ក្មេងស្ទាវ២ក្រុមដេញកាប់គ្នាផ្អើលពេញកោះពេជ្រ សមត្ថកិច្ចព័ទ្ធចាប់បាន១៨នាក់

ក្រុមក្មេងស្ទាវចំនួន២ក្រុម មានគ្នាជាច្រើននាក់បានបើកការប្រយុទ្ធគ្នាដោយប្រាស់ដាវកាប់និងវាយគ្នាទៅមកយ៉ាងប្រសាច នៅក្នុងមជ្ឈមណ្ឌលកោះពេជ្រ ស្ថិតក្នុងសង្កាត់ទន្លេបាសាក់ ខណ្ឌចំការមន បង្កអោយមានការភ្ញាក់ផ្អើលឡើង កាលពីវេលាម៉ោង២០ និង៣០នាទីយប់ថ្ងៃទី០៥ ខែមិនា ឆ្នាំ២០២២ ដែលក្រុមក្មេងស្ទាវទាំង០២ក្រុមនេះសុទ្ធតែមានរហ័សនាមរៀងៗខ្លួន គឺ 79Zin និង 98 Small ។

យោងតាមប្រភព័ត៌មានអោយដឹងថា មុនឈានដល់ការឃាត់ខ្លួន គឺដំបូងឡើយ ក្រុមក្មេងទំនើងដែលមានរហ័សនាម 79Zin មានគ្នាជាច្រើននាក់ និងជិះម៉ូតូទំនើបៗ ជាច្រើនគ្រឿង ប្រដាប់ដោយដាវផងនោះ បានបើកការវាយប្រហារ ទៅលើក្រុមក្មេងស្ទាវមួយក្រុមទៀត ដែលមានគ្នាច្រើនដូចគ្នា បណ្តាលអោយមានការវាយតបតគ្នាយ៉ាងប្រសាច នៅក្នុងមជ្ឈមណ្ឌលកោះពេជ្រ បង្កអោយមានការភ្ញាក់ផ្អើលជាខ្លាំង ។

ស្របពេលជាមួយគ្នានោះដែរ កម្លាំងសមត្ថកិច្ច នៃការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ដែលបានជិះល្បាតពួនស្ទាក់បានប្រទះឃើញ ក៏បានទំនាក់ទំនងហៅកម្លាំងបន្ថែមតាមវិទ្យុទាក់ទង អោយប្រមូលកម្លាំងចុះអន្តរាគមន៍ ឃាត់ក្រុមក្មេងទំនើបទាំង០២ក្រុម ។

ជាលទ្ធិផលសមត្ថកិច្ចបានធ្វើការឡោមព័ទ្ធ ឃាត់ខ្លួនបានមនុស្សសរុប១៨នាក់ ក្នុងនោះមានស្រីម្នាក់ ដោយឡែកនៅសេសសល់មួយចំនួន បានជិះរត់គេចខ្លួនអស់ ។ ក្នុងចំណោម១៨នាក់នោះ មាន០៤នាក់នៅក្រុម 79Zin និង១៤នាក់ នៅក្រុម98Small ។ ក្នុងនោះដែរ សមត្ថកិច្ចក៏ដកហូតបានម៉ូតូសរុបបាន០៩គ្រឿងផងដែរ ។

ក្រោយការឃាត់ខ្លួន ក្មេងទំនើងទាំង១៨នាក់ ត្រូវបាន សមត្ថកិច្ចដឹកតាមរថយន្តបញ្ចូនខ្លួនទៅកាន់ ការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ រងចាំបន្តនីតិវិធី ៕

អត្ថបទ៖ លីហេង