មកពីផឹកស៊ីផ្ទះមិត្តភ័ក្ដិរករឿងឈ្លោះប្រពន្ធ ទាញកៅអីវាយត្រូវកូនអាយុជាងមួយខួបស្លាប់ពេលបញ្ជូនដល់មន្ទីរពេទ្យ

បុរសម្នាក់ត្រូវបានកម្លាំងនគរបាលស្រុកថ្មពួក ធ្វើការឃាត់ខ្លួនបញ្ជូនទៅតុលាការផ្ដន្ទាទោសតាមផ្លូវច្បាប់ ក្រោយពីធ្វើសកម្មភាពវាយ​ប្រពន្ធនិងកូន បណ្ដាលឲ្យកូនស្រីខ្លួនឯងអាយុទើបតែជាងមួយខួបស្លាប់បាត់បង់ជីវិតពេលបញ្ជូនដល់មន្ទីរពេទ្យ។

ករណីហិង្សានេះ បានកើតឡើងនៅយប់ថ្ងៃទី១៤ ខែមីនា ឆ្នាំ២០២២ នៅចំណុចភូមិប្រាសាទត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។

មន្ត្រីនគរបាលស្រុកថ្មពួកបានប្រាប់ឲ្យដឹងថា ជនដៃដល់មានឈ្មោះ លួស ធំ ភេទប្រុស អាយុ២៨ឆ្នាំ រស់នៅភូមិប្រាសាទត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ ចំណែកប្រពន្ធឈ្មោះ ខន ខួច​អាយុ៣៨ឆ្នាំ និងកូនស្រីរងគ្រោះឈ្មោះ លួស ស្រីនី​ អាយុមួយខួបប្រាំពីរខែ។

មន្ត្រីនគរបាលបានបន្តទៀតថា នៅមុនពេលកើតហេតុបុរសជាប្ដីមកពីផឹកស៊ីនៅផ្ទះមិត្តភ័ក្ត​រស់នៅភូមិជាមួយគ្នា​ហើយ​ស្រវឹងរៀងៗ​ខ្លួនពេល​ដែលផឹកសប្បាយអស់ចិត្តក៏វិលត្រឡប់មកផ្ទះវិញពេលមកដល់ផ្ទះ ក៍បានឈ្លោះប្រកែកពាក្យសម្ដីគ្នាជាមួយប្រពន្ធ។ ប្រភពបានបន្តថា ខណៈកំពុងឈ្លោះគ្នាប្រពន្ធបានបីកូនទៅដេកនៅក្នុងមុង ធ្វើឲ្យប្តឹរឹតតែខឹងក៍ទាញកៅ​អីជ័រវាយទៅលើប្រពន្ធដែល​កំពុកដេកជាមួយ​កូនស្រី​បណ្តាលឲ្យត្រូវកូនស្រី​មួយកៅអីជ័រចំសៀតផ្ការខាងស្តាំរបួសធ្ងន់ និងត្រូវម្តាយរបួសស្រាល ពេលម្តាយបាន​ដឹកបញ្ជូនកូនស្រីទៅកាន់​មន្ទីរពេទ្យបង្អែកថ្មពួក និងបញ្ជូន​ទៅសង្គ្រោះបន្តរនៅមន្ទីពេទ្យខេត្តសៀមរាប ក៍ត្រូវបានស្លាប់នៅនិងមន្ទីពេទ្យតែម្តង ។

ក្រោយពីកើតហេតុហើយកម្លាំងសមត្ថកិច្ចបានចុះទៅដល់កន្លែងកើតហេតុបានឃាត់ខ្លួនប្តីយកមកអធិការស្រុកថ្មពួក ដើម្បីសួរដើមរឿង និងបញ្ជូនមកស្នងការខេត្តបន្ទាយមានជ័យ រៀបចំសំនុំរឿងបញ្ជូនទៅតុលាខេត្តនៅល្ងាចថ្ងៃទី១៥ ខែមីនា ឆ្នាំ២០២២នេះ​ដើម្បី​ផ្ដន្ទាទោសតាមផ្លុវច្បាប់ ៕

អត្ថបទ៖ វ៉ាន់ ណាង