លទ្ធផលសិក្ខាសាលាយុទ្ធសាស្ត្រខេត្តកំពង់ស្ពឺ ត្រូវបានផ្សព្វផ្សាយ និងចងក្រងជាឯកសារជំនួយស្មារតីដល់មន្ត្រីគណបក្សក្នុងខេត្តកំពង់ស្ពឺគ្រប់ជាន់ថ្នាក់

កិច្ចប្រជុំ «ផ្សព្វផ្សាយលទ្ធផលសិក្ខាសាលាយុទ្ធសាស្ត្រខេត្តកំពង់ស្ពឺ» បានប្រព្រឹត្តទៅនាព្រឹកថ្ងៃទី១៥ ខែវិច្ឆិកា ឆ្នាំ២០២៥ នៅវិមាន ៧ មករា ទីស្នាក់ការកណ្តាលគណបក្សប្រជាជនកម្ពុជា ក្រោមការដឹកនាំរបស់កិត្តិសេដ្ឋាបណ្ឌិត ឆាយ ថន សមាជិកគណៈអចិន្រ្តៃយ៍ និងជាប្រធានកិត្តិយសក្រុមការងារគណបក្សចុះជួយខេត្តកំពង់ស្ពឺ និង ឧបនាយករដ្ឋមន្ត្រី  ហ៊ុន ម៉ានី សមាជិកគណៈអចិន្រ្តៃយ៍ និងជាប្រធានក្រុមការងារគណបក្សចុះជួយខេត្តកំពង់ស្ពឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនេះ លោកកិត្តិសេដ្ឋាបណ្ឌិត ឆាយ ថន បានលើកឡើងថា លទ្ធផលនៃសិក្ខាសាលាដែលក្រុមការងារគណបក្សសម្រេចបាន គឺជាឯកសារដ៏ល្អដែលឆ្លុះបញ្ចាំងពីភាពខ្លាំងនៃមូលដ្ឋានខេត្តកំពង់ស្ពឺ ក៏ដូចជាឯកសារជំរុញ រួមទាំងរក្សាភាពឈ្នះនៅទូទាំងខេត្តកំពង់ស្ពឺ និងនិយាយជារួមធានាភាពឈ្នះនៅទូទាំងប្រទេស។ លោក ក៏បានលើកទឹកចិត្តឱ្យថ្នាក់ដឹកនាំ ក្រុមការងារគណបក្សខេត្តចូលរួមតម្កល់ភាពឈ្នះនេះជារៀងរហូត ដើម្បីធានាសន្តិភាព ស្ថិរភាព និងអាចដោះស្រាយបាននូវបញ្ហាប្រឈមផ្សេងៗ ឆ្ពោះទៅរកការអភិវឌ្ឍរបស់ប្រទេសជាតិ។

មានប្រសាសន៍នៅក្នុងកិច្ចប្រជុំនេះ ឧបនាយករដ្ឋមន្ត្រី ហ៊ុន ម៉ានី បានថ្លែងអំណរគុណដល់ឯកឧត្តម លោកជំទាវ ក្រុមការងារគណបក្សខេត្តកំពង់ស្ពឺគ្រប់ឋានានុក្រម ដែលបានអនុវត្តកិច្ចការងាររហូតសម្រេចបានសមិទ្ធផលជាច្រើនជូនគណបក្ស ក្នុងនោះរួមទាំងឯកសារលទ្ធផលសិក្ខាសាលាយុទ្ធសាស្ត្រនាពេលនេះផងដែរ និងសង្ឃឹមថា ឯកសារលទ្ធផលសិក្ខាសាលាយុទ្ធសាស្ត្រ រួមទាំងឯកសារសំខាន់ៗដែលក្រុមការងារបក្សសម្រេចបាន គឺក្លាយជាឯកសារជំនួយស្មារតីដល់សមាជិកបក្ស និងឈានដល់ការពិគ្រោះយោបល់ ការប្ដេជ្ញាចិត្តឆ្ពោះទៅនិងការប្ដេជ្ញាចិត្តរបស់ក្រុមការងារគណបក្សខេត្ត ឆ្ពោះទៅការបោះឆ្នោតឆ្នាំ២០២៧-២០២៨។

សូមជម្រាបថា កិច្ចប្រជុំ «ផ្សព្វផ្សាយលទ្ធផលសិក្ខាសាលាយុទ្ធសាស្ត្រខេត្តកំពង់ស្ពឺ» មានកិច្ចពិភាក្សា និងបទបង្ហាញអំពីទស្សនៈ បទពិសោធ និងលទ្ធផលដែលគណបក្សខេត្ត និងមូលដ្ឋានបានអនុវត្តកន្លងមក ការកំណត់ចំណុចឈ្នះរបស់គណបក្សនាពេលកន្លងមក។ បន្ទាប់ពីកិច្ចពិភាក្សា និងការផ្សព្វផ្សាយពីលទ្ធផលនៃសិក្ខាសាលាយុទ្ធសាស្ត្រ អង្គប្រជុំក៏បានប្រគល់ឯកសារសិក្ខាសាលាយុទ្ធសាស្ត្រខេត្តកំពង់ស្ពឺ ជូនប្រធានក្រុមការងារគណបក្សចុះមូលដ្ឋានក្នុងក្រុង/ស្រុក ទាំង៩ផងដែរ ដើម្បីយកទៅអនុវត្ត ដើម្បីធានាជ័យជម្នះជូនគណបក្សក្នុងការបោះឆ្នោតនាពេលខាងមុខ៕