ដំគ្រាប់កាំភ្លើងត្បាល់មិនទាន់ផ្ទុះយកស្ពាន់លក់ ផ្ទុះរងរបួសធ្ងន់ស្រាល២នាក់

បុរសម្នាក់យកគ្រាប់កាំភ្លេីងប្រភេទត្បាល់៦០មីលីម៉ែត្រមិនទាន់ផ្ទុះមកដំយកស្ពាន់លក់អេតចាយបណ្តាលឲ្យផ្ទុះឡេីងលាន់ដូចរន្ទះរងរបួសធ្ងន់ស្រាល២នាក់ បង្កការភ្ញាក់ផ្អើលកាលពីវេលាម៉ោង៨និង៣០នាទីព្រឹក ថ្ងៃទី១១ ខែវិច្ឆិកាឆ្នាំ២០២២ នៅត្រង់ចំណុចមុខបន្ទប់ជួលលេខ17B តាមបណ្តោយផ្លូវប្រឡាយ ភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះដែលរបួសធ្ងន់ឈ្មោះ មឿន សាឡា ភេទប្រុស អាយុ៣១ឆ្នាំ ស្នាក់នៅបន្ទប់ជួលកើតហេតុ មានស្រុកកំណើតនៅភូមិរមៀត ឃុំមុខដា ស្រុករមាសហែក ខេត្តស្វាយរៀង។ ចំណែកបុរសម្នាក់ទៀតរងរបួសស្រាលមានឈ្មោះ ឆើត អាយុជាង៤០ឆ្នាំ ស្នាក់នៅកន្លែងកើតហេតុ។

បើតាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុបុរសខាងលើបានយកគ្រាប់ត្បាល់​៦០​មីលីម៉ែត្រ ដែលមិនទាន់ផ្ទុះដាក់លើថ្មដែលនៅខាងមុខបន្ទប់ជួលរបស់ខ្លួន ហើយបានដើរទៅយកពូថៅ និងដែកដាប់មកដាប់ និងដំលើក្បាលគ្រាប់រហូតដល់ផ្ទុះលាន់លឺដូចរន្ទះបណ្តាលឲ្យបុរសជាអ្នកដំរងរបួសធ្ងន់ ហើយខ្ទាត់បំណែកគ្រាប់ទៅចំជើងបុរសម្នាក់ដែលកំពុងអង្គុយបេះបន្លែក្បែរនោះរងរបួសស្រាល។

ក្រោយកើតហេតុជនរងគ្រោះទាំង២នាក់ត្រូវបានបងប្អូនប្រជាពលរដ្ឋដឹកតាមម៉ូតូទៅសង្រ្គោះបន្ទាន់នៅមន្ទីរពេទ្យមិត្តភាពសូវៀត និងរាយការណ៍ទៅសមត្ថកិច្ចចុះពិនិត្យជាក់ស្តែង៕

អត្ថបទ៖ សុខា