Connect with us

នយោបាយ

ថ្ងៃនេះ កាលពី៤៥ឆ្នាំមុន សម្តេច ហ៊ុន​ សែន ក្នុងវ័យ២៥ឆ្នាំ បានចេញប្តូរជីវិតតស៊ូរំដោះកម្ពុជាពីខ្មែរក្រហម

បានផុស

នៅ

ថ្ងៃទី២០ ខែមិថុនា ឆ្នាំ១៩៧៧-ថ្ងៃទី២០ ខែមិថុនា ឆ្នាំ២០២២នេះ គឺជាគម្រប់ខួប៤៥ឆ្នាំគត់នៃដំណើរតស៊ូរំ​ដោះ​ជាតិរបស់សម្តេចតេជោ ហ៊ុន សែន ផ្តើមចេញនៅព្រំដែនកម្ពុជា-វៀតណាម។ នៅព្រឹកថ្ងៃចន្ទនេះ សម្តេចតេជោ ហ៊ុន សែន និងនាយករដ្ឋមន្រ្តីវៀតណាម ធ្វើពិធីប្រារព្ធខួប៤៥ឆ្នាំនៃដំណើរតស៊ូរំដោះជាតិនេះនៅ​ក្នុងខេត្តត្បូងឃ្មុំរបស់កម្ពុជា។ នៅពេលនេះ «កម្ពុជាថ្មី» សូមរំលឹកត្រួសៗពីដំណើរតស៊ូរំដោះជាតិកម្ពុជាចេញពីកណ្តាប់ដៃខ្មែរក្រហមរបស់សម្តេច ហ៊ុន សែន ដែលកាលណោះមានវ័យត្រឹមតែ២៥ឆ្នាំប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃទី២០ ខែមិថុនា ឆ្នាំ១៩៧៧ សមមិត្ត ហ៊ុន សែន ក្នុងវ័យ ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ ៤រូបផ្សេងទៀត បានសម្រេចចិត្តក្នុងស្ថានភាពដ៏តាន់តឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនដ៏គ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកការគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោរឃៅ ប៉ុល ពត។ ការចេញតស៊ូរបស់សម្តេចតេជោ ហ៊ុន សែន និងយុទ្ធមិត្តនេះ គឺផ្តើមចេញនៅតំបន់កោះថ្ម ឃុំទន្លុង ស្រុកមេមត់ ខេត្តត្បូងឃ្មុំ ដែលតំបន់នេះ ត្រូវបានស្គាល់ថា ជាតំបន់«X16»។

ផ្តើមចេញពីដំណើរតស៊ូជាមួយទឹកចិត្តដ៏មោះមុតនេះហើយ ទើបនាំឱ្យមានការរំដោះប្រទេសជាតិ និងប្រជាជនកម្ពុជា ចេញពីរបបវាលពិឃាត ប៉ុល ពត ដោយជោគជ័យនៅថ្ងៃទី០៧ ខែមករា ឆ្នាំ១៩៧៩ ហើយបន្ទាប់មកទៀត ក៏កើតមាននូវកិច្ចព្រមព្រៀងសន្តិភាពទីក្រុងបារីស ២៣ ខែតុលា ឆ្នាំ១៩៩១។ គឺនៅពេលនោះហើយដែលជាដំណាក់កាលឈានទៅរកការបិទបញ្ចប់ភ្លើងសង្គ្រាមស៊ីវិល បិទបញ្ចប់ការបែកបាក់ជាតិ នាំមកនូវការបង្រួបបង្រួមជាតិ ឯកភាពជាតិ និងការកសាងអភិវឌ្ឍប្រទេសឱ្យរីកចម្រើនដូចពេលបច្ចុប្បន្ននេះ។

សម្តេចតេជោ ហ៊ុន សែន ធ្លាប់រំលឹកពីការចេញដំណើរតស៊ូដំបូងរបស់សម្តេចយ៉ាងដូច្នេះថា៖ «ខ្ញុំ​សម្រេច​ចិត្តដោយការ​ឈឺ​ចាប់​យក​ជីវិត​ធ្វើ​ដើម​ទុន ​ដើម្បី​តស៊ូរំដោះប្រជាជនកម្ពុជា​ចេញពី​​របប​ប្រល័យពូជសាសន៍ ប៉ុល ពត។ ទោះបីពេលនេះ ​ខ្លួនខ្ញុំ និង​ប្រជាជន​កម្ពុជា កំពុងទទួល​បាននូវ​សេចក្តីសុខ តែខ្ញុំមិនដែលភ្លេច​នូវ​ទឹកភ្នែក​រាប់ម៉ឺន រាប់សែនដំណក់ នៅពេលដែល​ខ្ញុំឈាន​ជើង​ចេញ​ពីមាតុ​ភូមិ​ចោល​ប្រជាជនកម្ពុជាដែលកំពុងរងគ្រោះ ពិសេស ចាកចេញចោល ភរិយា ដ៏កំសត់ដែលកំពុងមានផ្ទៃពោះ»។ បើតាមសម្តេចនាយករដ្ឋមន្រ្តីកម្ពុជា គឺនៅពេលនោះ សម្តេចអត់មាន​ជម្រើស​ណាល្អ​ជាងនេះ​ទេ ព្រោះ​សម្តេច និងពលរដ្ឋកម្ពុជា មិនអាចសុំការអាណិតពីពួក ប៉ុល ពត បានឡើយ។

