នៅព្រឹកនេះ បុគ្គលិកអប់រំ ចាប់ផ្តើមផ្ទៀងផ្ទាត់សន្លឹកកិច្ចការរបស់បេក្ខជនដើម្បីធ្វើកំណែ

នៅព្រឹកថ្ងៃទី ១​ ខែ កញ្ញានេះ បុគ្គលិកអប់រំ ចាប់ផ្តើមសកម្មភាព​​​ពិនិត្យ​ផ្ទៀងផ្ទាត់ ចុះ​អក្សរ​សម្ងាត់ និង​កាត់​ក្បាល​សន្លឹក​កិច្ចការ​បេក្ខជន​ប្រឡង​សញ្ញាបត្រ​មធ្យម​សិក្សា​ទុតិយភូមិ​នៅ​តាម​មណ្ឌល​កំណែ​ទាំង​១០ ​ដើម្បីត្រៀមរៀបចំធ្វើកំណែរបស់បេក្ខជន។

ប្រធាន អនុប្រធាន​មណ្ឌល​កំណែ និង​សមាជិក​គណៈកម្មការ​​​​ក្រុម​មុខវិជ្ជា នៅ​តាម​មណ្ឌល​កំណែទាំង១០ កំពុង​មាន​ភាព​មមាញឹក​ក្នុង​ការ​រាប់ ពិនិត្យ ផ្ទៀងផ្ទាត់ ចុះ​អក្សរសម្ងាត់ និង​កាត់​ក្បាល​សន្លឹក​កិច្ចការ​បេក្ខជន ដើម្បី​ត្រៀម​រៀបចំ​ដំណើរ​ការ​កំណែ​នៃ​ការ​ប្រឡង​សញ្ញាបត្រ​មធ្យមសិក្សា​ទុតិយភូមិ​សម័យ​ប្រឡង ៖ ២៨ សីហា ២០២៥ ក្រោមការពិនិត្យតាមដានអង្គភាពប្រឆាំងអំពើពុករលួយ។ ក្រសួងអប់រំបញ្ជាក់ថា៖«គណៈមេប្រយោគគ្រប់រូប បានអនុវត្តតួនាទីរបស់ខ្លួន យ៉ាងហ្មត់ចត់ និងយកចិត្តទុកដាក់ប្រកបដោយស្មារតីទទួលខុសត្រូវ»។

ដើម្បីតម្លាភាព ក្រសួងអប់រំហាមយកចូល និងប្រើប្រាស់ទូរសព្ទដៃនៅក្នុងមណ្ឌលកំណែ។ ក្រសួងព្រមានថា៖«អ្នកដែលអ្នកប្រព្រឹត្តល្មើសគោលការណ៍ណែនាំណាមួយ នឹងត្រូវទទួលខុសត្រូវចំពោះមុខច្បាប់ និងមិនអនុញ្ញាតឱ្យចូលរួមក្នុងដំណើរការប្រឡងជារៀងរហូត»។ លើសពីនេះ សម្រាប់អ្នកដែលមិនអាចទុកទូរសព្ទក្នុងហឹបសុវត្ថិភាពបានមុនចូលអនុវត្តការងារនៅក្នុងមណ្ឌលកំណែ ត្រូវលាលែងពីការងារកំណែភ្លាម។

គួរជម្រាបថា ដំណើរការកំណែ ប្រព្រឹត្តទៅ ចាប់ពីថ្ងៃទី៣១ ខែសីហា ដល់ថ្ងៃទី៦ ខែកញ្ញា ឆ្នាំ២០២៥ ខណៈដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ចាប់ពីថ្ងៃទី៧ ដល់ថ្ងៃទី១៨ ខែកញ្ញា ឆ្នាំ២០២៥។ ចំណែកដំណើរការបោះពុម្ពលទ្ធផលប្រឡង ប្រព្រឹត្តទៅនាថ្ងៃទី១៩ ខែកញ្ញា ឆ្នាំ២០២៥។

ក្រសួងកំណត់យកថ្ងៃទី២០ ខែកញ្ញា ឆ្នាំ២០២៥ សម្រាប់ប្រកាសលទ្ធផលប្រឡងតាមមណ្ឌលសំណេរ នៃរាជធានី ខេត្តទាំង ២៥ នៅទូទាំងប្រទេស៕