សភាពាណិជ្ជកម្មអាមេរិក អ៊ីស្រាអ៊ែល និង​អឺរ៉ុប ស្ថិត​ក្នុង​ប្រតិភូដែលព្រឹទ្ធសភាកម្ពុជា​នាំ​ទៅ​មើលការ​បំពាន​សិទ្ធិ​មនុស្ស​របស់​ទាហានថៃលើដី​កម្ពុជា

អនុប្រធានទី​២ព្រឹទ្ធសភាកម្ពុជាលោក ធន់ វឌ្ឍនា បាន​ដឹក​នាំតំណាង​សភាពាណិជ្ជកម្ម​បរទេស​មួយ​ចំនួន​រួមមានសភាពាណិជ្ជកម្មអាម៉េរិក អឺរ៉ុប អូស្រ្តាលី អ៊ីស្រាអែល ឥណ្ឌា ហ្វ៊ីលីពីន សិង្ហបុរី និងក្រុមហ៊ុនឯកជនមួយចំនួនទៀត បានអញ្ជើញចុះទៅពិនិត្យស្ថានភាពជាក់ស្តែងនៅព្រំដែន កម្ពុជា-ថៃ ដែលទាហានថៃបានរាយបន្លាលួស និងបានយកកង់ឡានបិទផ្លូវ និងជួបសំណេះសំណាលជាមួយប្រជាពលរដ្ឋដែលមិនអាចត្រឡប់ទៅទីលំនៅឋានខ្លួនវិញបាន ស្ថិតនៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

គួរឱ្យដឹង​ផងដែរ​ថាទាហាន​ថៃបាន​ចាប់​ផ្ដើម​ចូលម​ករាយលួសបន្លាដេញពលរដ្ឋ​ខ្មែ​ចេញពីផ្ទះ​ និង​បំផ្លាញ​ផ្ទះ​សំបែង​របស់ពលរដ្ឋ​ខ្មែរដោយចាប់​ផ្ដើម​ពី​ថ្ងៃទី​ទី​១៧ ខែ​សីហា នៅឃុំ​អូបីជាន់​ ស្រុកអូរជ្រៅ ខេត្តបន្ទាយមាន​ជ័យ​។ ក្រោយ​ការបណ្ដេញចេញ​នេះពលរដ្ឋ​នៅ​បន្ត​ដេក​ក្រោម​តង់ក្បែរ​បន្លាលួស និង​កង់ឡាន​ដែល​ថៃដាក់នោះរហូត​មកដល់ពេល​នេះ។

ក្នុង​ពេលជួប​ជាមួយ​ពលរដ្ឋ​អនុប្រធានទី​២ ព្រឹទ្ធសភា លោក ធន់ វឌ្ឍនា បានប្រាប់​ប្រជាពលរដ្ឋទាំងអស់ ឱ្យមានជំនឿជាក់មុតមាំលើរាជរដ្ឋាភិបាលកម្ពុជា ក្នុងការដោះស្រាយជម្លោះព្រំដែននេះ។ លោក​ក៏បានអំពាវនាវឱ្យប្រជាពលរដ្ឋ និងកងកម្លាំងទាំងអស់ តស៊ូ អត់ធ្មត់ និងសាមគ្គីគ្នាឱ្យបានរឹងមាំជាធ្លុងមួយក្នុងបរិបទនៃជម្លោះព្រំដែន កម្ពុជា-ថៃ និងគោរពឱ្យបានខ្ជាប់ខ្ជួននូវកិច្ចព្រមព្រៀងស្តីពីបទឈប់បាញ់ដែលបានអនុវត្តចាប់ពីថ្ងៃទី២៨ ខែកក្កដា ឆ្នាំ២០២៥ កន្លងមក។

ការ​នាំ​ក្រុម​សភាពាណិជ្ជកម្ម​ប្រទេស​មាន​សេដ្ឋកិច្ចធំៗ​ទាំង​នេះ​ទៅកន្លែង​ដែល​ថៃ​ដេញពលរដ្ឋខ្មែ​ចេញពី​ផ្ទះសំបែងគឺតែ​ប៉ុន្មាន​ថ្ងៃ​ប៉ុណ្ណោះបន្ទាប់ពី​អគ្ករាជទូត​កម្ពុជា​ប្រចាំ​អង្គការ​សហប្រជាជាតិលោក កែវ ឈា បាន​រាយការណ៍ពី​សកម្មភាព​រំលោភសិទ្ធិ​មនុស្ស​របស់​ទ័ព​ថៃ​ និង​រូប​ថត​ឯកសារ​នៃ​ការ​បំពាន​ទាំង​នោះ​ទៅ​អគ្កលេខាធិការ​អង្គការ​សហប្រជាជាតិ​កាលពី​ថ្ងៃទី​២៧ ខែ​សីហាកន្លង​ទៅ៕

អត្ថបទដោយ ហ៊ុន សិរីវឌ្ឍន៍