ក្រោកភ្ជួរដីចម្ការដាំដំឡូងទាំងកណ្ដាលយប់ ជាន់មីនតោនផ្ទុះរងរបួសធ្ងន់

បុរសជាម្ចាស់ត្រាក់ទ័រមា្នក់បានរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ខណៈបើកត្រាក់ទ័រឡើងភ្ជួរដីចម្ការទាំងកណ្ដាលយប់ដើម្បីដាំដំឡូងហើយបើកជាន់មីនតោនផ្ទុះ ចំណែលត្រាក់ទ័រខូចខាត។ នេះបើតាមការឲ្យដឹងពីអាខោនហ្វេសប៊ុកផេកលោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) ស៊ីម៉ាក់។

ករណីផ្ទុះមីនតោនបណ្ដាលឲ្យមានអ្នករងរបួសធ្ងន់នេះ បានកើតឡើងកាលពីវេលាម៉ោង២និង៤៥នាទីទាបភ្លឺ ថ្ងៃទី៨ ខែមេសា ឆ្នាំ២០២២ ចំណុចស្រែអូរសឹង្ហខាងកើតភូមិកន្ទួត​ រីឯអ្នកបើកបររស់នៅក្នុងភូមិមរតកតេជោ​ ឃុំកន្ទួត​ ស្រុកជាំក្សាន្ត​ ខេត្តព្រះវិហារ។​

ជាមួយគ្នានេះ​ លោក ហេង រតនា ក៏បានលើកឡើងថា នេះជាវិនាសកម្មដោយសារសំណល់យុទ្ធភណ្ឌសង្គ្រាម​ ហើយប្រជាពលដ្ឋខិតខំរកស៊ីចិញ្ចឹមជីវិត និងកសាងសេដ្ឋកិច្ចគ្រួសារ​ទាំងយប់ម៉ោងប្រមាណជិត០៣ទាបភ្លឺ និងសូមចូលរួមសោកស្ដាយជាមួយក្រុមគ្រួសារជនរងគ្រោះ៕