នយោបាយ

ការចាប់ឆ្នោតកំណត់លេខរៀងនៅលើសន្លឹកឆ្នោតសម្រេចបាន១.៤២៨ឃុំសង្កាត់ហើយ

បានផុស

៣ years មុន

នៅ

ថ្ងៃព្រហស្បតិ៍ ២៤ មីនា ២០២២

ដោយ

តាមរបាយការណ៍ពីគណៈកម្មការឃុំ សង្កាត់ រៀបចំការបោះឆ្នោត (គឃ.សប) នៅទូទាំងប្រទេស ដែល គ.ជ.ប ទទួលបាន គិតត្រឹមថ្ងៃទី២៣ ខែមីនា ឆ្នាំ២០២២ ការចាប់ឆ្នោតកំណត់លំដាប់លេខរៀងបញ្ជីបេក្ខជនលើសន្លឹកឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ សម្រេចបានចំនួន១.៤២៨ ឃុំ សង្កាត់ ក្នុងចំណោមឃុំ សង្កាត់ ទាំងអស់សរុបចំនួន១.៦៥២។

បើតាមគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងចំណោមរាជធានី ខេត្តទាំង ២៥ គឺមានខេត្តសៀមរាប ស្ទឹងត្រែង កែប និងខេត្តត្បូងឃ្មុំ បានបញ្ចប់ទាំងស្រុង នូវការចាប់ឆ្នោតកំណត់លំដាប់លេខរៀងបញ្ជីបេក្ខជន នៅលើសន្លឹកឆ្នោតនៃឃុំ សង្កាត់ នីមួយៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ បន្ទាប់ពីបញ្ជីបេក្ខជនដំបូង ក្លាយជាបញ្ជីបេក្ខជនផ្លូវការហើយ គឃ.សប ត្រូវធ្វើការចាប់ឆ្នោត ដើម្បីកំណត់លំដាប់លេខរៀងបញ្ជីបេក្ខជនលើសន្លឹកឆ្នោត ជាសាធារណៈដោយព្រះសង្ឃ ឬឥស្សរជនចូលនិវត្តន៍ ឬចាស់ព្រឹទ្ធាចារ្យ ដែលមានជំហរអព្យាក្រឹត និងដែលអាចទទួលយកបានពីគ្រប់គណបក្សនយោបាយ។

ការចាប់ឆ្នោតកំណត់លំដាប់លេខរៀងបញ្ជីបេក្ខជនលើសន្លឹកឆ្នោត គឺដើម្បីឱ្យគណៈកម្មាធិការជាតិរៀបចំការបោះឆ្នោត (គ.ជ.ប) បោះពុម្ពសន្លឹកឆ្នោតសម្រាប់ ឃុំ សង្កាត់នីមួយៗ ដោយផ្អែកតាមចំនួនបញ្ជីបេក្ខជនផ្លូវការនៅក្នុងឃុំ សង្កាត់ នោះ និងលទ្ធផលនៃការចាប់ឆ្នោត។

សូមបញ្ជាក់ថា ដោយផ្អែកលើលទ្ធផល នៃការទទួលពាក្យសុំចុះបញ្ជីបេក្ខជននៃគណបក្សនយោបាយសម្រាប់ឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ គឺមានគណបក្សនយោបាយដាក់ពាក្យសុំចំនួន១៧ ហើយក្នុងចំណោមគណបក្សទាំងអស់នេះ មានគណបក្សមួយចំនួនធំ មិនមានលទ្ធភាពដាក់បេក្ខជនឈរឈ្មោះបានគ្រប់ ឃុំ សង្កាត់នោះទេ៕

ដោយ ៖ កោះកែវ