បំពាក់ភ្លើងខុសបច្ចេកទេស និងដាក់អក្សរមិនសមរម្យ នៅលើផាសអេប ត្រូវសមត្ថកិច្ចឃាត់ឲ្យដកចេញ

សមត្ថកិច្ច បានឃាត់ខ្លួនបុរសម្នាក់ ជាម្ចាស់ផាសអេបមួយគ្រឿង ដែលបំពាក់ភ្លើងខុសបច្ចេកទេស និងដាក់អក្សរមិនសមរម្យ ហើយធ្វើដំណើរនៅតាមដងផ្លូវ។

លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ មានប្រសាស​ន៍ប្រាប់កម្ពុជាថ្មី ឲ្យដឹងថា បន្ទាប់ពីមានការផ្សព្វផ្សាយ នៅលើបណ្ដាញសង្គមហ្វេសប៊ុក អំពីករណីមានផាសអេបមួយគ្រឿង បំពាក់ភ្លើងខុសបច្ចេកទេស និងដាក់អក្សរមិនសមរម្យនោះ គឺក្រុមការ​ងារព័ត៌មាន និងប្រតិកម្មរហ័ស នៃស្នងការដ្ឋាន នគរបាលរាជធានីភ្នំពេញ បានផ្ដល់ព័ត៌មាននេះ ទៅកម្លាំងសមត្ថកិច្ច នៅគ្រប់គោលដៅឲ្យឃាត់ ផាសអេបមួយគ្រឿងនេះ។

ក្រោយមក នៅយប់ថ្ងៃទី ៤ ខែមករា ឆ្នាំ ២០២២ កម្លាំងសមត្ថកិច្ចខណ្ឌពោធិ៍សែនជ័យ ក៏ប្រទះឃើញ និងការឃាត់ខ្លួន អ្នកបើកបរផាសអេបរូបនោះ ដោយឲ្យដកភ្លើង និងអក្សរនោះចេញ ព្រមទាំងបានធ្វើការអប់រំណែនាំ និងធ្វើកិច្ចសន្យា ឲ្យបញ្ឈប់សកម្ម​ភា​ព​​នេះ ផងដែរ។

លោកវរសេនីយ៍ឯក សាន សុខសីហា បានឲ្យដឹងបន្តថា ជារឿយៗ លោកឧត្ដមសេនី​យ៍​ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ តែងតែនាំឲ្យដល់សមត្ថកិច្ចពាក់ព័ន្ធ ពិនិត្យមើលទាំងរថយន្ត និងផាសអេប ដែលបានបំពាក់ភ្លើងខុសបច្ចេកទេស និងដាក់អក្សរមិនសមរម្យជាដើម ហើយប្រសិនបើឃើញ ត្រូវឃាត់ដកចេញភ្លាម។

ជាមួយគ្នានេះ អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានអំពាវនាវបន្ថែមដល់ម្ចាស់រថយន្ត និងផាសអេប ផ្សេងទៀត សូមកុំបំពាក់ភ្លើងខុសបច្ចេកទេស និងដាក់អក្សរមិនសមរម្យ ដូច្នេះតទៅទៀត៕

អត្ថបទ៖ ឃួន សុភ័ក្រ