ណាតូ និង EU ឲ្យប្រទេស G7 ផ្ដល់ប្រព័ន្ធខែលការពារដែនអាកាសឲ្យ អ៊ុយក្រែន និងពង្រីកទណ្ឌកម្មលើ អ៊ីរ៉ង់

មន្ត្រីជាន់ខ្ពស់អង្គការណាតូ និងសហភាពអឺរ៉ុប (EU) បានជំរុញរដ្ឋមន្ត្រីការបរទេសមកពីក្រុមប្រទេស G7 ចាត់វិធានការឲ្យបានឆាប់រហ័សក្នុងការផ្តល់ប្រព័ន្ធខែលការពារដែនអាកាស និងកាំភ្លើងធំបន្ថែមទៀតទៅដល់អ៊ុយក្រែន ដោយព្រមានថា ការបន្តពន្យារពេលអាចធ្វើឲ្យរុស្ស៊ីកាន់តែមានជ័យលើសង្គ្រាម ។ នេះបើយោងតាមការចេញផ្សាយដោយទីភ្នាក់ងារព័ត៌មាន AP នៅថ្ងៃទី១៩ ខែមេសានេះ ។

អគ្គលេខាធិការអង្គការណាតូលោក Jens Stoltenberg និងប្រធានគោលនយោបាយការបរទេសរបស់សហភាពអឺរ៉ុបលោក Josep Borrell បានថ្លែងបែបនេះក្នុងកិច្ចប្រជុំរដ្ឋមន្ត្រីការបរទេសនៃក្រុមប្រទេស G7 នៅលើកោះរមណីយដ្ឋាន Capri របស់អ៊ីតាលី ខណៈក្នុងកិច្ចប្រជុំនោះទៀតសោតបានផ្ដោតសំខាន់ទៅលើសង្រ្គាមរបស់រុស្ស៊ី-អ៊ុយក្រែន និងការកើនឡើងភាពតានតឹងនៅមជ្ឈិមបូព៌ាជុំវិញការវាយប្រហារដែលមិនធ្លាប់មានពីមុនមករបស់អ៊ីរ៉ង់លើអ៊ីស្រាអែលកាលពីសប្ដាហ៍មុន ។

លោក Stoltenberg ក៏បង្ហាញក្ដីរំពឹងថា សភាអាមេរិកអាចនឹងបោះឆ្នោតឆាប់ៗលើកញ្ចប់ជំនួយ ៦១ ពាន់លានដុល្លារដល់អ៊ុយក្រែនផងដែរ និងបានស្វាគមន៍ចំពោះការប្រកាសរបស់ប្រទេសអាល្លឺម៉ង់នូវការផ្តល់ប្រព័ន្ធខែលការពារមីស៊ីល Patriot ថ្មី ខណៈបើគ្មានប្រព័ន្ធបែបនេះបន្ថែមទៀតដើម្បីការពារប្រឆាំងនឹងការវាយប្រហាររបស់រុស្ស៊ីទេនោះ ច្បាស់ណាស់ថា អ៊ុយក្រែននឹងត្រូវបំផ្លាញ ។

ចំណែករដ្ឋមន្ត្រីការបរទេសអ៊ីតាលីលោក Antonio Tajani បានអំពាវនាវឲ្យមានការដាក់ទណ្ឌកម្មថ្មីប្រឆាំងនឹងអ៊ីរ៉ង់ចំពោះការវាយប្រហារកាលពីសប្តាហ៍មុន និងផ្ដល់ជំនួយចំបាច់ទៅដល់អ៊ុយក្រែនផងដែរ ។ លោកក៏បានព្រមានផងដែរថា ប្រសិនបើអ៊ុយក្រែនចាញ់សង្គ្រាម ប្រធានាធិបតីរុស្ស៊ីលោក វ្ល៉ាឌីមៀរ ពូទីន ក៏នឹងមិនអាចអង្គុយនៅតុដោយសន្តិភាពនោះដែរ ។

ជាមួយគ្នានេះដែរ សហរដ្ឋអាមេរិក និងអង់គ្លេសក៏បានប្រកាសដាក់ទណ្ឌកម្មថ្មីលើប្រទេសអ៊ីរ៉ង់ផងដែរ ពោលទីក្រុងវ៉ាស៊ីនតោនបានដាក់ទណ្ឌកម្មលើបុគ្គល និងអង្គភាពផលិតម៉ាស៊ីនផ្តល់ថាមពលដល់យន្តហោះគ្មានមនុស្សបើក និងពាក់ព័ន្ធនឹងការផលិតដែក ។ ចំណែកឯវិធានការចុងក្រោយរបស់អង់គ្លេសវិញ បានដាក់ទណ្ឌកម្មទៅលើអង្គការយោធាអ៊ីរ៉ង់ និងអង្គភាពមួយចំនួនដែលពាក់ព័ន្ធនឹងឧស្សាហកម្មដ្រូន និងមីស៊ីលផ្លោងរបស់អ៊ីរ៉ង់ ៕

អត្ថបទ ៖ ប៊ុន សុភាព