សម្តេច ស ខេង ៖ សាលារៀន បើទោះបីដាក់ឈ្មោះសម្តេច ឬសម្តេច ហ៊ុន សែនក្តី ប៉ុន្តែនៅតែជាកន្លែងអប់រំសាធារណៈ

សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃកម្ពុជា បានគូសបញ្ជាក់ច្បាស់ៗថា សាលារៀន បើទោះបីដាក់ឈ្មោះសម្តេចផ្ទាល់ក្តី ឬសម្តេចតេជោ ហ៊ុន សែនក្តី ប៉ុន្តែវានៅតែជាកន្លែងអប់រំសាធារណៈដែលផ្តល់ប្រយោជន៍ជាទូទៅ។ សម្តេច ស ខេង បានគូសបញ្ជាក់បែបនេះចេញពីខេត្តបាត់ដំបង ជាទីដែលសម្តេចចុះទៅសម្ពោធអគារសិក្សាវិទ្យាល័យ ស ខេង កន្ទឺ២ និងសមិទ្ធផលនានា នៅក្នុងស្រុកបាណន់ ខេត្តកាលពីថ្ងៃពុធ ម្សិលមិញនេះ។

ពីវេទិកាក្នុងខេត្តបាត់ដំបង សម្តេចក្រឡាហោម ស ខេង បានអះអាងថា សមិទ្ធផលសាធារណៈ មានសាលារៀនជាដើម ទោះបីដាក់ឈ្មោះសម្ដេច ឬសម្តេចតេជោ ជាអនុប្រធាន និងប្រធានគណបក្សប្រជាជនកម្ពុជាក្ដី ប៉ុន្តែទីនេះ ជាកន្លែងផ្ដល់សេវាអប់រំជូនកូនចៅប្រជាពលរដ្ឋទូទៅ និងបម្រើឱ្យប្រយោជន៍សាធារណៈ។ ជាមួយគ្នានេះ សម្ដេចក៏បានរំលឹកជាថ្មីទៀតអំពីការបែងចែកតួនាទីភារកិច្ចទទួលខុសត្រូវក្នុងភាពជាមន្រ្តីមុខងារសាធារណៈ និងភាពជាអ្នកនយោបាយ ដើម្បីពង្រឹងនីតិរដ្ឋ និងបញ្ចៀសការប្រកាន់និន្នាការ។

បន្ថែមលើនេះ សម្ដេចឧបនាយករដ្ឋមន្រ្តី ក៏បានអះអាងអំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការងារកំណែទម្រង់រដ្ឋបាលថ្នាក់ក្រោមជាតិ ធ្វើយ៉ាងណាឱ្យរដ្ឋបាលស្រុក និងស្រុកជាដើមកាន់តែមានលទ្ធភាពគ្រប់គ្រាន់ក្នុងការបំរើសេវាសាធារណៈ និងការសម្រេចចិត្តទាំងឡាយ ដែលឆ្លើយបានតាមសេចក្ដីត្រូវការចាំបាច់របស់ប្រជាពលរដ្ឋ។ ចំពោះការបោះឆ្នោតឃុំសង្កាត់វិញ សម្ដេចក្រឡាហោម ស ខេង ក៏លើកឡើងអំពីគុណតម្លៃនៃការបោះឆ្នោតឃុំ-សង្កាត់ ដែលប្រជាពលរដ្ឋមានសិទ្ធិជ្រើសរើសមេដឹកនាំឃុំរបស់ខ្លួន។

ទន្ទឹងនឹងនេះ សម្ដេច ស ខេង ក៏បានអំពាវនាវជាថ្មីទៀតឲ្យអាជ្ញាធររដ្ឋបាលរាជធានីខេត្ត ក្រុងស្រុកខណ្ឌ ឃុំសង្កាត់ រួមទាំងកងកម្លាំង និងមន្រ្តីពាក់ព័ន្ធខិតខំសម្របសម្រួលឱ្យគណបក្សនយោបាយទាំងអស់ធ្វើសកម្មភាពស្របតាមច្បាប់។ សម្ដេចក៏បានស្នើសុំគណបក្សនយោបាយ និងប្រជាពលរដ្ឋ បន្តចូលរួមបង្កលក្ខណៈឱ្យដំណើការបោះឆ្នោតនេះបានប្រព្រឹត្តទៅដោយរលូន ដើម្បីរួមចំណែកពង្រឹងដំណើរការប្រជាធិបតេយ្យនៅកម្ពុជា៕

ដោយ ៖ វណ្ណ សុគន្ធា