នយោបាយ
សម្តេចហ៊ុន សែន ព្រមាន លោកកាស៊ីត ភិរម្យ កុំឱ្យមក«ចេះដឹង»រឿងការងាររបស់កម្ពុជាចំពោះបញ្ហានៅមីយ៉ាន់ម៉ា
សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជានៅព្រឹកថ្ងៃព្រហស្បត្តិ៍នេះ បានប្រតិកម្មទៅនឹងលោកកាស៊ីត ភិរម្យ អតីតរដ្ឋមន្រ្តីការបរទេសថៃដែលបានសម្តែងការមិនពេញចិត្តចំពោះគម្រោងដំណើរទស្សនកិច្ចរបស់ថ្នាក់ដឹកនាំកំពូលកម្ពុជាទៅកាន់ប្រទេសមីយ៉ាន់ម៉ានាពេលខាងមុខ។ សម្តេចតេជោ បានព្រមានលោកកាស៊ីត ភិរម្យថា កុំឱ្យមក«ចេះដឹង»រឿងការងាររបស់កម្ពុជាចំពោះបញ្ហានៅក្នុងប្រទេសមីយ៉ាន់ម៉ា។
នៅក្នុងឱកាសអញ្ជើញចុះទៅត្រួតពិនិត្យការដ្ឋានសាងសង់ព្រលានយន្តហោះអន្តរជាតិភ្នំពេញនៅព្រឹកថ្ងៃព្រហស្បតិ៍នេះ សម្តេចតេជោ ហ៊ុន សែន បានមានប្រសាសន៍ថា៖«ទុកឱ្យអ្នកឯងប្រឆាំងនៅម្ខាងទៅ ហើយខ្ញុំដោះស្រាយការងាររបស់ខ្ញុំ ជាសិទ្ធិអំណាចរបស់ខ្ញុំ ហើយការសង្គ្រោះពីអាស៊ានបែកបាក់ពី១០មកនៅតែ៩ ឱ្យទៅជាអាស៊ាន១០ តើខ្ញុំមានកំហុស ឬអត់? ហ្នឹងចោទជាសំណួរទៅ! ឱ្យពួកអ្នកវិភាគលើសកលលោកផ្នែកខាង គេហៅថា ផ្នែកខាងអន្តរជាតិ អ្នកសរសេរអត្ថបទធំៗលើពិភពលោកឱ្យគេវិភាគទៅ តើអាស៊ានគួរទុក៩ឱ្យខុសនឹងធម្មនុញ្ញអាស៊ាន ឬអាស៊ានត្រូវមាន១០ បញ្ហា វាតែប៉ុណ្ណឹង»។
ជាមួយគ្នានេះ សម្តេចតេជោ ហ៊ុន សែន ក៏បានគូសបញ្ជាក់ថា លោកកាស៊ីត ភិរម្យនេះ តែងតែប្រឆាំងនឹងកម្ពុជា ហើយសម្តេចប្រាប់ឱ្យលោកកាស៊ីត ភិរម្យ បន្តប្រឆាំងទៀតចុះ។ បើតាមសម្តេចតេជោ គោលជំហររបស់លោកកាស៊ីត ភិរម្យ ចំពោះបញ្ហានៅក្នុងប្រទេសមីយ៉ាន់ម៉ានេះ គឺផ្ទុយនឹងគោលជំហររបស់រដ្ឋាភិបាលថៃខ្លួនឯងផង និងផ្ទុយនឹងគោលជំហររបស់រដ្ឋាភិបាលកម្ពុជាផង។
លោកកាស៊ីត ភិរម្យ អតីតរដ្ឋមន្រ្តីការបរទេសថៃនៅក្នុងសប្តាហ៍នេះ បានសម្តែងការមិនពេញចិត្ត និងបានជំទាស់ទៅនឹងគម្រោងដំណើរទស្សនកិច្ចរបស់ប្រមុខរដ្ឋាភិបាលកម្ពុជាទៅកាន់ប្រទេសមីយ៉ាន់ម៉ានាថ្ងៃទី៧ និងទី០៨ ខែមករា ឆ្នាំ២០២២ខាងមុខ។ អ្វីជាការកត់សម្គាល់ គឺអតីតរដ្ឋមន្រ្តីការបរទេសថៃរូបនេះ កាលពីអំឡុងឆ្នាំ២០០៩ និងឆ្នាំ២០១០ នៅពេលថៃមករំលោភបំពានតំបន់ព្រះវិហាររបស់កម្ពុជានោះ គឺលោកកាស៊ីត ភិរម្យនេះ បានប្រើប្រាស់ពាក្យសម្តីមិនសមរម្យ និងរករឿងកម្ពុជាជាបន្តបន្ទាប់ ជាពិសេស មកលើសម្តេចតេជោនាយករដ្ឋមន្រ្តីតែម្តង។ ប៉ុន្តែ នៅចុងក្រោយ បានសរសេរលិខិតមកសុំទោសសម្តេចតេជោនាយករដ្ឋមន្រ្តីកម្ពុជាវិញ៕
អត្ថបទ៖ វណ្ណ សុគន្ធា
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍៣ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ២ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore