អ្នកវិភាគ ៖ ការគាំទ្របក្សហ៊្វុនស៊ិនប៉ិច នឹងមិនប្រែប្រួលខ្លាំងឡើយ ទោះបីជាមានប្រធានបក្សថ្មី

អ្នកវិភាគបញ្ហានយោបាយ បានលើកឡើងថា ការគាំទ្រគណបក្សហ៊្វុនស៊ិនប៉ិច សម្រាប់ការបោះឆ្នោតនាពេលខាងមុខ នឹងមិនមានការប្រែប្រួលខ្លាំងនោះឡើយ បើទោះបីជាគណបក្សហ៊្វុនស៊ិនប៉ិច មានប្រធានគណបក្សថ្មី ក៏ដោយ។ តែទោះជាយ៉ាងណា អ្នកវិភាគដដែលនេះ បានផ្ដល់អនុសាសន៍ ៥ចំណុច ដល់គណបក្សហ៊្វុនស៊ិនប៉ិច ដើម្បីអាចទទួលបានការគាំទ្រឡើងវិញ។

លោកបណ្ឌិត គិន ភា អ្នកវិភាគបញ្ហានយោបាយ និងជាប្រ​ធា​នវិទ្យាស្ថានទំនាក់ទំនង អន្តរជាតិកម្ពុជា នៃ​រាជបណ្ឌិត្យ សភាកម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ១៤ ខែធ្នូនេះថា កន្លងមកគណបក្សហ៊្វុនស៊ិនប៉ិច បានជួបបញ្ហាបែកបាក់ និងការបង្រួបបង្រួមគ្នា ជាច្រើនលើកជាច្រើនសារ ហើយបន្ទាប់ពីសម្ដេច​ក្រុមព្រះ នរោត្តម រណឫទ្ធិ យាងចូលព្រះទិវង្គតទៅ គឺព្រះអង្គម្ចាស់ នរោត្តម ចក្រាវុធ ដែលជាបុត្រា​ច្បង នឹងត្រូវឡើងធ្វើជាប្រធានគណបក្សហ៊្វុនស៊ិនប៉ិច នាពេលខាងមុខ។

លោកថា សម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ឆ្នាំ ២០២២ និងការបោះឆ្នោតជ្រើសតាំងតំណាងរាស្រ្ដឆ្នាំ ២០២៣ខាងមុខ គឺការគាំទ្រគណបក្សហ៊្វុនស៊ិនប៉ិច ពីសំណាក់ប្រជាពលរដ្ឋម្ចាស់ឆ្នោត មិនមានការប្រែប្រួលខ្លាំងនោះឡើយ។ លោកបណ្ឌិត គិន ភា បានលើកឡើងថា ការបោះឆ្នោតប៉ុន្មានអា​ណត្តិចុងក្រោយនេះ គឺគណ​បក្ស​ហ៊្វុនស៊ិនប៉ិច ស្ទើរតែបាត់បង់ទាំងស្រុង នូវការគាំទ្រពីប្រជាពលរដ្ឋ។

ការបាត់បង់ការគាំទ្រនេះ កើតឡើងដោយសារតែពុំមានគោលនយោបាយច្បាស់លាស់ ក្រៅតែពីឃោ​ស​នាអំពីកេរ្តិ៍ដំណែលរបស់អង្គសម្ដេចឪ និងម្យ៉ាងទៀតវិន័យផ្ទៃក្នុងនៃគណបក្សនេះ ហាក់មានភាពធូររលុង ដែលនាំឲ្យមន្ត្រីជាន់ខ្ពស់មួយចំនួន បង្កបញ្ហាធ្វើឲ្យបែកបាក់ផ្ទៃក្នុង។ នេះបើតាមការកត់សម្គា​ល់របស់លោកបណ្ឌិត​ គិន ភា ដែលបានបន្ថែមថា «ទី២ បទពិសោធន៍ ដែលគណបក្សហ៊្វុនស៊ិនប៉ិច មាននៅក្នុងការរួមចំណែកដឹកនាំហ្នឹង ក៏វាហាក់ដូចជាមិនបានមានសមិទ្ធផលជាដុំគំភួន ដែលធ្វើឲ្យប្រជាពលរដ្ឋមានភាពកក់ក្ដៅនៅក្នុងចិត្ត អញ្ចឹងនៅពេលប្រជាពលរដ្ឋ បាត់ភាពកក់ក្ដៅក្នុងចិត្តហើយ គឺពិបាកនឹងមានការសង្ឃឹមថា មានការប្រែប្រួល ឬការវិវត្តន៍ជាវិជ្ជមានអីសម្រាប់គណបក្ស»។