រំលឹកមកដល់ចំណុចនេះ សម្តេចតេជោនាយករដ្ឋមន្រ្តីបានពោលឡើងថា៖«ខ្ញុំធ្លាប់បានរៀបរាប់ពីប្រវត្តិដ៏ឈឺចាប់នេះច្រើនដងហើយ តែខ្ញុំមិនទាន់បានបញ្ចេញនូវចម្ងល់ក្នុងចិត្តខ្ញុំទាក់ទងជាមួយប្រវត្តិនេះ ដែលតាំងជាសំនួរថា ប្រសិន​បើខ្ញុំ​មិន​សម្រេច​ចិត្ត​ដឹកនាំ​ការតស៊ូ​ដោយ​ចាប់ផ្តើមពីថ្ងៃ២០ មិថុនា ១៩៧៧ ទេ តើពេលនោះពួក ប៉ុល ពត សម្លាប់ខ្ញុំនៅឯណា? ដោយវិធីណា?។ សំណួរបន្ទាប់ ​តើមានអ្នកស្នេហាជាតិ​ណាផ្សេងទៀត​បង្កើត​ឡើង​នូវកងកម្លាំងប្រដាប់អាវុធសាមគ្គីសង្រ្គាះជាតិជំនួសខ្ញុំដែរឬទេ? តើដំណើរឆ្ពោះមករំដោះប្រទេសពីរបប ប៉ុល ពត កើតមានឡើងបានដោយរបៀបណា? តើមាន​ដំណោះស្រាយ​តាម​រយៈការ​ចចារ និងកិច្ចព្រមព្រៀងប៉ារីសឬទេ? និងចុងក្រោយតើមាននយោបាយ ឈ្នះ ឈ្នះ ដើម្បីបញ្ចប់សង្រ្គាមនាំមកនូវសន្តិភាព និង​ការ​អភិវឌ្ឍ​ដូច​សព្វថ្ងៃ​ឬទេ? សំណួរ​សង្ខេបទាំងនេះ តែងបង្កប់ក្នុងខួរក្បាលខ្ញុំជានិច្ច ហើយខ្ញុំក៏មិនអាចឆ្លើយជាមួយសំណួរនេះដោយខ្លួនឯងបានដែរ ខ្ញុំទុកជូនបងប្អូនជនរួមជាតិមេត្តាជួយរកចម្លើយ»។

ដើម្បីរំលឹកដល់ស្លាកស្នាមប្រវត្តិសាស្ត្រដ៏មានគុណតម្លៃសម្រាប់ជាតិ និងប្រជាជន និងដើម្បីគាស់រំលើងឱ្យឃើញនូវវីរភាពរបស់កុលបុត្រខ្មែរក្នុងការតស៊ូដើម្បីជាតិ និងប្រជាជនសម្រាប់កុលបុត្រខ្មែរជំនាន់ក្រោយនោះ នៅក្នុងឆ្នាំ២០១៧ ដែលជាខួប ៤០ឆ្នាំនៃការចេញតស៊ូនេះ សម្តេចតេជោ ហ៊ុន សែន រួមនឹងយុទ្ធមិត្តដែលនៅមានជីវិត បានធ្វើដំណើររួមគ្នាទៅកាន់គ្រប់ចំណុចក្នុងដំណាក់កាលតស៊ូនោះ។​ ចាប់តាំងពីឆ្នាំ២០១៧នោះមក ក្រសួងការពារជាតិកម្ពុជា ក៏បានទទួលភារកិច្ចរៀបចំប្រារព្ធពិធីមួយនេះជារៀងរាល់ឆ្នាំ។ ក្រសួងការពារជាតិកម្ពុជា ក៏បានរៀបចំសាងសង់នូវសំណង់នានានៅក្នុងតំបន់ប្រវត្តិសាស្ត្រមួយនេះផងដែរ ដើម្បីតម្កល់ទុកជាមរតកដល់មនុស្សជំនាន់ក្រោយ។ នេះបើតាមការចុះផ្សាយនៅលើទំព័រហ្វេសប៊ុករបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា៕

ដោយ៖ វណ្ណ សុគន្ធា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ១ ម៉ោង មុន

អតីតសេដ្ឋិនីវៀតណាម Truong My Lan ត្រូវបានរដ្ឋអាជ្ញាស្នើកាត់ទោសប្រហារជីវិត

ព័ត៌មានអន្ដរជាតិ៥ ម៉ោង មុន

ស្ត្រីវៀតណាមដែលបានលក់ផ្លែពុទ្រាក្នុងតម្លៃថ្លៃទៅឱ្យភ្ញៀវទេសចរម្នាក់ ត្រូវរងការព្រមានពីអាជ្ញាធរ

ព័ត៌មានជាតិ៥ ម៉ោង មុន

ក្រសួង​ការងារ និង​បណ្តុះបណ្តាល​វិជ្ជាជីវៈ បើក​វគ្គ​បណ្តុះបណ្តាល​លើ​ជំនាញ​ផ្នែក​កំបោរ​ក្នុង​វិស័យ​សំណង់

ព័ត៌មានជាតិ៦ ម៉ោង មុន

ក្រសួងការងារ៖ ការបំផ្លើសព័ត៌មានអំពីការបើកប្រាក់ឈ្នួលដល់កម្មករ Y & W នៅថ្ងៃស្អែកនេះ ជាព័ត៌មានមិនពិត

ព័ត៌មានជាតិ៦ ម៉ោង មុន

មន្ត្រីជំនាញខេត្តកំពង់ចាម ចុះព្រមានម្ចាស់យានដ្ឋាន កែច្នៃ ឧបករណ៍បំពងសំឡេងខុសបច្ចេកទេស

Sokha Hotels

ព័ត៌មានពេញនិយម