កិច្ចប្រជុំលើកទី២ រវាងនគរបាលកម្ពុជានិង គណៈប្រតិភូថៃស្តីពីផែនការ សកម្មភាព ទប់ស្កាត់ និងបង្ក្រាបបទល្មើសឆ្លងដែន ត្រូវបានលើកពេល

តាមការឱ្យដឹងពីលោក ស៊ាង ធារិទ្ធ អគ្គស្នងការរងនគរបាលជាតិ និងជាប្រធានគណៈប្រតិភូកម្ពុជា នៅល្ងាចថ្ងៃទី២៤ ខែកញ្ញា ឆ្នាំ២០២៥ នេះ បានលើកឡើងថា កិច្ចប្រជុំលើកទី២ រវាងនគរបាលជាតិកម្ពុជានិងគណៈប្រតិភូថៃ គ្រោងនឹងធ្វើនៅថ្ងៃទី២៦ ខែកញ្ញា ឆ្នាំ២០២៥ ដែលកម្ពុជាធ្វើជាម្ចាស់ផ្ទះដើម្បីពិនិត្យលើសេចក្តីព្រាងផែនការសកម្មភាពកិច្ចសហប្រតិបត្តិ្កការទប់ស្កាត់និងបង្ក្រាបបទល្មើសឆ្លងដែន រួមទាំងការឆបោកតាមប្រព័ន្ធបច្ចេកវិទ្យានិងជួញដូរមនុស្ស តែត្រូវបានលើកពេល ហើយមិនទាន់កំណត់ពេលវេលាជាក់លាក់។

លោក អគ្គស្នងការរងនគរបាលជាតិបានបញ្ជាក់ថា បច្ចុប្បន្ន ភាគីកម្ពុជាកំពុងរង់ចាំលិខិតជូនដំណឹងជាផ្លូវការពីភាគីថៃ។ ដោយផ្អែកតាមកំណត់ហេតុកិច្ចប្រជុំលើកទី១ រវាងនគរបាលជាតិកម្ពុជា និងគណៈប្រតិភូថៃ កាលពីថ្ងៃទី១៦ ខែកញ្ញា ឆ្នាំ២០២៥ ភាគីទាំងពីរនឹងបន្តជួបគ្នាជាលើកទី២។

ភាគីទាំងពីរបានឯកភាពគ្នាយកថ្ងៃទី២៦ ខែកញ្ញា ឆ្នាំ២០២៥ ជាកាលកំណត់ជួបគ្នាលើកទី២ ក្នុងនោះដែរភាគីកម្ពុជាបានត្រៀមខ្លួនរួចជាស្រេចទាំងការទំនាក់ទំនងអញ្ជើញភាគីថៃ ខ្លឹមសារ និងទីកន្លែង ប៉ុន្តែនៅថ្ងៃទី២៤ ខែកញ្ញា ឆ្នាំ២០២៥ ភាគីថៃបានជូនដំណឹងក្រៅផ្លូវការតាមរយៈអនុព័ន្ធនគរបាលភូមិន្ទថៃអមស្ថានទូតប្រចាំក្រុងភ្នំពេញថា ត្រូវលើកពេលវេលានិង មិនបានបញ្ជាក់កំណត់ពេលវេលាជាក់លាក់ណាមួយឡើយ៕
ប្រភព ៖ លោកនេត្រ ភក្ត្រា