ្ជៈ និងគ្រឿងស្រវឹងនានា នៅក្នុងភូមិសាស្ត្រខេត្តកំពង់ស្ពឺ នឹងត្រូវផ្អាកការទទួលអតិថិជនចាប់ពីម៉ោង៨យប់ ថ្ងៃទី០៣រហូតដល់ម៉ោង៥ទៀបភ្លឺ ថ្ងៃទី០៤ ខែមេសាឆ្នាំ២០២១ ដើម្បីទប់ស្កាត់ការឆ្លងរាលដាលជំងឺកូវីដ១៩។

នាយករដ្ឋបាលសាលាខេត្តកំពង់ស្ពឺ លោក កែវ គុជសី បានមានប្រសាសន៍នៅរសៀលថ្ងៃទី០៣ខែមេសានេះថា ចាប់ពីម៉ោង៨យប់នេះទៅ ក្រុមសមត្ថកិច្ចចម្រុះខេត្តកំពង់ស្ពឺនឹងចុះពិនិត្យនៅតាមភោជនីយដ្ឋាន អាហារដ្ឋាន តូបលក់អាហារចល័ត ហាងលក់ភេសជ្ជៈ និងគ្រឿងស្រវឹងនានា ដើម្បីធ្វើការត្រួតពិនិត្យ តើហាងទាំងនោះអនុវត្តទៅតាមវិធានការរដ្ឋបាលដែលរដ្ឋបាលខេត្តបានដាក់ចេញកាលពីម្សិលមិញដែរឬយ៉ាងណា។

លោកបានបន្តថា មុននឹងអនុវត្តជាក់ស្តែង កាលពីថ្ងៃទី០២ ខែមេសា រដ្ឋបាលខេត្តបានចុះណែនាំ ផ្សព្វផ្សាយដល់ម្ចាស់ភោជនីយដ្ឋាន អាហារដ្ឋាន តូបលក់អាហារចល័ត ហាងលក់ភេសជ្ជៈនិងគ្រឿងស្រវឹងនានារួចហើយ។

លោកបានបន្តទៀតថា«ជាទូទៅឃើញថាបងប្អូនពួកគាត់បានយល់ច្បាស់ និងចូលរួមសហការបានល្អ»។

រដ្ឋបាលខេត្តកំពង់ស្ពឺ កាលពីថ្ងៃទី០២ ខែមេសា បានដាក់ចេញវិធានការរដ្ឋបាលបណ្ដោះអាសន្នក្នុងការទប់ស្កាត់ការរាលដាលជំងឺកូវីដ១៩ ក្នុងភូមិសាស្ត្រខេត្តកំពង់ស្ពឺ ដែលមានថេរវេលាអនុវត្តរយៈពេលពីរសប្តាហ៍ គឺចាប់ពីថ្ងៃទី០២ រហូតដល់ថ្ងៃទី១៥ ខែមេសា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះតម្រូវឲ្យផ្អាកអាជីវកម្មដូចជាភោជនីយដ្ឋានអាហារដ្ឋាន តូបលក់អាហារចល័ត ហាងលក់ភេសជ្ជៈ គ្រឿងស្រវឹងដែលបើកបម្រើអតិថិជនទទួលទានត្រូវផ្អាកទទួលភ្ញៀវជាបណ្ដោះអាសន្នចាប់ពីម៉ោង៨ដល់ម៉ោង៥ព្រឹកជាកំហិត និងផ្អាកជាបណ្ដោះអាសន្ននូវរាល់សកម្មភាពកីឡាដែលមានលក្ខណៈជួបជុំ ឬការប្រមូលផ្ដុំច្រើន។

រដ្ឋបាលខេត្តបានបន្តថា រាល់ការជួបជុំ ឬការប្រមូលផ្ដុំមនុស្សត្រូវបានលើកលែងក្នុងករណីចាំបាច់មួយចំនួនដូចជា សកម្មភាពអាជីវកម្មតាមភោជនីយដ្ឋាន អាហារដ្ឋាន តូបអាហារចល័តអាចបម្រើសេវាជាលក្ខណៈវេចខ្ចប់ ការជួបជុំលក្ខណៈសមាជិកគ្រួសារដែលរស់នៅក្នុងលំនៅឋាន ឬទីសំណាក់ជាមួយគ្នា និងការរៀបចំពិធីបុណ្យសពដោយគោរពតាមវិធានការក្រសួងសុខាភិបាល ឬតាមការកំណត់របស់អាជ្ញាធរមានសមត្ថកិច្ច ការជួបជុំរបស់បុគ្គលិកសុខាភិបាលដែលបំពេញការងារថែរក្សាសង្គ្រោះបន្ទាន់ផ្សេងទៀត ការជួបជុំរបស់អាជ្ញាធរមានសមត្ថកិច្ចកម្លាំងគណៈបញ្ជាការឯកភាពរដ្ឋបាលខេត្តក្រុង ស្រុក ឃុំ សង្កាត់ ក្នុងការបំពេញភារកិច្ចថែរក្សាសន្តិសុខសណ្តាប់ធ្នាប់និងរៀបរយសាធារណៈ។

រដ្ឋបាលខេត្តព្រមានថា គ្រប់ម្ចាស់អាជីវកម្ម និងប្រជាពលរដ្ឋទាំងឡាយណាដែលមិនចូលរួមអនុវត្តតាមខ្លឹមសារនៃសេចក្តីណែនាំនេះ រដ្ឋបាលខេត្តនឹងអនុវត្តវិធានការរដ្ឋបាលតាមផ្លូវច្បាប់ដូចបានកំណត់ក្នុងច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងៗ ព្រមទាំងលិខិតបទដ្ឋានគតិយុត្តពាក់ព័ន្ធជាធរមាន៕

អត្ថបទ ៖ សំអឿន

Related Topics:រដ្ឋបាលខេត្តកំពង់ស្ពឺ បម្រាមគោចរ