ទោះបីជាយ៉ាងណាក៏ដោយ អ្នកវិភាគបញ្ហានយោបាយលោកបណ្ឌិត គិន ភា បានគូសបញ្ជាក់ថា គណបក្សហ៊្វុនស៊ិនប៉ិច គឺជាគណបក្សដែលនៅមានសក្ដានុពល ប្រសិនបើអាចអនុវត្តនូវចំណុចមួយចំនួន ដូចខាងក្រោម៖

ទី១. បង្រួបបង្រួមមន្ត្រីនៅក្នុងគណបក្ស និងអ្នកគាំទ្រគណបក្ស កុំឲ្យនៅបែកខ្ញែកគ្នា

ទី២. ដាក់ចេញគោលនយោបាយ និងយុទ្ធសាស្រ្ដសម្រាប់គណបក្សរបស់ខ្លួន

ទី៣. បណ្ដុះបណ្ដាលយុវជនបន្តវេន សម្រាប់គណបក្សនាថ្ងៃអនាគត

ទី៤. ពង្រឹងបទបញ្ជាផ្ទៃក្នុង វិន័យ និងលក្ខន្តិកៈរបស់គណបក្ស ឲ្យបានរឹងមាំជាងមុន

ទី៥. សិក្សាលើតម្រូវការ របស់ប្រជាពលរដ្ឋ និងរៀបចំនូវគោលនយោបាយមួយ ដែលជាតម្រូវការ របស់ពួកគាត់។

លោក ញឿន រ៉ាដែន អ្នកនាំពាក្យគណ​បក្សហ៊្វុនស៊ិនប៉ិច ធ្លាប់មានប្រសាសន៍ប្រាប់កម្ពុជាថ្មីថា ព្រះអង្គម្ចាស់ នរោត្តម ចក្រាវុធ ដែលជាបុត្រាច្បងរបស់សម្ដេចក្រុមព្រះ នរោត្តម រណឬទ្ធិ នឹងត្រូវឡើងធ្វើជាប្រធានគណបក្សហ៊្វុនស៊ិនប៉ិច នាពេលខាងមុខ បន្ទាប់ពីសម្ដេចក្រុមព្រះ បានយាងចូលព្រះទិវង្គត កាលពីថ្ងៃទី ២៨ ខែវិច្ឆិកា ឆ្នាំ ២០២១កន្លងទៅនេះ។  

បើតាមអ្នកនាំពាក្យរូបនេះ ការយាងចូលព្រះទិវង្គត របស់សម្ដេចក្រុមព្រះ ​នឹងមិនធ្វើឲ្យប៉ះពាល់ដំណើរ​ការ របស់គណបក្សហ៊្វុនស៊ិនប៉ិច សម្រាប់ការបោះឆ្នោតនាពេលខាងមុខទេ ក៏ព្រោះតែថ្នាក់ដឹកនាំ និងសមា​ជិក-សមាជិកាគ្រប់ជាន់ថ្នាក់ បានគោរព និងដង្ហែតាមព្រះតម្រិរបស់សម្ដេចក្រុមព្រះ ជាពិសេសបន្តគាំទ្រការដឹកនាំគណបក្ស ពីសំណាក់ព្រះអង្គម្ចាស់ នរោត្តម ចក្រាវុធ៕

អត្ថបទ៖ ឃួន សុភ័ក្រ