ប្រទះឃើញយុទ្ធភណ្ឌមិនទាន់ផ្ទុះ ១៥ គ្រាប់ នៅក្រោមអគារលក់គ្រឿងសំណង់ ខេត្តព្រះសីហនុ

គ្រាប់យុទ្ធភណ្ឌមិនទាន់ផ្ទុះចំនួន ១៥ គ្រាប់ត្រូវបានគេប្រទះឃើញដាក់តំរៀបគ្នា នៅក្រោមអគារផ្គត់ផ្គង់គ្រឿងសំណង់ ប៉ានតាវ ជិតស្ថានីយ៍ប្រេង PTT ស្ថិតនៅភូមិ២ សង្កាត់លេខ១ ក្រុង-ខេត្តព្រះសីហនុ នៅថ្ងៃទី២៧ ខែកក្កដា ឆ្នាំ២០២២នេះ។

ពាក់ព័ន្ធនឹងការប្រទះឃើញគ្រាប់នេះ បើយោងតាមការរៀបរាប់របស់ឈ្មោះ សុង ស៊ាងម៉េង ភេទប្រុស អាយុ ៤១ ឆ្នាំ មុខរបរ សន្តិសុខ ប្រចាំការនៅអគារ ប៉ានតាវ បាននិយាយថា ក្នុងអ៊ំឡុង ២ ខែមុន ក្រុមការងារធ្វើផ្លូវបេតុង ដាក់លូ នៅបណ្ដោយផ្លូវខ្សែកាប ជាប់របងអគារក្រុមហ៊ុន ប៉ានតាវ និងស្ថានីយ៍ប្រេង PTT បានកាយដីប្រទះឃើញគ្រាប់ចាស់ៗ។

បន្ទាប់មកគាត់បានប្រមូលយកមករក្សាទុកនៅក្រោមអគារនេះ បានចំនួន ១៥ គ្រាប់។ ហើយគាត់មិនបានរាយការណ៍ប្រាប់ទៅសមត្ថកិច្ចពាក់ព័ន្ធ និងអាជ្ញាធរមូលដ្ឋានឱ្យដឹងនៅឡើយ មូលហេតុដោយសារតែថៅកែគាត់ជាម្ចាស់ទីតាំងនៅឯប្រទេសចិន ហើយគាត់មិនហ៊ានសម្រេច។ 

បច្ចុប្បន្នគ្រាប់ចាស់ច្រេះចាប់ទាំងអស់នេះរក្សាទុកនៅអគារ ប៉ានតាវ ដដែល រងចាំសមត្ថកិច្ចជំនាញយកចេញទៅកំទេចចោល៕

អត្ថបទ៖ ស៊ុយ ចាន់ធា