លោក គង់ សភា នឹងក្លាយជាអ្នកនយោបាយប្រឆាំងទី១ទទួលបានការលើកលែងទោសពីព្រះមហាក្សត្រតាមរយៈការជួយពីសម្តេច ហ៊ុន ម៉ាណែត

លោក គង់ សភា នឹងក្លាយជាអ្នកនយោបាយប្រឆាំងទី១ដែលទទួលបានការអភ័យទោស និងលើកលែងទោសពីព្រះមហាក្សត្រតាមរយៈការជួយអន្តរាគមន៍ពីសម្តេចធិបតី ហ៊ុន ម៉ាណែត ក្នុងនាមជានាយករដ្ឋមន្រ្តីនៃកម្ពុជានាអាណត្តិទី៧នេះ។

សូមរម្លឹកជូនថា លោក គង់ សភា នៅថ្ងៃទី១៧ ខែកក្កដា ឆ្នាំ២០២៣ ត្រូវបានគណៈកម្មការ​រៀបចំ​ការ​បោះឆ្នោត​រាជធានីភ្នំពេញ សម្រេចពិន័យជាប្រាក់ចំនួន១០លានរៀល ព្រមទាំងលុបឈ្មោះចេញពីបញ្ជីបោះឆ្នោត និងដកសិទ្ធឈរឈ្មោះឱ្យគេបោះឆ្នោតចំនួន២០ឆ្នាំ​ ក្នុងចំណោមមនុស្ស ១៦នាក់ផ្សេងទៀត។ ការដាក់ទោសទណ្ឌនេះ គឺដោយ​សារលោក គង់ សភា ធ្វើសកម្មភាព​ញុះញង់​ឱ្យ​ប្រជាពលរដ្ឋ​បំផ្លាញ​សន្លឹកឆ្នោត​នៅពេល​បោះឆ្នោត​ជ្រើសតាំង​តំណាងរាស្ត្រ​ នីតិកាល​ទី​៧ កាលពីខែកក្កដា ឆ្នាំ២០២៣កន្លងទៅ។

ក្រោយរងការពិន័យបែបនេះ លោក គង់ សុភា  បានស្នើសុំកិច្ចអន្តរាគមន៍ពីសម្ដេចធិបតី នាយករដ្ឋមន្ត្រី ជួយទូលថ្វាយព្រះមហាក្សត្រឱ្យលើកលែងទោសទណ្ឌទាំងឡាយដល់ខ្លួន ដើម្បីអាចវិលត្រឡប់ចូលប្រទេសកម្ពុជា។តាមរយៈលិខិតមួយច្បាប់របស់លោក គង់ សភា គឺលោកបានទទួលស្គាល់នូវទោសកំហុសកន្លងមក និងបានសុំទោសចំពោះសម្ដេចតេជោ និងសម្ដេចធិបតី។

លោក គង់ សភា បានរៀបរាប់ដូច្នេះថា៖ «ខ្ញុំបាទ គង់ សភា អតីតតំណាងរាស្ត្រមណ្ឌលស្វាយរៀង ពិតជាមានការសោកស្តាយ ដែលរាល់ទង្វើ និងសកម្មភាពមួយចំនួនកន្លងទៅ បានធ្វើឲ្យប៉ះពាល់ដល់ដំណើរការអភិវឌ្ឍ សន្តិភាព ស្ថិរភាព និងគោលនយោបាយនានារបស់រាជរដ្ឋាភិបាលកម្ពុជា។ ខ្ញុំបាទសូមអភ័យទោសចំពោះរាជរដ្ឋាភិបាល នៃព្រះរាជាណាចក្រកម្ពុជា ជាពិសេសចំពោះសម្តេចធិបតី នាយករដ្ឋមន្ត្រី ហ៊ុន ម៉ាណែត និងសម្តេចអគ្គមហាសេនាបតីតេជោ ហ៊ុន សែន»។

ជាមួយនឹងការទទួលស្គាល់ទោសកំហុសនេះ លោក គង់ សភា បានគោរពស្នើសុំសម្តេចធិបតីនាយករដ្ឋមន្ត្រី ឱ្យមេត្តាជួយអន្តរាគមន៍ថ្វាយអង្គព្រះមហាក្សត្រ ដើម្បីទ្រង់ផ្តល់សេចក្តីសណ្តោស និងប្រោសប្រទានការលើកលែងទោសឲ្យរូបលោក បានរួចផុតពីទោស ដែលតុលាការបានផ្តន្ទានាពេលកន្លងមក ព្រមទាំងទម្លាក់ចោលនូវបទចោទប្រកាន់ទាំងឡាយដែលមានជាធរមាន។ តាមរយៈនេះ លោក គង់​ សភា បានបង្ហាញក្ដីសង្ឃឹមជឿជាក់ថា សម្តេចធិបតីនាយករដ្ឋមន្ត្រី នឹងជួយអន្តរាគមន៍ឱ្យលោក បានរួចផុតពីទោសទណ្ឌទាំងឡាយ ដើម្បីអាចវិលត្រឡប់ចូលទៅកាន់មាតុប្រទេសវិញ និងជួបជុំគ្រួសារ មើលថែឪពុកម្តាយចាស់ជរា ដោយក្តីមេត្តាបំផុត។

បន្ទាប់ពីទទួលបានលិខិតនេះ សម្ដេចធិបតី ហ៊ុន ម៉ាណែត បានប្រកាសស្វាគមន៍លោក គង់ សុភា ក៏ដូចជា សន្យាថា ចាត់ចែងតាមនីតិវិធី ដើម្បីលោក គង់ សុភា អាចវិលត្រឡប់មកកាន់មាតុប្រទេសវិញ។

នៅចុងបញ្ចប់នៃសំណេរលើទំព័រហ្វេសប៊ុក សម្ដេចធិបតី ហ៊ុន ម៉ាណែត បានដាក់ក្ដីសង្ឃឹមថា សម្ដេចនឹងមានឱកាសជួបសន្ទនាជាមួយកូនប្រុសលោក គង់ គាំ រូបនេះ នៅពេលខាងមុខ។